AIIMS બાદ હેકર્સના નિશાના પર ICMR, સર્વર પર થયો મોટો સાયબર અટેક
સાયબર અપરાધીઓએ 30 નવેમ્બરે આ પ્રયાસ કર્યો હતો. ચોંકાવનારી વાત એ છે કે ગુનેગારોએ ICMR સર્વરને હેક કરવાનો એક કે બે વાર નહીં, પરંતુ 6 હજારથી વધુ વખત પ્રયાસ કર્યો હતો. જોકે, હેકર્સ તેમના પ્લાનમાં સફળ થઈ શક્યા ન હતા.
દિલ્હીની AIIMS હોસ્પિટલના સર્વરને નિશાન બનાવ્યા બાદ હવે સાયબર ગુનેગારોએ ICMR એટલે કે ઈન્ડિયન કાઉન્સિલ ઓફ મેડિકલ રિસર્ચના સર્વરને હેક કરવાનો પ્રયાસ કર્યો છે. સાયબર અપરાધીઓએ 30 નવેમ્બરે આ પ્રયાસ કર્યો હતો. ચોંકાવનારી વાત એ છે કે ગુનેગારોએ ICMR સર્વરને હેક કરવાનો એક કે બે વાર નહીં, પરંતુ 6 હજારથી વધુ વખત પ્રયાસ કર્યો હતો. જોકે, હેકર્સ તેમના પ્લાનમાં સફળ થઈ શક્યા ન હતા.
ICMRના સર્વર પર સતત હુમલા થવા છતાં હેકર્સ તેને હેક કરી શક્યા નથી. જો સૂત્રોનું માનીએ તો હોંગકોંગમાં બ્લેકલિસ્ટેડ IPA એડ્રેસ 103.152.220.133 દ્વારા ICMR સર્વરને હેક કરવાનો પ્રયાસ કરવામાં આવ્યો હતો. હાલમાં નેશનલ ઈન્ફોર્મેટિક્સ સેન્ટર (NIC) હેકિંગના આ મામલે વિગતવાર રિપોર્ટ તૈયાર કરી રહ્યું છે.
દિલ્હી AIIMS અને સફદરગંજ પણ હેકર્સના નિશાના પર હતા
23 નવેમ્બરે દિલ્હીની AIIMS હોસ્પિટલમાં 9 કલાક સુધી સર્વર ડાઉન રહેતા ગભરાટ ફેલાયો હતો. AIIMS અધિકારીઓએ તેમના નિવેદનમાં કહ્યું હતું કે સાયબર અપરાધીઓએ AIIMSના સર્વર પર હુમલો કર્યો હતો, જેના કારણે સર્વર સંપૂર્ણપણે ડાઉન થઈ ગયું હતું.
આ પછી 2 ડિસેમ્બરે હોસ્પિટલના પાંચ મુખ્ય સર્વર પર ફરીથી સાયબર હુમલો થયો. આ સાયબર હુમલા ચીનના હેકર્સ દ્વારા કરવામાં આવ્યા હોવાની આશંકા છે. હાલ દિલ્હી AIIMSનો મુદ્દો ચાલી રહ્યો હતો ત્યાં 4 ડિસેમ્બરે દિલ્હીની સફદરગંજ હોસ્પિટલમાંથી પણ સાયબર એટેકના સમાચાર આવ્યા. જો કે તે દિલ્હી AIIMS જેવો ગંભીર હુમલો નહોતો.
દિલ્હી AIIMSએ બે કર્મચારીઓને સસ્પેન્ડ કર્યા
હોસ્પિટલો પાસે મોટી સંખ્યામાં દર્દીઓનો વ્યક્તિગત ડેટા હોય છે. આવી સ્થિતિમાં હેકર્સ તે ડેટા ચોરી કરવાનો પ્રયાસ કરી શકે છે. દિલ્હી AIIMSના મામલામાં બે કર્મચારીઓને પણ સસ્પેન્ડ કરવામાં આવ્યા છે. આ બંને કર્મચારીઓ દિલ્હી AIIMSમાં સિસ્ટમ એનાલિસ્ટ તરીકે કામ કરતા હતા.
આ બંને કર્મચારીઓને અગાઉ કારણ દર્શક નોટિસ ફટકારવામાં આવી હતી. જો કે, હોસ્પિટલ પ્રશાસન બંને દ્વારા આપવામાં આવેલા જવાબથી સંતુષ્ટ ન હતું, ત્યારબાદ બંનેને સસ્પેન્ડ કરવામાં આવ્યા હતા.
બીજી તરફ હોસ્પિટલના ડાયરેક્ટર ડૉ.બી.એલ.શેરવાલે સફદરગંજમાં થયેલા સાયબર હુમલાને લઈને નિવેદન જાહેર કર્યું હતું. ડૉ.બી.એલ. શેરવાલે કહ્યું હતું કે સફદરગંજ પર હુમલો બહુ અસરકારક ન હતો. તેમણે જણાવ્યું કે આ હુમલાથી હોસ્પિટલનો માત્ર અમુક ટેકનિકલ ભાગ પ્રભાવિત થયો હતો, જેના કારણે એક દિવસ સર્વર ડાઉન હતું.
સાથે જ તેણે એવો પણ દાવો કર્યો હતો કે હુમલામાં કોઈ દર્દીના ડેટાને નુકસાન થયું નથી. તેમણે કહ્યું કે NIC અને હોસ્પિટલ પ્રશાસનની ટીમની મદદથી ટેકનિકલ સમસ્યાઓને તાત્કાલિક ઠીક કરવામાં આવી હતી.
Latest News Updates
