ભૂતકાળમાંથી લીધો બોધપાઠ, PM મોદી પર સીધો હુમલો નહીં કરે વિપક્ષ, આ નિર્ણયો INDIAની મુંબઈ બેઠકમાં લેવાશે
વિપક્ષે લોકસભા ચૂંટણી 2024ની લડાઈ એકજૂથ થઈને લડવાનું નક્કી કર્યું છે. લગભગ બે ડઝન રાજકીય પક્ષો, વિપક્ષના INDIA જોડાણના બેનર હેઠળ એકઠા થયા છે. આ જૂથની એક બેઠક મુંબઈમાં યોજાવાની છે. જેમાં કેટલાક મહત્વના નિર્ણયો લેવામાં આવી શકે છે.
વિપક્ષના INDIA ગઠબંધનની આગામી બેઠક 31 ઓગસ્ટે મુંબઈમાં યોજાવાની છે. વિપક્ષના દેશવ્યાપી ગઠબંધનની આ ત્રીજી બેઠક છે, જેમાં ઘણા મહત્વપૂર્ણ નિર્ણયો લેવામાં આવી શકે છે. દરમિયાન, મહત્વના મુદ્દાઓ કે, જેના પર સમજૂતી થઈ શકે છે તેમાં લોગો, ધ્વજ અને જોડાણના અન્ય વિષયોનો સમાવેશ થાય છે. આમાં સૌથી મહત્વની બાબત એ છે કે ગઠબંધન પક્ષો વડાપ્રધાન નરેન્દ્ર મોદી પર સીધો પ્રહાર નહીં કરે અને સરકારની નીતિઓ પર જ હુમલો કરશે.
સૂત્રોના જણાવ્યા અનુસાર રેલી હોય કે અન્ય કોઈ પ્રસંગ હોય, INDIA એલાયન્સનો કોઈ પણ નેતા વડાપ્રધાન નરેન્દ્ર મોદી પર અંગત હુમલો નહીં કરે. સરકાર, ભાજપની નીતિ, નિષ્ફળતા અને કામના આધારે હુમલો થશે. કારણ કે ઘણી વખત એવું જોવામાં આવ્યું છે કે જ્યારે વિપક્ષ દ્વારા પીએમ મોદી પર અંગત પ્રહારો થયા છે, ત્યારે તેમનો દાવ ઉલટો પડ્યો છે.
ધ્વજ અને પ્રતીકો પર નિર્ણય
આ સિવાય 31 ઓગસ્ટ, 1 સપ્ટેમ્બરે મુંબઈમાં યોજાનારી બેઠકમાં ગઠબંધનના ધ્વજને અંતિમ સ્વરૂપ આપવામાં આવશે. ગઠબંધનનો ધ્વજ એ જ હશે જેનો ઉપયોગ રેલીઓ, પ્રેસ કોન્ફરન્સ અને અન્ય સ્થળોએ કરવામાં આવ્યો. હાલના પ્રસ્તાવ મુજબ તે અશોક ચક્ર વિનાના ત્રિરંગા જેવું જ હોઈ શકે છે. જો કે આ અંગે હજુ નિર્ણય લેવાનો બાકી છે.
ભલે ગઠબંધનનો ઝંડો હોય, પરંતુ રાજકીય પક્ષો તેમની સીટો, રાજ્યોમાં પાર્ટીના ચિન્હ પર જ ચૂંટણી લડશે. મુંબઈમાં યોજાનારી બેઠક બાદ સપ્ટેમ્બર પછી ભારત ગઠબંધનની દેશવ્યાપી રેલીઓ શરૂ થશે. દરેક રેલીમાં વિપક્ષના 6-7 મોટા નેતા, મુખ્યમંત્રી અને અન્ય લોકો હાજર રહી શકે છે. બેઠકમાં મહાગઠબંધનના અધ્યક્ષ, મુખ્ય સંયોજક અને 4-5 પ્રદેશ સંયોજક બનાવવા અંગે પણ ચર્ચા થઈ શકે છે.
માયાવતી INDIA માં આવશે?
બેઠકમાં લોકસભાની બેઠકોની વહેંચણીને લઈને ફોર્મ્યુલા નક્કી થઈ શકે છે. ઓડિશા, તેલંગાણા અને આંધ્રપ્રદેશને છોડીને, લગભગ 450 બેઠકો નક્કી કરવામાં આવી છે, જ્યાં વિપક્ષી ગઠબંધનમાંથી એક જ ઉમેદવાર હશે. ઉત્તર પ્રદેશ માટે BSPના વડા માયાવતીનો પણ સંપર્ક કરવામાં આવ્યો છે, જોકે BSPએ લગભગ 40 સીટોની માંગણી કરી છે. બસપાના આ પ્રસ્તાવ પર પણ મુંબઈની બેઠકમાં ચર્ચા થશે.
રાષ્ટ્રીય તમામ સમાચાર વાંચવા માટે અહીં ક્લિક કરો
