બિહારના જાણીતા શિક્ષક અને ખાન ગ્લોબલ સ્ટડીઝના સ્થાપક ખાન સરે શનિવારે કોર્ટમાં આત્મસમર્પણ કર્યું છે. પટનાની એક કોચિંગ સંસ્થામાં થયેલી હિંસા અને કથિત ફાયરિંગની ઘટનાને લઈને તેમની સામે આર્મ્સ એક્ટ તેમજ હત્યાના પ્રયાસ સહિતની ગંભીર કલમો હેઠળ કેસ નોંધવામાં આવ્યો છે. છેલ્લા બે દિવસથી બિહાર પોલીસ તેમની શોધખોળ કરી રહી હતી.

પોલીસના જણાવ્યા મુજબ, ઘટનામાં ખાન સરના સુરક્ષા રક્ષકો દ્વારા ગોળીબાર કરવામાં આવ્યો હતો. તપાસ દરમિયાન એવો આરોપ પણ સામે આવ્યો છે કે સુરક્ષા ગાર્ડ્સે ખાન સરના કહેવાથી ફાયરિંગ કર્યું હતું. જોકે, આ આરોપોની સત્તાવાર પુષ્ટિ હજુ સુધી થઈ નથી અને મામલાની તપાસ ચાલુ છે.

કોચિંગ સેન્ટર પર હુમલો અને ફાયરિંગનો વીડિયો વાયરલ

આ સમગ્ર વિવાદની શરૂઆત 2 જૂને પટનાના મુસલ્લાહપુર હાટ વિસ્તારમાં આવેલી ખાન ગ્લોબલ સ્ટડીઝ કોચિંગ સંસ્થા પર થયેલા હુમલાથી થઈ હતી. કેટલાક અસામાજિક તત્વોએ સંસ્થામાં ઘૂસીને તોડફોડ કરી હતી. આ દરમિયાન સંસ્થાના સુરક્ષા કર્મચારીઓએ રાઇફલમાંથી અનેક રાઉન્ડ ફાયરિંગ કર્યું હોવાનું સામે આવ્યું હતું.

ઘટનાનો વીડિયો સોશિયલ મીડિયા પર વાયરલ થતાં મામલો ચર્ચાનો વિષય બન્યો હતો. વીડિયો સામે આવ્યા બાદ પોલીસે તપાસ શરૂ કરી હતી અને ઘટનાસ્થળના CCTV ફૂટેજ તેમજ અન્ય પુરાવાઓ એકત્રિત કર્યા હતા.

બે સુરક્ષા ગાર્ડની ધરપકડ

તપાસ દરમિયાન પોલીસે ખાન સરના બે સુરક્ષા ગાર્ડ પ્રદીપ અને તાલેશ્વરની અટકાયત કરી હતી. પૂછપરછ દરમિયાન બંનેએ ફાયરિંગ કરવાની કબૂલાત કરી હોવાનું પોલીસનું કહેવું છે. ત્યારબાદ તેમની ધરપકડ કરીને જેલમાં મોકલી દેવામાં આવ્યા હતા અને તેમની પાસે રહેલા હથિયારો પણ જપ્ત કરવામાં આવ્યા હતા.

કોચિંગ જગતમાં સ્પર્ધાનો વિવાદ?

પોલીસ તપાસમાં આ ઘટના પટનાની કોચિંગ સંસ્થાઓ વચ્ચેની હરીફાઈ અને વર્ચસ્વની લડાઈ સાથે પણ જોડાયેલી હોવાનું માનવામાં આવી રહ્યું છે. આ કેસમાં હરીફ કોચિંગ સંસ્થાના સંચાલક જ્ઞાન બિંદુ રોશન આનંદની પણ મુખ્ય આરોપી તરીકે ધરપકડ કરવામાં આવી છે.

કોચિંગ બહાર પોલીસ બંદોબસ્ત

FIR નોંધાયા બાદ બિહાર પોલીસે ખાન સરને શોધવા માટે અનેક સ્થળોએ દરોડા પાડ્યા હતા. તેમના કોચિંગ સેન્ટરની બહાર પણ પોલીસનો કડક બંદોબસ્ત ગોઠવવામાં આવ્યો હતો. શુક્રવારે રાત્રે પોલીસ ટીમ કોચિંગ સંસ્થામાં પહોંચી હતી, પરંતુ ખાન સર ત્યાં હાજર ન હોવાથી તેમની ધરપકડ થઈ શકી નહોતી.

હવે કોર્ટમાં આત્મસમર્પણ બાદ આ સમગ્ર મામલામાં કાનૂની કાર્યવાહી વધુ તેજ બનવાની શક્યતા છે. રાજ્યભરમાં ચર્ચાસ્પદ બનેલા આ કેસ પર સૌની નજર ટકેલી છે.

આ પણ વાંચો-  Cheap Fuel : પેટ્રોલ કરતાં ₹20 સસ્તું ફ્યુઅલ લોન્ચ, હવે ઓછા ખર્ચે ટાંકી કરાવી શકશો ફુલ !, આ સ્ટોરી વાંચવા અહીં ક્લિક કરો