IPL 2022 : KL Rahul એ મુંબઈ સામે રેકોર્ડ બનાવ્યો, આ મામલામાં સચિન તેંડુલકરને પાછળ છોડી દીધો

લખનૌના સુકાનીએ આ મેચમાં શાનદાર બેટિંગ કરીને ઘણા અનોખા રેકોર્ડ બનાવ્યા અને સચિન તેંડુલકર જેવા દિગ્ગજોને પાછળ છોડી દીધા. કેએલ રાહુલે મુંબઈ સામે 9 ચોગ્ગા ફટકાર્યા અને આ સાથે જ તેની આઈપીએલમાં 300 ચોગ્ગા પૂરા થઈ ગયા. આવું કરનાર તે 18મો ખેલાડી બન્યો. રાહુલે પાંચમો ચોગ્ગો મારતાની સાથે જ સચિન તેંડુલકરનો 295 ચોગ્ગાનો રેકોર્ડ તોડી નાખ્યો હતો. તેંડુલકરના નામે 78 IPL મેચોમાં 295 ચોગ્ગા છે.

કેએલ રાહુલે મુંબઈ સામે શાનદાર ઇનિંગ રમીને IPL માં પોતાના 3500 રન પૂરા કર્યા છે. KL રાહુલ આવું કરનાર IPL ઈતિહાસમાં 16મો ખેલાડી બની ગયો છે. રાહુલને આ સ્થાન હાંસલ કરવા માટે 95 રનની જરૂર હતી અને રાહુલે અણનમ 103 રન બનાવ્યા હતા. કેએલ રાહુલની આ 100મી આઈપીએલ મેચ હતી. જેમાં તેણે શાનદાર પ્રદર્શન કરીને ઘણા રેકોર્ડ બનાવ્યા હતા. ખાસ વાત એ છે કે તેણે તેની 100મી આઈપીએલ મેચમાં સદી ફટકારી હતી. આઈપીએલના ઈતિહાસમાં અત્યાર સુધી રાહુલ સિવાય કોઈ બેટ્સમેન પોતાની 100મી મેચમાં સદી ફટકારી શક્યો નથી.