Breaking News : મુરલી વિજયે આંતરરાષ્ટ્રીય ક્રિકેટમાંથી કરી સંન્યાસની જાહેરાત, છેલ્લી મેચ 2018માં રમી હતી
વિજયે ભારત માટે છેલ્લે ડિસેમ્બર 2018માં ઓસ્ટ્રેલિયા સામે પર્થમાં આંતરરાષ્ટ્રીય મેચ રમી હતી. તેણે 61 ટેસ્ટ, 17 વનડે અને નવ ટી20 મેચમાં ભારતનું પ્રતિનિધિત્વ કર્યું હતું.
ઓપનિંગ બેટ્સમેન મુરલી વિજયે આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. 30 જાન્યુઆરીએ બપોરે મુરલી વિજયે સોશિયલ મીડિયા પર આની જાહેરાત કરી અને ચાહકોનો આભાર માન્યો.મુરલી વિજયે વર્ષ 2008માં ભારત માટે ડેબ્યૂ કર્યું હતું, જ્યારે 2018માં તેણે છેલ્લી ટેસ્ટ મેચ રમી હતી. 38 વર્ષીય મુરલી વિજયની ગણતરી ટીમ ઈન્ડિયાના સ્ટાઇલિશ ઓપનિંગ બેટ્સમેનોમાં થાય છે.
મુરલી ક્રિકેટના સૌથી મોટા ફોર્મેટમાં સફળ રહ્યો
વિજયે 61 ટેસ્ટમાં 3982 રન, 17 વનડેમાં 339 રન અને નવ ટી20 મેચમાં 169 રન બનાવ્યા હતા. તેણે ટેસ્ટમાં 12 સદી ફટકારી હતી. મુરલી ક્રિકેટના સૌથી મોટા ફોર્મેટમાં સફળ રહ્યો હતો. તેણે 38.28ની એવરેજથી સ્કોર કર્યો. વિજયનો સર્વોચ્ચ સ્કોર 167 રન હતો. તેણે ટેસ્ટમાં 15 અડધી સદી પણ ફટકારી હતી. તે વનડે અને ટી-20માં ટેસ્ટ જેવી સફળતા મેળવી શક્યો નથી.
વિજયે કહ્યું, “મારા તમામ સાથી ખેલાડીઓ, કોચ, માર્ગદર્શકો અને સહાયક સ્ટાફ માટે, તમારા બધા સાથે રમવું એ એક વિશેષાધિકાર રહ્યો છે અને હું મારા સપનાને સાકાર કરવામાં મદદ કરવા બદલ તમારો આભાર માનું છું.
@BCCI @TNCACricket @IPL @ChennaiIPL pic.twitter.com/ri8CCPzzWK
— Murali Vijay (@mvj888) January 30, 2023
વિજયે શું લખ્યું?
મુરલી વિજયે કહ્યું, “આજે, અપાર આભાર સાથે, હું આંતરરાષ્ટ્રીય ક્રિકેટના તમામ ફોર્મેટમાંથી મારી નિવૃત્તિની જાહેરાત કરું છું. 2002-2018 સુધીની મારી સફર મારા જીવનના સૌથી અદ્ભુત વર્ષોમાંનું એક રહ્યું છે કારણ કે રમતના ઉચ્ચ સ્તરે ભારતનું પ્રતિનિધિત્વ કરવાનું સન્માન હતું. ભારતીય ક્રિકેટ કંટ્રોલ બોર્ડ (BCCI), તમિલનાડુ ક્રિકેટ એસોસિએશન (TNCA), ચેન્નાઈ સુપર કિંગ્સ અને ચેમ્પલાસ્ટ સનમાર દ્વારા મને આપવામાં આવેલી તકો માટે હું આભારી છું.
IPLમાં શાનદાર પ્રદર્શન
મુરલી વિજય આઈપીએલ ઈતિહાસના સર્વશ્રેષ્ઠ ઓપનર બેટ્સમેનોમાંના એક હતા. તેણે ચેન્નાઈ સુપર કિંગ્સ, દિલ્હી ડેરડેવિલ્સ (હવે દિલ્હી કેપિટલ્સ) અને કિંગ્સ ઈલેવન પંજાબ (હવે પંજાબ કિંગ્સ)નું પ્રતિનિધિત્વ કર્યું હતું. ચેન્નાઈ સાથે તે ઘણો સફળ રહ્યો હતો. વિજયે આઈપીએલમાં 106 મેચ રમી હતી. આ દરમિયાન તેણે 25.93ની એવરેજથી 2619 રન બનાવ્યા. વિજયે બે સદી અને 13 અડધી સદી ફટકારી હતી.
