Manipur Violence: પહેલા હથિયારો લૂંટ્યા, પછી હુમલાનું આયોજન, મણિપુરમાં સેના સામે નવો પડકાર
મણિપુરમાં ચાલી રહેલી હિંસા વચ્ચે કેન્દ્રીય ગૃહમંત્રી અમિત શાહ સોમવારે રાજ્યના ત્રણ દિવસના પ્રવાસે છે. અહીં તે બે સમુદાયના લોકો સાથે વાત કરશે અને શાંતિ પુનઃસ્થાપિત કરવાનો પ્રયાસ કરશે. કેન્દ્રીય ગૃહ રાજ્ય મંત્રી નિત્યાનંદ રાય પહેલેથી જ મણિપુરમાં હાજર છે.
Manipur: હજુ સુધી મણિપુરની સ્થિતિમાં કોઈ સુધારો જોવા મળ્યો નથી. કેન્દ્રીય ગૃહમંત્રી અમિત શાહના (Amit Shah) ઇમ્ફાલ પહોંચવાના એક દિવસ પહેલા રવિવારે સેનાના જવાનોએ આતંકવાદીઓની મોટી યોજનાને નિષ્ફળ બનાવી હતી. રવિવારે સાંજે ચેકિંગ દરમિયાન જવાનોએ એક વાહનમાંથી ઇન્સાસ રાઇફલ ઉપરાંત મોટી માત્રામાં દારૂગોળો જપ્ત કર્યો છે.
સુરક્ષા દળો પર હુમલો કરવાના ઈરાદાથી નીકળ્યા હતા
મીડિયા અહેવાલ મુજબ, સેના દ્વારા જાહેર કરવામાં આવેલા એક નિવેદનમાં કહેવામાં આવ્યું છે કે વાહનમાં ત્રણ લોકો હતા જેઓ ઈમ્ફાલ ઈસ્ટ સ્થિત સિટી કન્વેન્શન સેન્ટર પાસે સુરક્ષા દળો પર હુમલો કરવાના ઈરાદાથી નીકળ્યા હતા. ચેકિંગ દરમિયાન જ્યારે વાહનની તલાશી લેવામાં આવી ત્યારે તેમાંથી ઈન્સાસ રાઈફલ સિવાય 60 કારતુસ, હેન્ડ ગ્રેનેડ અને ડિટોનેટર મળી આવ્યા હતા.
મણિપુરમાં આ રીતે હથિયારો અને દારૂગોળો મળવાથી સુરક્ષા દળો માટે એક નવો પડકાર ઉભો થયો છે. પુનઃપ્રાપ્ત કરાયેલા ઘણા હથિયારો અને વિસ્ફોટકો સરકારી અને પોલીસ શસ્ત્રાગારોમાંથી ચોરાઈ ગયા હતા. રવિવારે જ, એક ટોળાએ ઇમ્ફાલ ખીણમાં અનેક સરકારી શસ્ત્રાગારોમાંથી હથિયારો અને દારૂગોળો લૂંટી લીધો હતો.
પોલીસ સ્ટેશનમાંથી 56 બંદૂકો લૂંટવામાં આવી
અહેવાલો અનુસાર, ટોળું ઇમ્ફાલ પૂર્વ અને પશ્ચિમમાં મણિપુર રાઇફલ્સ અને ભારતીય અનામત બટાલિયનના મુખ્યાલયમાં ઘૂસી ગયું હતું. આ ઉપરાંત થોબલના યારીપોક અને નોંગપોકના પોલીસ સ્ટેશનોને પણ નિશાન બનાવ્યા હતા અને તેમના હાથમાં જે કંઈ આવ્યું તે લૂંટી લીધું હતું. યારીપોક પોલીસ સ્ટેશનના શસ્ત્રાગારમાંથી ઓછામાં ઓછી 56 બંદૂકો લૂંટવામાં આવી હતી અને નોંગપોક સેકમાઈમાં પોલીસ કર્મચારીઓ પાસેથી પાંચ બંદૂકો પણ લૂંટવામાં આવી હતી.
આ પણ વાંચો : Breaking News: અમૃતસરથી વૈષ્ણોદેવી જઈ રહેલી બસ ઉંડી ખીણમાં પડી, 7ના મોત
3 મેના રોજ રાજ્યમાં હિંસા શરૂ થઈ ત્યારથી, પોલીસ સ્ટેશનો અને શસ્ત્રાગારોમાંથી લૂંટાયેલા શસ્ત્રોની કુલ સંખ્યા વિશે કોઈ સ્પષ્ટ આંકડા બહાર આવ્યા નથી. મણિપુરના ડીજીપી ઉપરાંત મુખ્યમંત્રી એન. બિરેન સિંહે પણ લોકોને ટોળા દ્વારા પોલીસ સ્ટેશનો અને શસ્ત્રાગારોમાંથી લૂંટેલા હથિયારો પરત કરવાની અપીલ કરી હતી.
કેન્દ્રીય ગૃહમંત્રી સોમવારે મણિપુર પહોંચ્યા હતા
તમને જણાવી દઈએ કે મણિપુરમાં ચાલી રહેલી હિંસા વચ્ચે કેન્દ્રીય ગૃહમંત્રી અમિત શાહ સોમવારે રાજ્યના ત્રણ દિવસના પ્રવાસે છે. અહીં તે બે સમુદાયના લોકો સાથે વાત કરશે અને શાંતિ પુનઃસ્થાપિત કરવાનો પ્રયાસ કરશે. કેન્દ્રીય ગૃહ રાજ્ય મંત્રી નિત્યાનંદ રાય પહેલેથી જ મણિપુરમાં હાજર હતા.
દેશના તમામ સમાચાર વાંચવા માટે અહીં ક્લિક કરો
