PM Kisan 24મો હપ્તો: પીએમ મોદીએ જાહેર કર્યો હપ્તો, ખાતામાં ₹2000 આવ્યા કે નહીં આ રીતે તપાસો

કેન્દ્ર સરકારે દિવાળી પૂર્વે દેશના ખેડૂતોને મોટી ભેટ આપી છે. વડાપ્રધાન નરેન્દ્ર મોદીએ 30 ઑક્ટોબર 2026 ના રોજ પ્રધાનમંત્રી કિસાન સન્માન નિધિ (PM-Kisan) યોજનાનો 24મો હપ્તો સત્તાવાર રીતે જાહેર કર્યો છે. ગુજરાતના બનાસકાંઠા જિલ્લામાં આયોજિત એક ભવ્ય કાર્યક્રમમાંથી દેશભરના ખેડૂતોના બેંક ખાતામાં આ હપ્તાની રકમ ડીબીટી (DBT) મારફતે સીધી ટ્રાન્સફર કરવામાં આવી હતી.

આ હપ્તા હેઠળ દેશના 9.34 કરોડથી વધુ ખેડૂત પરિવારોના ખાતામાં ₹18,690 કરોડથી વધુની રકમ જમા કરાવવામાં આવી છે, જેમાં દરેક પાત્ર ખેડૂતને ₹2,000 મળ્યા છે. જોકે, હપ્તો જાહેર થતાં જ દરેક ખાતામાં તાત્કાલિક રકમ દેખાય તે જરૂરી નથી. તેથી ખેડૂતો ઘરે બેઠા પોતાના મોબાઇલ કે કમ્પ્યુટર દ્વારા પોર્ટલ પર પેમેન્ટ સ્ટેટસ ચેક કરી શકે છે.

પેમેન્ટ સ્ટેટસ કેવી રીતે ચેક કરવું?

ખેડૂતોને ખાતામાં ₹2,000 આવ્યા છે કે નહીં તે જાણવા માટે બેંકમાં જવાની જરૂર નથી. નીચે દર્શાવેલા સરળ સ્ટેપ્સ અનુસરીને સ્થિતિ જાણી શકાય છે:

• સૌપ્રથમ સત્તાવાર વેબસાઇટ pmkisan.gov.in ઓપન કરો.
• હોમપેજ પર આપેલા ‘Farmers Corner’ સેક્શનમાં જાઓ.
• ત્યાં ‘Know Your Status’ વિકલ્પ પર ક્લિક કરો.
• તમારો પીએમ કિસાન રજીસ્ટ્રેશન નંબર દાખલ કરો અને સ્ક્રીન પર દેખાતો કેપ્ચા કોડ ભરો.
• ‘Get OTP’ પર ક્લિક કરો. રજિસ્ટર્ડ મોબાઇલ નંબર પર આવેલો ઓટીપી દાખલ કરીને આગળ વધો.
• હવે સ્ક્રીન પર લાભાર્થીની વિગતો અને હપ્તાઓનો રેકોર્ડ દેખાશે, જ્યાં 24મા હપ્તાનું સ્ટેટસ ચકાસી શકાય છે.

અહીં બેંકનું નામ, UTR નંબર, પેમેન્ટ મોડ અને રકમ ક્રેડિટ થયાની તારીખ પણ જાણી શકાય છે. જો કોઈ ખેડૂત પોતાનો રજીસ્ટ્રેશન નંબર ભૂલી ગયા હોય, તો ‘Know Your Registration No.’ પર ક્લિક કરીને મોબાઇલ નંબર અથવા આધાર નંબર વેરિફિકેશન દ્વારા રજીસ્ટ્રેશન નંબર ફરી મેળવી શકે છે.

From farms and dairy to infrastructure and connectivity, Banaskantha is making new strides in development. https://t.co/PCTYAW27DN

— Narendra Modi (@narendramodi) October 30, 2026

કયા કારણોસર હપ્તો અટકી શકે છે?

યોજનાનો લાભ મેળવવા માટે માત્ર નોંધણી હોવી પૂરતી નથી, આ શરતો પૂરી થવી જરૂરી છે:

• e-KYC પૂર્ણ ન હોવું: સરકારે તમામ ખેડૂતો માટે ઈ-કેવાયસી ફરજિયાત બનાવ્યું છે, જે પોર્ટલ પર ઓટીપીથી, એપના ફેસ ઓથેન્ટિકેશનથી અથવા સીએસસી (CSC) સેન્ટર પર બાયોમેટ્રિકથી થઈ શકે છે.
• બેંક ખાતું આધાર સાથે લિંક ન હોવું: ડીબીટી દ્વારા નાણાં મેળવવા માટે ખાતું આધાર સીડેડ હોવું અનિવાર્ય છે.
• જમીનના રેકોર્ડમાં ભૂલ: રાજ્ય સરકારના મહેસૂલી દસ્તાવેજોમાં ખેતીલાયક જમીનની વિગતો (લેન્ડ સીડિંગ) સાચી હોવી જરૂરી છે.
• પાત્રતાની ચકાસણી: 1 ફેબ્રુઆરી 2019 પછી જમીનની માલિકી મેળવનારા કે એક જ પરિવારમાંથી એકથી વધુ સભ્યો દ્વારા લાભ લેવાના શંકાસ્પદ કેસોમાં ફિઝિકલ વેરિફિકેશન ન થાય ત્યાં સુધી ચુકવણી અટકી શકે છે.

ક્યાં કરવી ફરિયાદ?

જો તમામ પ્રક્રિયા પૂર્ણ હોવા છતાં ખાતામાં નાણાં ન આવ્યા હોય, તો ખેડૂતો ‘કિસાન ઈ-મિત્ર’ ચેટબોટ અથવા હેલ્પડેસ્કનો સંપર્ક કરી શકે છે. આ ઉપરાંત હેલ્પલાઇન નંબર 155261 (ટોલ ફ્રી) અથવા 011-24300606 પર પણ સંપર્ક કરી શકાય છે. ફેબ્રુઆરી 2019 માં શરૂ થયેલી આ યોજના હેઠળ પાત્ર ખેડૂત પરિવારોને વાર્ષિક ₹6,000 ની સહાય ₹2,000 ના ત્રણ સમાન હપ્તામાં સીધી બેંક ખાતામાં આપવામાં આવે છે.

CEC જ્ઞાનેશ કુમાર સામે વિપક્ષનો મોક મહાભિયોગ: વોટર લિસ્ટ અને SIR મુદ્દે તીખી રાજકીય તકરાર– જુઓ Video