વડાપ્રધાન નરેન્દ્ર મોદી મંગળવારે મુંબઈ ખાતે આયોજિત ગ્લોબલ ફિનટેક ફેસ્ટ 2026 માં ઉપસ્થિત રહ્યા હતા. આ કાર્યક્રમ દરમિયાન તેમણે જણાવ્યું કે, વર્તમાન વૈશ્વિક પરિસ્થિતિથી સૌ કોઈ વાકેફ છે; સમગ્ર વિશ્વ સંઘર્ષ અને અનિશ્ચિતતાના દોરમાંથી પસાર થઈ રહ્યું છે. આંતરરાષ્ટ્રીય સ્તરે ક્રૂડ ઓઇલને લઈને વિવાદો ચાલી રહ્યા છે અને ખાસ કરીને એપ્રિલથી જૂનનો ત્રિમાસિક ગાળો સૌથી પડકારજનક રહ્યો હતો. આ તમામ પ્રતિકૂળતાઓ છતાં જ્યારે ભારતનો GDP ગ્રોથ રેટ 7.8% નોંધાય છે, ત્યારે સમગ્ર વિશ્વને એક નવો ભરોસો મળે છે.

પીએમ મોદીએ કર્યો ‘હેટ્રિક’નો ઉલ્લેખ

વડાપ્રધાને જણાવ્યું, “મને આનંદ છે કે આજે અહીં વધુ એક ‘હેટ્રિક’ નોંધાઈ છે. એક હેટ્રિક વર્ષ 2024 માં સતત ત્રીજી વાર સરકાર બનવાથી થઈ હતી, અને આ બીજી હેટ્રિક આપ સૌની વચ્ચે મારી ઉપસ્થિતિ સાથે જોડાયેલી છે. ગ્લોબલ ફિનટેક ફેસ્ટમાં મારી આ સતત ત્રીજા વર્ષની ઉપસ્થિતિ છે. આ હેટ્રિક સાબિત કરે છે કે ‘વિકસિત ભારત’ના નિર્માણ માટે ફિનટેક ક્ષેત્ર અને તમારું યોગદાન કેટલું મહત્વપૂર્ણ છે.”

વિકસિત ભારત અંગેનો ભરોસો વધુ દ્રઢ બન્યો

તેમણે ઉમેર્યું કે, “જ્યારે પણ હું આ મંચ પર આવું છું, ત્યારે મને પહેલાં કરતાં વધુ યુવાનો જોવા મળે છે અને નવી ઊર્જાનો અનુભવ થાય છે. અહીં મને નવી તકો અને સંભાવનાઓનો વ્યાપ વધતો જણાય છે. સ્પષ્ટપણે દેખાય છે કે ભારતીય યુવાઓમાં રિસ્ક લેવાની ક્ષમતા વધી રહી છે અને સપનાઓ મોટા થઈ રહ્યા છે. આ જ કારણ છે કે વિકસિત ભારતના ઉજ્જવળ ભવિષ્ય અંગેનો મારો આત્મવિશ્વાસ વધુ મજબૂત બની રહ્યો છે.”

UPI ભારતીય ફિનટેક સેક્ટરનું સૌથી શ્રેષ્ઠ ઉદાહરણ

પીએમ મોદીએ જણાવ્યું કે UPI ભારતીય ફિનટેક સેક્ટરનું સૌથી મોટું પ્રતીક છે. આ એક એવી ઐતિહાસિક સિદ્ધિ છે જેની પ્રશંસા ફ્રાન્સના રાષ્ટ્રપતિ ઇમેન્યુઅલ મેક્રોને પણ કરી છે. આ પ્લેટફોર્મે દેશના કરોડો સામાન્ય લોકોને ઔપચારિક બેંકિંગ વ્યવસ્થા સાથે જોડવાનું સફળ કામ કર્યું છે. પીએમ મોદીએ ભારપૂર્વક જણાવ્યું કે ડિજિટલ ટેકનોલોજીના ક્ષેત્રમાં ભારત હવે પોતાના નિયમો અને વૈશ્વિક માપદંડો જાતે જ નક્કી કરી રહ્યું છે.

ફિનટેક ક્રાંતિએ ભારતીય ફાઇનાન્સની દુનિયા બદલી: RBI ગવર્નર

આ પ્રસંગે રિઝર્વ બેંક ઓફ ઇન્ડિયા (RBI) ના ગવર્નર સંજય મલ્હોત્રાએ જણાવ્યું કે, છેલ્લા એક દાયકામાં ફિનટેક ક્રાંતિએ ભારતીય બેંકિંગ અને નાણાકીય ક્ષેત્રને ધરમૂળથી બદલી નાખ્યું છે. બેંકિંગ સેવાઓને બેંકની શાખાઓમાંથી બહાર કાઢીને સીધી સામાન્ય નાગરિકોના હાથમાં પહોંચાડી દેવામાં આવી છે. આજે નાના શહેરનો દુકાનદાર હોય, અંતરિયાળ ગામડાનો ખેડૂત હોય કે પછી મેટ્રો શહેરનો પ્રોફેશનલ—દરેક વ્યક્તિ UPI, આધાર-સક્ષમ પેમેન્ટ સિસ્ટમ (AEPS) અને જન ધન ઇકોસિસ્ટમ દ્વારા સરળતાથી ડિજિટલ વ્યવહારો, બચત અને ધિરાણ મેળવી રહ્યા છે.

આ વ્યવસ્થાએ નાણાકીય સમાવેશ (Financial Inclusion) ને માત્ર સરકારી પોલિસીનો એજન્ડા રાખવાને બદલે કરોડો ભારતીયો માટે રોજિંદી વાસ્તવિકતા બનાવી દીધી છે. ફિનટેક ટેકનોલોજીના કારણે જ વિશાળ વસ્તી ધરાવતા દેશમાં ઝડપી અને નહિવત્ ખર્ચે ફાઇનાન્સિયલ સેવાઓ છેવાડાના માનવી સુધી પહોંચાડવી શક્ય બની છે.

90% વેપાર પોતાની કરન્સીમાં : BRICS દેશોના નિર્ણયથી ડૉલરનું વર્ચસ્વ ઘટ્યું, લીડરશિપ બદલ રશિયાએ કર્યા ભારતના વખાણ