ચેતન સાકરીયા અને મુકેશ ચૌધરી હવે ઓસ્ટ્રેલિયામાં ક્રિકેટ રમશે, ટીમ ઈન્ડિયા પણ હવે દૂર નહીં!
ભારતના બે ડાબોડી ફાસ્ટ બોલર ચેતન સાકરિયા (Chetan Sakariya) અને મુકેશ ચૌધરી (Mukesh Choudhary) ને ઓસ્ટ્રેલિયામાં યોજાનારી T20 મેક્સ ટુર્નામેન્ટમાં રમવાની તક મળશે.
એ બોલર જેના પર મહેન્દ્ર સિંહ ધોની (MS Dhoni) એ વિશ્વાસ વ્યક્ત કર્યો હતો. જેને ધોનીએ કેટલીક મેચોમાં ખરાબ રીતે હરાવવા છતાં ટીમમાં જાળવી રાખ્યો હતો. તે ખેલાડીએ હવે લોટરી જીતી લીધી છે. ડાબોડી ફાસ્ટ બોલર મુકેશ ચૌધરી (Mukesh Choudhary) વિશે વાત કરીએ, જે ઓસ્ટ્રેલિયામાં યોજાનારી T20 મેક્સ ટૂર્નામેન્ટમાં રમતા જોવા મળશે. મુકેશ ચૌધરી ઉપરાંત અન્ય એક ડાબોડી ફાસ્ટ બોલર ચેતન સાકરિયા (Chetan Sakariya) ને આ તક મળી છે. ગુજરાતના ભાવનગરનો યુવાન ખેલાડી સાકરિયા IPL 2022માં દિલ્હી કેપિટલ્સ તરફથી રમ્યો હતો.
ઓસ્ટ્રેલિયાથી મુકેશ ચૌધરી-સાકરિયાને આમંત્રણ
સાકરિયા અને મુકેશ ચૌધરી એમઆરએફ પેસ ફાઉન્ડેશન અને ક્રિકેટ ઓસ્ટ્રેલિયા વચ્ચેના વિનિમય કાર્યક્રમના ભાગરૂપે બ્રિસ્બેનમાં સમય વિતાવશે. ક્રિકેટ ઓસ્ટ્રેલિયાએ એક નિવેદનમાં કહ્યું, ‘એમઆરએફ પેસ ફાઉન્ડેશન અને ક્રિકેટ ઓસ્ટ્રેલિયા વચ્ચે ખેલાડીઓ અને કોચિંગની આપ-લે લગભગ 20 વર્ષથી ચાલી રહી છે. તે છેલ્લા કેટલાક વર્ષ કોરોના વાયરસને કારણે બંધ થઈ ગયું હતું પરંતુ તે આ બે ભારતીય ખેલાડીઓ સાથે ફરી શરૂ થઈ રહ્યું છે.
સાકરિયા અને મુકેશ કઈ ટીમ સાથે રમશે?
સાકરિયાએ ગયા વર્ષે શ્રીલંકા સામે વનડે અને ટી20 આંતરરાષ્ટ્રીય ડેબ્યૂ કર્યું હતું. મુકેશ ચૌધરીએ IPL 2022 માં ડેબ્યૂ કર્યું હતું. ચેન્નાઈ માટે આ ફાસ્ટ બોલરે 13 મેચમાં 16 વિકેટ ઝડપી હતી. તમને જણાવી દઈએ કે સાકરિયા ઓસ્ટ્રેલિયામાં યોજાનારી T20 મેક્સ ટૂર્નામેન્ટમાં સનશાઈન કોસ્ટ તરફથી રમશે, જ્યારે 26 વર્ષીય ચૌધરી વિનમ-મેનલી માટે મેદાનમાં ઉતરતા જોવા મળશે.
ટીમ ઈન્ડિયા માટે કરશે સ્પર્ધા
ટૂર્નામેન્ટમાં ભાગ લેવા ઉપરાંત, મુકેશ ચૌધરી અને ચેતન સાકરિયા બુપા નેશનલ ક્રિકેટ સેન્ટર ખાતે તાલીમ લેશે અને ક્વીન્સલેન્ડ બુલ્સ સીઝન પહેલાની તૈયારીઓમાં પણ સામેલ થશે. T20 મેક્સ સ્પર્ધા 18 ઓગસ્ટથી 4 સપ્ટેમ્બર દરમિયાન યોજાશે. તેની ફાઇનલ એલન બોર્ડર ફિલ્ડમાં રમાશે. જો સાકરિયા અને ચૌધરી આ ટૂર્નામેન્ટમાં સારું પ્રદર્શન કરશે તો સ્વાભાવિક છે કે તેમનું નામ પણ ટીમ ઈન્ડિયાની રેસમાં આવશે.
ટીમ ઈન્ડિયામાં ડાબા હાથના ફાસ્ટ બોલરોનો અભાવ છે અને મુકેશ-સાકરિયા પોતાની પ્રતિભા સાબિત કરી શકે છે અને ટીમમાં એન્ટ્રી મેળવી શકે છે. હાલ અર્શદીપ સિંહ ટીમ ઈન્ડિયાનો ભાગ છે. અર્શદીપ સિંહે ઈંગ્લેન્ડ સામે ટી-20માં ડેબ્યૂ કર્યું હતું અને તેની શાનદાર બોલિંગ બાદ હવે તે વેસ્ટ ઈન્ડિઝ સામેની વનડે શ્રેણીમાં પણ ડેબ્યૂ કરી શકે છે.
Latest News Updates
