રવિચંદ્રન અશ્વિન મોટા વિવાદમાં ફસાયો, જીત બાદ લાગ્યો ગંભીર આરોપ
ટીમ ઈન્ડિયાનો પૂર્વ સ્ટાર સ્પિનર રવિચંદ્રન અશ્વિન હાલમાં તમિલનાડુ પ્રીમિયર લીગ 2025માં રમી રહ્યા છે. પરંતુ આ લીગની વચ્ચે, તે એક મોટા વિવાદમાં ફસાઈ ગયો છે. આર. અશ્વિનના કેપ્ટનશીપ હેઠળની ડિંડીગુલ ડ્રેગન્સ ટીમ પર બોલ ટેમ્પરિંગના ગંભીર આરોપો લગાવવામાં આવ્યા છે.
તમિલનાડુ પ્રીમિયર લીગ (TNPL) 2025માં એક મોટો વિવાદ ઉભો થયો છે, જેમાં સીકેમ મદુરાઈ પેન્થર્સે આર અશ્વિનની આગેવાની હેઠળની ડિંડીગુલ ડ્રેગન્સ પર બોલ ટેમ્પરિંગના ગંભીર આરોપો લગાવ્યા છે. આ મામલો 14 જૂનના રોજ સેલેમ ક્રિકેટ ફાઉન્ડેશન ગ્રાઉન્ડ પર રમાયેલી મેચ સાથે સંબંધિત છે, જ્યાં ડ્રેગન્સે પેન્થર્સને 9 વિકેટથી હરાવ્યું હતું. જો કે, આયોજકોએ પેન્થર્સને તેમના દાવાઓને સાબિત કરવા માટે નક્કર પુરાવા રજૂ કરવાનો નિર્દેશ આપ્યો છે, કારણ કે આ આરોપો અટકળો પર આધારિત હોય તેવું લાગે છે.
અશ્વિનની ટીમ પર ગંભીર આરોપ
પેન્થર્સે દાવો કર્યો છે કે ડ્રેગન ટીમે મેચ દરમિયાન કેમિકલ કોટેડ ટુવાલનો ઉપયોગ કરીને બોલની સ્થિતિ સાથે ચેડા કર્યા હતા. પેન્થર્સ ટીમના CEO મહેશ એસ. એ TNPLના અધિકારીઓને પત્ર લખીને આ ટુવાલના સ્ત્રોતની તપાસની માંગ કરી હતી અને ડ્રેગન ટીમ પર બોલ સાથે ચેડા કરવાનો આરોપ લગાવ્યો હતો. જોકે, TNPL એ સ્પષ્ટતા કરી હતી કે આ ટુવાલ તમિલનાડુ ક્રિકેટ એસોસિએશન દ્વારા પૂરા પાડવામાં આવ્યા હતા અને બંને ટીમોને સમાન રીતે ઉપલબ્ધ હતા. બોલને સૂકવવાની પ્રક્રિયા મેદાન પરના અમ્પાયરોની દેખરેખ હેઠળ કરવામાં આવી હતી.
તપાસ માટે સમિતિ બનાવવાની યોજના
TNPLના ચીફ એક્ઝિક્યુટિવ ઓફિસર (CEO) પ્રસન્ના કન્નને પેન્થર્સને લખેલા ઈમેઈલમાં જણાવ્યું હતું કે આ આરોપો મેચ પૂરી થયા પછી લગાવવામાં આવ્યા હતા અને પુરાવા વિના, તે અટકળો જેવા લાગે છે. કન્નને ભારપૂર્વક જણાવ્યું હતું કે ફિલ્ડ અમ્પાયરો કે મેચ રેફરીઓએ મેચ દરમિયાન કે પછી આવી કોઈ અનિયમિતતાઓની જાણ કરી નથી. તેમણે એમ પણ કહ્યું કે સમગ્ર મેચ દરમિયાન અમ્પાયરો અને રમત નિયંત્રણ ટીમ દ્વારા બોલ પર નજીકથી નજર રાખવામાં આવી હતી. ઉપરાંત, TNPL આ બાબતની તપાસ માટે એક સ્વતંત્ર આંતરિક સમિતિ બનાવવાની યોજના બનાવી રહી છે.
R Ashwin accused of ball-tampering by Madurai Panthers; TNPL asks franchise to show proof#RAshwin #TNPL #MaduraiPanthers #BallTampering pic.twitter.com/VzAFwYFPxG
— OneVision Media (@onevision_media) June 16, 2025
અશ્વિનની ટીમની એકતરફી જીત
સેલમમાં રમાયેલી આ મેચમાં પ્રથમ બેટિંગ કરતા મદુરાઈ પેન્થર્સે 20 ઓવરમાં 8 વિકેટ ગુમાવીને 150 રન બનાવ્યા. આ દરમિયાન ડ્રેગન્સના કેપ્ટન આર. અશ્વિનને બોલિંગમાં કોઈ વિકેટ મળી ન હતી, અને તેણે 4 ઓવરમાં 27 રન આપ્યા હતા. જોકે, બેટિંગમાં, અશ્વિને ઓપનર તરીકે 29 બોલમાં 49 રનની શાનદાર ઈનિંગ રમી હતી, જેના કારણે ડ્રેગન સરળતાથી 12.3 ઓવરમાં લક્ષ્ય પ્રાપ્ત કરી શક્યું. પરંતુ હવે આ આરોપો તેમની જીત પર પ્રશ્નો ઉભા કરી રહ્યા છે.
આ પણ વાંચો: IND vs ENG : ઈંગ્લેન્ડ પ્રવાસ માટે નવી ટીમની જાહેરાત, સરફરાઝ ખાનના ભાઈને પણ મળી તક
