અમરેલી જિલ્લાના સાવરકુંડલામાં ધોધમાર વરસાદ દરમિયાન એક બાઈક ચાલક પાણીના જોરદાર પ્રવાહમાં તણાઈ જવાની ઘટના સામે આવી છે. કેવડાપરા વિસ્તારમાં બનેલી આ ઘટનાના દ્રશ્યો પણ સામે આવ્યા છે, જેમાં બાઈક ચાલક પાણીના પ્રવાહમાં સંઘર્ષ કરતો જોવા મળે છે.

પાણીના પ્રવાહમાં તણાતા દ્રશ્યો કેમેરામાં કેદ

ભારે વરસાદને કારણે રસ્તા પર પાણીનો પ્રવાહ એટલો તેજ હતો કે બાઈક ચાલક તેનું સંતુલન ગુમાવી બેઠો અને પાણીમાં તણાઈ ગયો. ઘટનાના દ્રશ્યો સોશિયલ મીડિયામાં પણ વાયરલ થઈ રહ્યા છે, જે વરસાદની ગંભીર સ્થિતિ દર્શાવે છે.

સ્થાનિક લોકોએ સમયસર કર્યું રેસ્ક્યૂ

ઘટનાની જાણ થતાં આસપાસના સ્થાનિક લોકો તાત્કાલિક મદદ માટે દોડી આવ્યા હતા. ભારે જહેમત બાદ બાઈક ચાલકને સલામત રીતે પાણીના પ્રવાહમાંથી બહાર કાઢવામાં આવ્યો હતો. સદનસીબે આ ઘટનામાં કોઈ જાનહાનિ થઈ નથી.

વરસાદી માહોલ વચ્ચે સાવચેતી રાખવા અપીલ

સતત વરસી રહેલા વરસાદને કારણે અનેક નીચાણવાળા વિસ્તારોમાં પાણી ભરાઈ રહ્યા છે અને રસ્તાઓ પર જોખમી સ્થિતિ સર્જાઈ રહી છે. તંત્રએ લોકોને વરસાદ દરમિયાન પાણી ભરાયેલા રસ્તાઓ અને તેજ પ્રવાહવાળા વિસ્તારોમાંથી પસાર ન થવાની અપીલ કરી છે.

 સાવરકુંડલાની આ ઘટના ભારે વરસાદ દરમિયાન બેદરકારી કેટલી જોખમી બની શકે છે તેનું જીવંત ઉદાહરણ છે, તેથી વરસાદી પરિસ્થિતિમાં સાવચેતી રાખવી અત્યંત જરૂરી છે.

 આ પણ વાંચો-  Valsad Rain News: વલસાડમાં મેઘતાંડવ! બે કલાકમાં વાપીમાં 4.2 ઇંચ વરસાદ, શહેરના અનેક વિસ્તારો જળબંબાકાર