EXCLUSIVE: સાનિયા મિર્ઝા અને શોએબ મલિકના મામલે નામ આવતા મોડલ આયેશાએ TV9 સાથે વાત કરતા કહ્યુ- આઈ એમ શોક્ડ
ભારતીય ટેનિસ દિગ્ગજ સાનિયા મિર્ઝા અને પાકિસ્તાની ક્રિકેટર શોએબ મલિકે 2010માં લગ્ન કર્યા હતા અને બંનેને એક પુત્ર છે. હવે બંને અલગ થવાના અહેવાલો સામે આવ્યા છે અને આ માટે એક મોડેલનુ નામ પણ આવી રહ્યુ છે.
ભારતની સ્ટાર ટેનિસ ખેલાડી સાનિયા મિર્ઝા અને પાકિસ્તાનના દિગ્ગજ ક્રિકેટર શોએબ મલિકના લગ્ન હંમેશા ચર્ચામાં રહ્યા છે. અલગ દેશ, ખાસ કરીને પાકિસ્તાનથી હોવાના કારણે, તેમના વિશે ઘણા સમાચારો પણ બન્યા છે. પરંતુ આ દિવસોમાં તેમનું લગ્નજીવન ખૂબ જ ખરાબ તબક્કામાંથી પસાર થઈ રહ્યું છે. ઘણા સમયથી પાકિસ્તાની મીડિયામાં એવી અફવાઓ વહેતી થઈ હતી કે બંને જલ્દી છૂટાછેડા લેવાના છે. સમાચાર છે કે સાનિયાએ શોએબનું ઘર પણ છોડી દીધું છે. આ સમગ્ર મામલામાં ‘તિરાડ’ નું કારણ માનવામાં આવતી પાકિસ્તાની મોડલનું નિવેદન પણ આવ્યું છે.
તાજેતરમાં જ પાકિસ્તાની મીડિયામાંથી સાનિયા અને શોએબના અલગ થવાના સમાચાર અચાનક સામે આવ્યા હતા. સાનિયાની એક ઇન્સ્ટાગ્રામ પોસ્ટે આ આગને વધુ હવા આપી હતી, તાજેતરમાં સાનિયાએ એક ઇન્સ્ટા પર પોસ્ટ કર્યું, જેમાં લખ્યું હતું કે જ્યારે કોઈ વ્યક્તિનું હૃદય તૂટી જાય છે, ત્યારે તેણે ક્યાં જવું જોઈએ અને કોનો સહારો લેવો જોઈએ.
નજીકના મિત્રે છૂટાછેડાની પુષ્ટિ કરી
આ બધી અફવાઓ વચ્ચે, સાનિયા અને શોએબના નજીકના મિત્ર અને શોએબની મીડિયા મેનેજમેન્ટ ટીમ સાથે સંકળાયેલ વ્યક્તિએ પાકિસ્તાની મીડિયામાં સત્તાવાર રીતે તેમના છૂટાછેડા વિશે વાત કરી છે. તેણે કહ્યું કે હું વધારે કહી શકતો નથી પરંતુ હું ચોક્કસ કહી શકું છું કે બંને વચ્ચે છૂટાછેડા થઈ ગયા છે અને સત્તાવાર રીતે તેઓ અલગ થઈ ગયા છે.
ચર્ચાઓ પાછળ પાકિસ્તાન મોડલનું નામ
આ અફવાઓ પાછળનું કારણ પાકિસ્તાનની એક મોડલને જણાવવામાં આવી રહ્યું છે, જેનું નામ આયેશા છે. ભૂતકાળમાં આયેશા અને શોએબે કરેલું હોટ ફોટોશૂટ ફરીથી વાયરલ થવા લાગ્યું છે અને જો અહેવાલોનું માનીએ તો તેમના છૂટાછેડા પાછળ આયેશાનો હાથ છે. આયેશા ઉમર પાકિસ્તાનની પ્રખ્યાત અભિનેત્રી અને યુટ્યુબર છે. તે ઘણા પાકિસ્તાની શોમાં જોવા મળી છે. ટીવી સિવાય તે પાકિસ્તાની ફિલ્મોમાં પણ જોવા મળી છે. શોએબ મલિક અને આયેશાએ 2021માં ફોટોશૂટ કરાવ્યું હતું, આ ફોટોશૂટ આ દિવસોમાં ખૂબ જ વાયરલ થઈ રહ્યું છે.
TV9 એ પાક મોડલ સાથે વાત કરી
TV9 એ આ અફવાઓની પુષ્ટિ કરવા માટે પાકિસ્તાની મોડલ અને અભિનેત્રી આયેશા સાથે ખાસ વાત કરી, તેણીએ કહ્યું કે તે હાલમાં પ્રવાસ પર છે અને સોશિયલ મીડિયામાં શું ચાલી રહ્યું છે તેની જાણ નથી. સાનિયા અને શોએબ બંને સારા માણસ છે અને મારી શુભકામનાઓ તેમની સાથે છે. આયેશાએ એમ પણ કહ્યું કે તે કોઈના અંગત જીવનમાં વધારે વાત કરવા માંગતી નથી, અલ્લાહ દરેકને આશીર્વાદ આપે.
જો કે આ મામલે હજુ સુધી સાનિયા અને શોએબ તરફથી કોઈ નિવેદન સામે આવ્યું નથી. સાનિયા અને શોએબે 2010માં લગ્ન કર્યા હતા. બંનેને ચાર વર્ષનો પુત્ર પણ છે.
