Ahmedabad : લારી જપ્ત થતા મહિલાનો AMC કચેરીએ હંગામો, લારી નહીં છોડો તો.. દારૂ વેચવાની આપી ધમકી, જુઓ Video

અમદાવાદના દાણીપીઠ સ્થિત અમદાવાદ મ્યુનિસિપલ કોર્પોરેશન (AMC) કચેરી ખાતે એક મહિલાએ ભારે હંગામો મચાવ્યો હતો. આ ઘટના ત્યારે બની જ્યારે રાયપુરમાં એસ્ટેટ વિભાગ દ્વારા તેની લારી જપ્ત કરવામાં આવી હતી. આ મહિલા તેની ફરિયાદ રજૂ કરવા અને મ્યુનિસિપલ કમિશનરને મળવા માટે AMC કચેરીએ પહોંચી હતી.

જોકે, કચેરીના સિક્યુરિટી ગાર્ડે તેને મ્યુનિસિપલ કમિશનરને મળવા દેવામાં રોકી દીધી હતી, જેના પગલે મહિલા રોષે ભરાઈ હતી. તેણે સ્પષ્ટ ધમકી આપી હતી કે જો તંત્ર તેની જપ્ત કરાયેલી લારી પાછી નહીં આપે, તો તે દારૂનો ધંધો શરૂ કરશે.

મહિલાએ એવો પણ આક્ષેપ કર્યો હતો કે દારૂ વેચનારાઓ સામે કોઈ કાર્યવાહી કરવામાં આવતી નથી, પરંતુ મજૂરી કરીને ગુજરાન ચલાવતા લોકોની લારીઓ જપ્ત કરીને તેમને પરેશાન કરવામાં આવી રહ્યા છે. તેણીએ દુકાનદારો પાસેથી પૈસા ન મળતા હોવાની અને ત્રણ-ત્રણ મહિના સુધી હેરાનગતિનો સામનો કરવો પડતો હોવાની વ્યથા પણ વ્યક્ત કરી હતી, જે સ્ટ્રીટ વેન્ડરના જીવનની મુશ્કેલીઓ દર્શાવે છે. આ ઘટનાએ AMCના કાર્યવાહી પર સવાલો ઉભા કર્યા છે.