Breaking News: ઈરાન-અમેરિકા યુદ્ધની અસર ગુજરાતમાં, ગેસ અછતથી હોટેલ ઉદ્યોગ પર સંકટના વાદળો ઘેરાયા

ઈરાન અને અમેરિકા વચ્ચે વધતા તણાવ અને વૈશ્વિક ઊર્જા સંકટની અસર હવે ભારતના વિવિધ ઉદ્યોગો પર જોવા મળી રહી છે. ગુજરાતમાં પહેલેથી જ સિરામિક અને ફાર્મા ઉદ્યોગ ગેસ પુરવઠાની અછતનો સામનો કરી રહ્યા છે, ત્યારે હવે હોટેલ અને રેસ્ટોરન્ટ ઉદ્યોગ પર પણ સંકટના વાદળો ઘેરાયા છે.

કોમર્શિયલ ગેસ સિલિન્ડરનો ભાવ

માહિતી મુજબ રાજ્યમાં કોમર્શિયલ ગેસ સિલિન્ડરની સપ્લાયમાં અવરોધ ઉભો થતા હોટલો અને રેસ્ટોરન્ટ ચલાવવું મુશ્કેલ બનતું જઈ રહ્યું છે. કેટલાક વિસ્તારોમાં કોમર્શિયલ ગેસ સિલિન્ડરનો ભાવ બ્લેક માર્કેટમાં લગભગ ₹3500 સુધી પહોંચી ગયો છે. જેના કારણે નાના અને મધ્યમ હોટેલ વ્યવસાયકારો માટે ખર્ચ વધતા વ્યવસાય ચલાવવો મુશ્કેલ બની રહ્યો છે.

અહેવાલ મુજબ ગુજરાતમાં અંદાજે 10 હજાર જેટલી હોટલો પર આ પરિસ્થિતિની અસર થઈ શકે છે. સાથે જ લગભગ 7 હજાર જેટલા કેટરર્સના વ્યવસાય પર પણ જોખમ ઉભું થયું છે. ગેસની અછત લાંબા સમય સુધી રહે તો લગ્ન, પાર્ટી અને અન્ય કાર્યક્રમોમાં કેટરિંગ સેવાઓ પણ અસરગ્રસ્ત થઈ શકે છે.

વધતા ભાવને લઈને ચિંતા યથાવત

આ પરિસ્થિતિ વચ્ચે રાજ્ય સરકાર તરફથી ખાતરી આપવામાં આવી છે કે ઘરેલું ગેસ પુરવઠો ખોરવાશે નહીં અને દરેક ઘરમાં રસોઈ માટે જરૂરી ગેસ ઉપલબ્ધ રહેશે. તેમ છતાં ઉદ્યોગો માટે ગેસ પુરવઠો અને વધતા ભાવને લઈને ચિંતા યથાવત છે.

વિશેષજ્ઞોના મતે જો વૈશ્વિક સ્તરે ઊર્જા પુરવઠાની સ્થિતિ વધુ ખરાબ બને તો આગામી દિવસોમાં હોટેલ અને હૉસ્પિટાલિટી સેક્ટર પર તેની વધુ ગંભીર અસર પડી શકે છે.

ઈરાન-ઈઝરાયેલ યુદ્ધને પગલે, ગુજરાત-ભારતના ફાર્માસ્યુટીકલ ઉદ્યોગને 4500 થી 5000 નું કરોડનું નુકશાન