Breaking News : કપાસ, તલ સહીતના ખરીફ પાકની MSPમાં વધારો મોદી સરકારનો નિર્ણય, કેબિનેટમાં લેવાયા 5 મોટા નિર્ણયો

મોદી સરકારે ખેડૂતો માટે મોટો નિર્ણય લીધો છે. ખરીફ પાકના લઘુત્તમ ટેકાના ભાવ (MSP)માં વધારો કરવામાં આવ્યો છે. માર્કેટિંગ સીઝન 2025-26 માટે 14 પાકોના MSPમાં વધારો કરવામાં આવ્યો છે, જેમાં નાઇજરસીડ, રાગી, કપાસ અને તલ સૌથી વધુ વધ્યા છે. આનાથી ખેડૂતોને તેમના ઉત્પાદન માટે નફાકારક ભાવ મળશે અને તેમની આવકમાં વધારો થશે. સરકારે કિસાન ક્રેડિટ કાર્ડ (KCC) યોજના ચાલુ રાખવાનો પણ નિર્ણય લીધો છે.

નરેન્દ્ર મોદીની સરકારે ખેડૂતોને ભેટ આપી છે. બુધવારે કેબિનેટની બેઠકમાં ખરીફ પાકના MSPમાં વધારો કરવાના પ્રસ્તાવને મંજૂરી આપવામાં આવી હતી. કેન્દ્રીય મંત્રી અશ્વિની વૈષ્ણવે જણાવ્યું હતું કે કેબિનેટની બેઠકમાં પાંચ મહત્વપૂર્ણ નિર્ણયોને મંજૂરી આપવામાં આવી હતી. આમાંથી ખેડૂતો સંબંધિત ત્રણ મહત્વપૂર્ણ નિર્ણયો લેવામાં આવ્યા હતા.

અશ્વિની વૈષ્ણવે વધુમાં માહિતી આપતા જણાવ્યુ કે સરકારે માર્કેટિંગ સીઝન 2025-26 માટે ખરીફ પાકોના MSP માં વધારો કર્યો છે, જેથી ઉત્પાદકોને તેમના ઉત્પાદન માટે લાભદાયી ભાવ મળી શકે. ગયા વર્ષની સરખામણીમાં MSP માં સૌથી વધુ વધારો નાઇજરસીડ (રૂ. 820 પ્રતિ ક્વિન્ટલ), ત્યાર બાદ રાગી (રૂ. 596 પ્રતિ ક્વિન્ટલ), કપાસ (રૂ. 589 પ્રતિ ક્વિન્ટલ) અને તલ (રૂ. 579 પ્રતિ ક્વિન્ટલ) માટે કરવામાં આવ્યો છે.

ખરીફ પાકોના MSPમાં વધારો કરવાની મંજૂરી

તેમણે કહ્યું કે માર્કેટિંગ સીઝન 2025-26 માટે ખરીફ પાકોના MSPમાં વધારો કેન્દ્રીય બજેટ 2018-19 ની જાહેરાતને અનુરૂપ છે, જેમાં MSPને અખિલ ભારતીય ભારિત સરેરાશ ઉત્પાદન ખર્ચના ઓછામાં ઓછા 1.5 ગણા સ્તરે નક્કી કરવાની વાત કરવામાં આવી છે.

કેન્દ્રીય મંત્રી અશ્વિની વૈષ્ણવે કહ્યું કે ખેડૂતોને તેમના ઉત્પાદન ખર્ચ પર અપેક્ષિત માર્જિન બાજરી (63%) ના કિસ્સામાં સૌથી વધુ હોવાનો અંદાજ છે, ત્યારબાદ મકાઈ (59%), તુવેર (59%) અને અડદ (53%) આવે છે. બાકીના પાક માટે, ખેડૂતોને તેમના ઉત્પાદન ખર્ચ પર માર્જિન 50% હોવાનો અંદાજ છે.

MISS ચાલુ રાખવાની મંજૂરી

નાણાકીય વર્ષ 2025-26 માટે સુધારેલી વ્યાજ સબસિડી યોજના (MISS) હેઠળ વ્યાજ સબસિડી (IS) ઘટક ચાલુ રાખવાને મંજૂરી આપવામાં આવી છે અને જરૂરી ભંડોળ વ્યવસ્થાને મંજૂરી આપવામાં આવી છે. અત્રે ઉલ્લેખનીય છે કે, MISS એ કેન્દ્રીય ક્ષેત્રની યોજના છે, જેનો ઉદ્દેશ્ય કિસાન ક્રેડિટ કાર્ડ (KCC) દ્વારા ખેડૂતોને સસ્તા વ્યાજ દરે ટૂંકા ગાળાની લોન ઉપલબ્ધ કરાવવાનો છે.

આ યોજના હેઠળ, ખેડૂતોને કિસાન ક્રેડિટ કાર્ડ (KCC) દ્વારા 7 % ના રાહત દરે 3 લાખ રૂપિયા સુધીની ટૂંકા ગાળાની લોન મળે છે, જેમાં લાયક ધિરાણ આપતી સંસ્થાઓ 1.5 % વ્યાજ સબસિડી પૂરી પાડે છે. વધુમાં, જે ખેડૂતો સમયસર લોન ચૂકવે છે તેઓ પ્રોમ્પ્ટ રિપેમેન્ટ ઇન્સેન્ટિવ (PRI) તરીકે 3 % સુધીના પ્રોત્સાહનો માટે પાત્ર છે, જે KCC લોન પરના તેમના વ્યાજ દરને અસરકારક રીતે 4 % સુધી ઘટાડે છે.

દેશના વિભિન્ન પ્રાંતના સમાચાર જાણવા માટે આપ અમારા ટોપિક પર ક્લિક કરો.