ઓસ્ટ્રેલિયાએ દક્ષિણ આફ્રિકાને 214 રનથી હરાવ્યું, કેપ્ટન ટેમ્બા બાવુમા પહેલીવાર ટેસ્ટ મેચ હાર્યો

ઓસ્ટ્રેલિયાએ ડરબનમાં રમાયેલી પહેલી ટેસ્ટમાં દક્ષિણ આફ્રિકાને 214 રનથી હરાવ્યું. હેઝલવુડે બીજી ઇનિંગમાં છ વિકેટ લીધી અને કારકિર્દીનું શ્રેષ્ઠ પ્રદર્શન કર્યું. કેપ્ટન તરીકે ટેમ્બા બાવુમાની આ પહેલી હાર.

Temba BavumaImage Credit source: X

Smit Chauhan | Updated on: Oct 13, 2026 | 6:24 PM

ડર્બનના કિંગ્સમીડ ખાતે ઓસ્ટ્રેલિયા સામે દક્ષિણ આફ્રિકાની 214 રનથી કારમી હાર થઈ હતી. આ જીત સાથે ઓસ્ટ્રેલિયાને ટેસ્ટ શ્રેણીમાં 1-0ની લીડ મળી હતી. ઓસ્ટ્રેલિયાએ દક્ષિણ આફ્રિકાને 479 રનનો વિશાળ ટાર્ગેટ આપ્યો હતો. જવાબમાં, દક્ષિણ આફ્રિકાનો બીજો દાવ ફક્ત 206 રનમાં જ ઓલઆઉટ થઈ ગયો. આ ટેસ્ટ કેપ્ટન તરીકે ટેમ્બા બાવુમાનો પહેલો પરાજય હતો. ઝડપી બોલર જોશ હેઝલવુડ અને બેટ્સમેન મેટ રેનશો ઓસ્ટ્રેલિયાની જીતના હીરો હતા.

હેઝલવુડે તબાહી મચાવી દીધી

હેઝલવુડે પહેલી ઇનિંગમાં બે વિકેટ લીધી હતી, પરંતુ બીજી ઇનિંગમાં તેણે દક્ષિણ આફ્રિકાના બેટિંગ ઓર્ડર પર ભારે તબાહી મચાવી હતી. હેઝલવુડે બીજી ઇનિંગમાં છ વિકેટ લીધી હતી. તેણે રાયન રિકેલ્ટન, ડેવિડ બેડિંગહામ, વિઆન મુલ્ડર, માર્કો જેન્સન, સિમોન હાર્મર અને એનરિચ નોર્ટજેને આઉટ કર્યા હતા.

આફ્રિકાએ છેલ્લી 4 વિકેટ માત્ર 5 રનમાં ગુમાવી

બીજી ઇનિંગમાં દક્ષિણ આફ્રિકાએ પોતાની છેલ્લી ચાર વિકેટ માત્ર પાંચ રનમાં ગુમાવી દીધી હતી, જેના પરિણામે ઓસ્ટ્રેલિયાનો ડર્બનમાં શાનદાર વિજય થયો હતો. એડન માર્કરામે બીજી ઇનિંગમાં 75 રનની મહત્વપૂર્ણ ઇનિંગ રમી હતી, અને અન્ય કોઈ દક્ષિણ આફ્રિકન બેટ્સમેન ટકી શક્યા નહીં.

After 13 matches, Temba Bavuma has finally tasted defeat as South Africa’s Test captain. https://t.co/ZieUOfSXAM

— Cricbuzz (@cricbuzz) October 13, 2026

મેટ રેનશો પ્લેયર ઓફ ધ મેચ

અગાઉ, ડાબોડી બેટ્સમેન મેટ રેનશોએ બેટથી શાનદાર પ્રદર્શન કર્યું. એવી પીચ પર જ્યાં અન્ય બેટ્સમેનોને ટકી રહેવાનું પણ મુશ્કેલ લાગતું હતું, રેનશોએ 397 બોલનો સામનો કરીને 190 રનની મેરેથોન ઇનિંગ રમી. વધુમાં, બીજી ઇનિંગમાં તેણે 99 બોલમાં 82 રન બનાવ્યા, જેના કારણે તેને પ્લેયર ઓફ ધ મેચનો એવોર્ડ મળ્યો.

કેપ્ટન ટેમ્બા બાવુમા પહેલીવાર ટેસ્ટ હાર્યો

દક્ષિણ આફ્રિકાએ ઘરઆંગણે સતત ચાર ટેસ્ટ મેચ જીત્યા બાદ પહેલી હારનો સામનો કરવો પડ્યો હતો. નવેમ્બર 2024 પછી દક્ષિણ આફ્રિકા ઘરઆંગણે એક પણ ટેસ્ટ હાર્યું નહોતું. પણ હવે ઓસ્ટ્રેલિયાએ આફ્રિકાને હરાવ્યું હતું. ઓસ્ટ્રેલિયા 2006 થી કિંગ્સમીડ, ડર્બન ખાતે એક પણ ટેસ્ટ હાર્યું નથી અને આ સિલસિલો ચાલુ રહ્યો હતો. દક્ષિણ આફ્રિકાનો કેપ્ટન ટેમ્બા બાવુમા ટેસ્ટ કેપ્ટન તરીકે પહેલી વાર ટેસ્ટ મેચ હાર્યો હતો. આ પહેલા તે સતત 12 ટેસ્ટ મેચમાં હાર્યો નહોતો.