IPL 2021 સિઝનના ઓક્શન માટે ભારતીય ક્રિકેટ કંટ્રોલ બોર્ડ (BCCI)એ ખેલાડીઓની યાદી જાહેર કરી છે. હરાજીમાં કુલ 292 ખેલાડીઓ આવશે. જ્યારે 8 ટીમોને કુલ 61 પ્લેયરોની જરૂર છે. ખેલાડીઓની હરાજી 18 ફેબ્રુઆરીએ ચેન્નઈમાં થશે. IPL વિશ્વની સૌથી મોટી T-20 લીગ છે, જેમાં ફ્રેન્ચાઇઝીઓ ખેલાડીઓ પર કરોડોનો ખર્ચ કરે છે. આજે આપણે જાણીશું કે આઈપીએલના ઈતિહાસમાં 5 સૌથી મોંઘા ખેલાડીઓના નામ અને તેને કેટલા રૂપિયામાં ખરીદવામાં આવ્યા હતા.
વિરાટ કોહલી – 17 કરોડ રૂપિયા
ટીમ ઇન્ડિયા અને આઈપીએલ ફ્રેન્ચાઇઝી રોયલ ચેલેન્જર્સ બેંગલોરના કેપ્ટન વિરાટ કોહલી ઇન્ડિયન પ્રીમિયર લીગના સૌથી મોંઘા ખેલાડી છે. કોહલીને આરસીબીએ વર્ષ-2018 માં 17 કરોડની જંગી રકમ ખર્ચ કરીને જાળવી રાખ્યો હતો. વિરાટ કોહલી આ લીગનો સૌથી સફળ બેટ્સમેન છે. કોહલી આરસીબી સાથે આઈપીએલની પ્રથમ સીઝનથી જોડાયેલો છે.
યુવરાજ સિંહ – 16 કરોડ રૂપિયા
ભારતીય ક્રિકેટ ટીમના ભૂતપૂર્વ ઓલરાઉન્ડર યુવરાજ સિંહનું નામ પણ ટોપ-5 માં શામેલ છે. યુવરાજ સિંહ આઈપીએલના ઇતિહાસમાં બીજા નંબરનો સૌથી મોંઘો ખેલાડી છે. 2015 માં આઈપીએલ સીઝન-8 દરમિયાન દિલ્હી ડેરડેવિલ્સની ટીમે યુવરાજ સિંહને 16 કરોડમાં ખરીદ્યો હતો. યુવી તે સીઝનનો સૌથી મોંઘો ખેલાડી પણ બન્યો હતો.
પેટ કમિન્સ – 15.5 કરોડ રૂપિયા
કોલકાતા નાઈટ રાઇડર્સની ટીમે આઈપીએલ હરાજી દરમિયાન ગત વર્ષે 15.5 કરોડ રૂપિયા આપીને ઓસ્ટ્રેલિયાના ઝડપી બોલર પેટ કમિન્સને આઈપીએલ-12 માં ખરીદ્યો હતો. ગત વર્ષે કમિન્સ આઈપીએલનો સૌથી મોંઘો ક્રિકેટર બન્યો હતો.
મહેન્દ્રસિંહ ધોની – 15 કરોડ રૂપિયા
આઈપીએલના શ્રેષ્ઠ કેપ્ટન તરીકે જાણીતા મહેન્દ્રસિંહ ધોનીને આઈપીએલની ફ્રેન્ચાઇઝી ચેન્નાઈ સુપર કિંગ્સ એ વર્ષ-2018 દરમિયાન 15 કરોડમાં જાળવી રાખ્યો હતો. આઈપીએલ-11 માં માહીએ તેમના નેતૃત્વ હેઠળ સીએસકેને ત્રીજી વખત આઈપીએલ ચેમ્પિયન બનાવી હતી.
રોહિત શર્મા – 15 કરોડ રૂપિયા
આઈપીએલની ટીમ મુંબઈ ઈન્ડિયન્સના કેપ્ટન રોહિત શર્મા આઈપીએલ ઇતિહાસના 5 માં સૌથી મોંઘા ખેલાડી છે. વર્ષ 2018 માં મુંબઇ ઇન્ડિયન્સે 15 કરોડની જંગી રકમ સાથે ટીમમાં રોહિત શર્માને જાળવી રાખ્યો હતો. રોહિત શર્માના નેતૃત્વમાં મુંબઈની ટીમ 4 વખત આઈપીએલ વિજેતા બની છે.
Published On - 8:36 am, Thu, 18 February 21