જાણો, વિરાટ કોહલી અને ક્રિસ્ટિયાનો રોનાલ્ડો એક ઇન્સ્ટાગ્રામ પોસ્ટથી કેટલી કમાણી કરે છે?

ભારતના ભૂતપૂર્વ સુકાની વિરાટ કોહલી (Virat Kohli) વર્તમાન સુપરસ્ટારમાંથી એક છે. વિશ્વના મહાન બેટ્સમેનોમાંના એક વિરાટ કોહલીની સોશિયલ મીડિયા પર પણ એક અલગ જલવો છે. તે સોશિયલ મીડિયા પર સૌથી વધુ ફોલો કરવામાં આવતી વ્યક્તિઓમાંની એક છે. તે ઘણા લોકો માટે પ્રેરણા છે. રમત પ્રત્યેનો જુસ્સો તેને બાકીના ખેલાડીઓથી અલગ બનાવે છે અને મેદાન પર તેની આક્રમક શૈલીને પણ લોકો પસંદ કરે છે. દરમિયાન, ઘણા લોકો એ જાણવા માંગે છે કે તે ઇન્સ્ટાગ્રામ પોસ્ટથી કેટલી કમાણી કરે છે.

33 વર્ષીય વિરાટ કોહલી ક્રિકેટના મેદાન પર લાંબા સમયથી સંઘર્ષ કરી રહ્યો છે. છેલ્લા 3 વર્ષથી તે કોઈપણ ફોર્મેટમાં એક પણ સદી ફટકારી શક્યો નથી. ‘કિંગ કોહલી’ ના નામથી પ્રખ્યાત વિરાટ કોહલીના ફેન બેઝમાં વધારો થયો છે. ખાસ કરીને સોશિયલ મીડિયા પર તે સૌથી વધુ ફોલો કરવામાં આવતો ક્રિકેટર છે.

આઉટ ઓફ ફોર્મ હોવા છતાં ફોલોઅર્સ અને કમાણીના મામલે વિરાટ કોહલી (Virat Kohli) ઇન્સ્ટાગ્રામ (Instagram) પર ટોપ ક્રિકેટર છે. વેબસાઈટ hopperhq.com ના રિપોર્ટ અનુસાર ઈન્સ્ટાગ્રામ પર કમાણી (Earn on Instagram) કરનાર ટોપ સેલિબ્રિટીની યાદીમાં વિરાટ કોહલી 14મા ક્રમે છે. ટોપ 25 માં તે એકમાત્ર એશિયન છે. ઇન્સ્ટાગ્રામ પર તેના 200 મિલિયન (20 કરોડ) થી વધુ ફોલોઅર્સ છે.

મળતા રિપોર્ટ પ્રમાણે ભારતીય ક્રિકેટ ટીમના પુર્વ સુકાની વિરાટ કોહલી (Virat Kohli) તેની ઇન્સ્ટાગ્રામની એક પોસ્ટમાંથી લગભગ 8.69 કરોડ રૂપિયા કમાય છે. તો બીજી તરફ આ ફોટો-શેરિંગ સોશિયલ પ્લેટફોર્મ પર સૌથી વધુ કમાણી કરનારાઓની યાદીમાં ફુટબોલ જગતનો દિગ્ગજ ગણાતો ફુટબોલર ક્રિસ્ટિયાનો રોનાલ્ડો (Cristiano Ronaldo) ટોચ પર છે. તમને જણાવી દઇએ કે ઈન્સ્ટાગ્રામ પર તેના 44 લાખથી વધુ ફોલોઅર્સ છે. તો ઇન્સ્ટાગ્રામમાં કમાણીની વાત કરીએ તો તે એક પોસ્ટથી લગભગ 19 કરોડ રૂપિયા કમાય છે.

લિયોનેલ મેસ્સી ઇન્સ્ટાગ્રામથી કમાણીના મામલે ત્રીજા સ્થાને આવે છે

આ યાદીમાં દિગ્ગજ ફૂટબોલર લિયોનેલ મેસ્સી (Lionel Messi) ત્રીજા સ્થાને આવે છે. લિયોનેલ મેસ્સીની ઇન્સ્ટાગ્રામ પર કમાણીની વાત કરીએ તો તે એક પોસ્ટથી લગભગ 14 કરોડ રૂપિયા કમાય છે. આ લિસ્ટમાં બીજા સ્થાને અમેરિકન મોડલ કાઈલી જેનરનું છે. જે ઈન્સ્ટાગ્રામ પર એક પોસ્ટથી 14.6 લાખ રૂપિયા કમાય છે.