T20 World Cup, Playing 11: વિરાટ કોહલીની વિદાય મેચમાં રોહિત શર્મા નહી રમે? જાણો કેવી છે પ્લેયીંગ ઇલેવન

દુબઈમાં ભારત અને નામિબિયા (India vs Namibia) વચ્ચે ટક્કર, બંને ટીમો સેમીફાઈનલની રેસમાંથી પહેલાથી જ બહાર

Rohit Sharma-Virat Kohli

TV9 Gujarati | Edited By: Avnish Goswami | Updated on: Nov 08, 2021 | 4:58 PM

ટી20 વર્લ્ડ કપ 2021 (T20 World Cup 2021) ની સેમિફાઇનલની રેસમાંથી પહેલેથી જ બહાર રહેલી ટીમ ઈન્ડિયા (Indian Cricket Team) તેની છેલ્લી લીગ મેચ રમવા દુબઈમાં ઉતરશે. સ્પર્ધા નામીબિયા (Namibia) સાથે છે, જેણે સુપર-12માં પહોંચીને ઈતિહાસ રચ્યો છે, જોકે આ રાઉન્ડમાં તેના ખાતામાં એક પણ જીત નથી. પરંતુ તેમ છતાં નામિબિયાના ખેલાડીઓએ ચોક્કસપણે પોતાના કૌશલ્યથી સૌના દિલ જીતી લીધા છે. બીજી તરફ, ટીમ ઈન્ડિયા ખૂબ જ પ્રતિભાશાળી ખેલાડીઓથી સજ્જ છે, પરંતુ તેનું કાર્ડ સુપર-12માં જ ક્લિયર થઈ ગયું.

હવે આ બંને ટીમો આ ટૂર્નામેન્ટની છેલ્લી લીગ મેચમાં ટકરાશે. આ મેચની સૌથી મહત્વની વાત એ છે કે ભારત-નામિબિયા (India vs Namibia) મેચ વિરાટ કોહલી (Virat Kohli) ની T20 કેપ્ટનશિપની છેલ્લી મેચ છે. વિરાટ કોહલી આ મેચ બાદ T20ની કેપ્ટનશીપમાંથી નિવૃત્ત થશે અને આ માટે જ તે આ મેચ એકતરફી રીતે જીતશે.

ભારતીય ટીમમાં શું ફેરફાર થશે?

ટીમ ઈન્ડિયાની પ્લેઈંગ ઈલેવનમાં પહેલો ફેરફાર ઓપનિંગમાં થઈ શકે છે. મતલબ કે રોહિત શર્મા (Rohit Sharma) ને આરામ આપવામાં આવી શકે છે અને તેની જગ્યાએ ઈશાન કિશનને ફરી એકવાર તક મળી શકે છે. બોલિંગ વિભાગમાં 3 ફેરફાર થઈ શકે છે. મોહમ્મદ શમી, જસપ્રિત બુમરાહ અને વરુણ ચક્રવર્તીને આરામ આપવામાં આવી શકે છે અને તેમના સ્થાને શાર્દુલ ઠાકુર, ભુવનેશ્વર કુમાર અને રાહુલ ચાહરને અજમાવી શકાય છે.

ભારતની સંભવિત પ્લેઇંગ XI

કેએલ રાહુલ, ઈશાન કિશન, વિરાટ કોહલી, સૂર્યકુમાર યાદવ, ઋષભ પંત, હાર્દિક પંડ્યા, રવિન્દ્ર જાડેજા, શાર્દુલ ઠાકુર, ભુવનેશ્વર કુમાર, આર અશ્વિન, રાહુલ ચાહર. 18 વર્ષ પછી નામિબિયા સાથે ટક્કર

તમને જણાવી દઈએ કે ભારત અને નામિબિયા વચ્ચે 18 વર્ષ બાદ મેચ રમાશે. આ ફોર્મેટમાં બંને ટીમો પહેલીવાર આમને-સામને થશે, પરંતુ વર્ષ 2003ના વર્લ્ડ કપમાં ભારત અને નામિબિયા વચ્ચે મેચ રમાઈ હતી.

નામિબિયાની ટીમ ભારતને પડકાર આપી શકે છે કારણ કે તેની પાસે ડાબોડી ઝડપી બોલરો છે. ભારતીય બેટ્સમેનોએ 2020 થી પાવરપ્લેમાં ડાબા હાથના ફાસ્ટ બોલરો સામે ઓવર દીઠ માત્ર 5.7 રન બનાવ્યા છે. તમને જણાવી દઈએ કે નામીબિયા સામેની આ મેચ ટીમ ઈન્ડિયાની 150મી T20 મેચ હશે. આ સમયગાળા દરમિયાન ટીમે 94 જીત મેળવી છે અને 51માં હારનો સામનો કરવો પડ્યો છે.