Ketan Agarwal love story : ઘૂંટણિયે બેસીને કર્યો હતો પ્રપોઝ, હવે વાયરલ થયો કેતન અગ્રવાલનો છેલ્લો વીડિયો, પ્રેમ અને વિશ્વાસઘાતની ચોંકાવનારી કહાની

Siya Goyal Instagram Post: પુણેના યુવા ઉદ્યોગપતિ કેતન અગ્રવાલ હત્યા કેસમાં રોજ નવા ખુલાસા થઈ રહ્યા છે. હવે સોશિયલ મીડિયા પર કેટલાક એવા વીડિયો સામે આવ્યા છે, જે સમગ્ર ઘટનાને વધુ કરુણ અને હૃદયદ્રાવક બનાવી રહ્યા છે. આ વીડિયોમાં કેતન પોતાની મંગેતર સિયા ગોયલને ખુશ કરવા માટે ખાસ તૈયારીઓ કરતો અને તેને પ્રેમથી પ્રપોઝ કરતો જોવા મળે છે.

માહિતી મુજબ, 25 વર્ષીય કેતન અગ્રવાલ સિયા ગોયલના 20મા જન્મદિવસને યાદગાર બનાવવા માટે છેલ્લા એક મહિનાથી તૈયારી કરી રહ્યો હતો. 19 જૂને ઉજવાયેલા જન્મદિવસ માટે તેણે અનેક ખાસ આયોજન કર્યા હતા. વાયરલ થયેલા એક વીડિયોમાં કેતન ફૂલોથી સજાવેલી વૈભવી કન્વર્ટિબલ કારમાં સિયાને ગુલદસ્તો આપતો જોવા મળે છે. અન્ય એક વીડિયોમાં બંને એક રોમેન્ટિક ડિનર દરમિયાન સાથે સમય પસાર કરતા દેખાય છે, જ્યાં કેતન ઘૂંટણિયે બેસીને સિયાને પ્રેમનો એકરાર કરે છે અને તેને કિંમતી ભેટ અર્પણ કરે છે.

આ ઉજવણીને વધુ ભવ્ય બનાવવા માટે કેતને મહાબળેશ્વરના એક વૈભવી રિસોર્ટમાં આશરે 40 રૂમ બુક કરાવ્યા હતા. અહીં બંને પરિવાર અને નજીકના મિત્રો હાજર રહેવાના હતા. કેતન પોતાના આવનારા લગ્નને લઈને ખૂબ જ ઉત્સાહિત હતો અને સિયા સાથેના ભવિષ્યના અનેક સપના જોઈ રહ્યો હતો.

કેતન અને સિયાની સગાઈ આ વર્ષે ફેબ્રુઆરીમાં થઈ હતી. બંને પરિવારોની હાજરીમાં ધામધૂમથી યોજાયેલા આ કાર્યક્રમ બાદ નવેમ્બર મહિનામાં રાજસ્થાનના ઉદયપુર સ્થિત એક ઐતિહાસિક મહેલમાં લગ્ન યોજવાની તૈયારી ચાલી રહી હતી. પરંતુ પોલીસ તપાસમાં સામે આવેલા ખુલાસાઓએ આ ખુશીના માહોલને એક ભયાનક ઘટનામાં ફેરવી દીધો છે.

પોલીસના જણાવ્યા અનુસાર, સિયા ગોયલ અને તેનો પ્રેમી ચેતન ચૌધરી છેલ્લા એક વર્ષથી સંબંધમાં હતા. બંને કેતનને પોતાના ભવિષ્યમાં અવરોધ માનતા હતા અને તેને રસ્તામાંથી દૂર કરવાની યોજના બનાવી રહ્યા હતા. આરોપ છે કે 18 જૂને લોહાગઢ કિલ્લા પાસે કેતનની હત્યા કરવામાં આવી હતી, જેને શરૂઆતમાં અકસ્માત તરીકે રજૂ કરવાનો પ્રયાસ કરવામાં આવ્યો હતો.

The horrific end of Ketan Agarwal & the one Siya Goyal could have just refused to marry him, but happened the other way. It is even more terrifying looking at this video. Trust is a rare commodity these days !!! pic.twitter.com/qc4exnI1Sk

— Aryan (@chinchat09) June 24, 2026

ઘટના બાદ સિયા ગોયલે સોશિયલ મીડિયા પર પણ ભાવનાત્મક પોસ્ટ શેર કરી હતી. તેણે કેતન સાથેના ફોટા પોસ્ટ કરીને લખ્યું હતું કે તે આ નુકસાનને સ્વીકારી શકતી નથી અને બંનેએ સાથે અનેક સપનાઓ જોયા હતા. પોસ્ટના કેપ્શનમાં તેણે લખ્યું હતું, “મારું હૃદય જાણે છે કે તમે અહીં છો, પાછા આવો.” તે સમયે આ પોસ્ટ જોઈને લોકો ભાવુક બની ગયા હતા, પરંતુ હવે તપાસમાં સામે આવેલા તથ્યો બાદ આ પોસ્ટ પણ ચર્ચાનો વિષય બની ગઈ છે.

કેતનના પરિવારને શરૂઆતથી જ આ ઘટનામાં શંકા હતી. કેતન એક અનુભવી ટ્રેકર હતો, તેથી તેના પિતા અને પરિવારજનોને અકસ્માતની વાત પર વિશ્વાસ આવ્યો નહોતો. ત્યારબાદ પોલીસે કોલ રેકોર્ડ, CCTV ફૂટેજ અને અન્ય ટેક્નિકલ પુરાવાઓની તપાસ શરૂ કરી હતી.

તપાસ દરમિયાન વધુ એક ચોંકાવનારો ખુલાસો થયો હતો. પોલીસના જણાવ્યા અનુસાર, 14 જૂને પણ સિયાએ કેતનને લોહાગઢ કિલ્લા પરથી ધક્કો મારીને નીચે ફેંકવાનો પ્રયાસ કર્યો હતો. જોકે તે સમયે કેતન ઝાડીઓનો સહારો લઈને બચી ગયો હતો. ત્યારબાદ સિયાએ સાપ દેખાવાનો બહાનો બનાવી સમગ્ર ઘટનાને અકસ્માત તરીકે રજૂ કરવાનો પ્રયાસ કર્યો હતો.

કડક પૂછપરછ બાદ સિયા ગોયલ અને ચેતન ચૌધરીએ પોતાનો ગુનો કબૂલ કર્યો હોવાનું પોલીસ સૂત્રો જણાવી રહ્યા છે. આ સમગ્ર ઘટનાએ માત્ર અગ્રવાલ પરિવારને જ નહીં, પરંતુ સમગ્ર મહારાષ્ટ્રને હચમચાવી દીધું છે. એક તરફ પ્રેમ, વિશ્વાસ અને ભવિષ્યના સપનાઓથી ભરેલા વીડિયો છે, તો બીજી તરફ હત્યાના ગંભીર આરોપો. આ બંને વચ્ચેનો વિરોધાભાસ લોકોને સતત વિચારતા કરી રહ્યો છે.

યુવતીએ પ્રેમી સાથે મળીને ફિયાન્સેને 400 ફૂટ ઊંડી ખીણમાં ફેક્યો, જાણો ચોંકાવનારી ઘટના