છોટાઉદેપુરમાં ભારે વરસાદથી સોકેત નદીમાં પૂર આવ્યું, લો-લેવલ કોઝવે પાણીમાં ગરકાવ
કૉઝવે પાણીમાં ગરકાવ થઈ જતા સામે કાઠે આવેલા ચારથી પાંચ ગામના લોકો અવર જવર માટે મુશ્કેલીમાં મુકાયા છે.પાણી ઓસર્યા બાદ જ સામે કાઠે રહેતા લોકો અવર જવર કરી શકશે.
CHHOTA UDEPUR : હવામાન વિભાગની આગાહી વચ્ચે છોટાઉદેપુરમાં સાર્વત્રિક મેઘ મહેર થઇ છે. ભારે વરસાદને કારણે છોટાઉદેપુર તાલુકાના રંગપુર મોટી સઢલી ગામ પાસેથી પસાર થતી સાકેત નદીમાં ભારે પૂર આવ્યું છે.સાકેત નદી પર આવેલો લો-લેવલ કોઝવે પાણીમાં સંપૂર્ણ ગરકાવ થઈ ગયો છે. કૉઝવે પાણીમાં ગરકાવ થઈ જતા સામે કાઠે આવેલા ચારથી પાંચ ગામના લોકો અવર જવર માટે મુશ્કેલીમાં મુકાયા છે.પાણી ઓસર્યા બાદ જ સામે કાઠે રહેતા લોકો અવર જવર કરી શકશે.
ભારે વરસાદને કારણે છોટાઉદેપુરની ઓરસંગ નદીમાં પણ પુર આવ્યું. અઢી ઇંચ વરસાદ પડતા જિલ્લાની સૌથી મોટી નદી ઓરસંગ નદી બે કાંઠે વહેતી થઇ છે. છોટાઉદેપુરમાં 2 વાગ્યા સુધી 2.6 ઈંચ વરસાદ પડ્યો, તો બોડેલીમાં 2.3, પાવીજેતપુરમાં 2 ઈંચ વરસાદ, સંખેડા અને કવાંટમાં 1.4 ઈંચ અને નસવાડીમાં 1 ઈંચ વરસાદ નોંધાયો છે.
છોટાઉદેપુર જિલ્લામાં સાર્વત્રિક મેઘમહેર થઇ છે અને જિલ્લાના તમામ તાલુકામાં વરસાદી માહોલ છે. બોડેલી વિસ્તારમાં વરસાદની ધમાકેદાર બેટિંગથી રસ્તા પર પાણી ભરાયા અને લોકોને અવર જવર કરવા માટે હાલાકી પડી હતી. બોડેલીમાં બે કલાકમાં 1.5 ઇંચ વરસાદ પડ્યો જયારે પાવીજેતપુરમાં બે કલાકમાં 1 ઇંચ વરસાદ પડ્યો.
ગુજરાતમાં આગામી ચાર દિવસ બનાસકાંઠા, સાબરકાંઠા , અરવલ્લી, પાટણ , મહેસાણા, મહીસાગર, દાહોદ, ગાંધીનગર, અમદાવાદ , પંચમહાલ, છોટાઉદેપુર, નર્મદા, સુરત, નવસારી, દમણ દાદરા નગર હવેલીમાં ભારેથી અતિભારે વરસાદની આગાહી છે.
આ પણ વાંચો : આધુનિક સમાજમાં એકતા-સમાનતા માટે રામાનુજાચાર્યના વિચારો મહત્વપૂર્ણ: ત્રિદંડી ચિન્ના જીયાર સ્વામી
