ઇઝરાયલના PM નેતન્યાહૂની ભારતનો દુશ્મન દેશ કરાશે ધરપકડ ? 37 ઇઝરાયલી અધિકારીઓ સામે તુર્કીએ વોરંટ જાહેર કર્યું

તુર્કીએ ઇઝરાયલી વડા પ્રધાન બેન્જામિન નેતન્યાહૂ સહિત 37 ઇઝરાયલી અધિકારીઓ સામે નરસંહાર અને માનવતા વિરુદ્ધ ગુનાઓના આરોપસર ધરપકડ વોરંટ જાહેર કર્યા છે. તુર્કી સરકારના જણાવ્યા મુજબ, ગાઝા પટ્ટીમાં થયેલી હિંસા અને નાગરિકો પરના હુમલાઓને લઇને આ કાર્યવાહી હાથ ધરવામાં આવી છે. ઇઝરાયલે આ આરોપોને “પ્રચારનો ભાગ” ગણાવીને નકારી કાઢ્યા છે, જ્યારે હમાસે તુર્કીના આ નિર્ણયનું સ્વાગત કર્યું છે.

તુર્કી દ્વારા જાહેર કરાયુ લિસ્ટ

તાજેતરમાં ઇઝરાયલ અને હમાસ વચ્ચે યુદ્ધવિરામ લાગુ થયા બાદ તુર્કી દ્વારા લેવામાં આવેલ આ પગલું આંતરરાષ્ટ્રીય સ્તરે ચર્ચાનો વિષય બન્યું છે. ઇસ્તંબુલના પ્રોસિક્યુટર ઓફિસે જાહેર કર્યું કે ધરપકડ વોરંટમાં ઇઝરાયલના સંરક્ષણ પ્રધાન ઇઝરાયલ કાત્ઝ, રાષ્ટ્રીય સુરક્ષા પ્રધાન ઇટામાર બેન ગ્વીર અને આર્મી ચીફ લેફ્ટનન્ટ જનરલ ઇયાલ ઝમીર જેવા વરિષ્ઠ અધિકારીઓનો પણ સમાવેશ થાય છે. તુર્કી દ્વારા જાહેર કરાયેલી સંપૂર્ણ યાદી હજી જાહેર કરાઈ નથી.

તુર્કી સરકારે ઇઝરાયલ પર ગાઝામાં “વ્યવસ્થિત નરસંહાર અને માનવતા વિરુદ્ધ ગુનાઓ” કરવાના ગંભીર આરોપો લગાવ્યા છે. નિવેદનમાં જણાવાયું છે કે “તુર્કી-પેલેસ્ટાઇન ફ્રેન્ડશીપ હોસ્પિટલ” પર માર્ચ મહિનામાં થયેલા ઇઝરાયલી હુમલાને પણ તપાસનો ભાગ બનાવવામાં આવ્યો છે.

આ પહેલાં પણ તુર્કીએ દક્ષિણ આફ્રિકા દ્વારા આંતરરાષ્ટ્રીય ન્યાય અદાલતમાં (ICJ) દાખલ કરાયેલા કેસને ટેકો આપ્યો હતો, જેમાં ઇઝરાયલ સામે નરસંહારના આરોપો મૂકવામાં આવ્યા હતા.

તુર્કીના આ પગલાને “રાજકીય સ્ટંટ” ગણાવ્યો

ઇઝરાયલી વિદેશ પ્રધાન ગિડિયોન સારએ તુર્કીના આ પગલાને “રાજકીય સ્ટંટ” ગણાવ્યો છે. તેમણે સોશિયલ મીડિયા પર લખ્યું કે, તુર્કીનું ન્યાયતંત્ર હવે માત્ર રાજકીય વિરોધીઓને દબાવવા માટે વપરાય છે. તેમણે ઇસ્તંબુલના મેયર એકરેમ ઇમામોગ્લુની ધરપકડનો ઉલ્લેખ કરીને તુર્કી સરકારની ટીકા પણ કરી હતી.

હમાસે આ ધરપકડ વોરંટને માનવતાવાદી પગલું ગણાવીને પ્રશંસા વ્યક્ત કરી છે. હમાસના નિવેદનમાં જણાવાયું કે, તુર્કીનું આ પગલું તેના લોકો અને નેતૃત્વની “ઉચ્ચ માનવતાવાદી મૂલ્યો”નું પ્રતિબિંબ છે.

ગાઝા શાંતિ યોજના અંગે ચર્ચા

આ ઘટના એવા સમયે બની છે જ્યારે મધ્યપૂર્વમાં અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ દ્વારા રજૂ કરાયેલ 20-મુદ્દાની ગાઝા શાંતિ યોજના અંગે ચર્ચા ચાલી રહી છે. આ યોજનાના ભાગરૂપે ગાઝામાં આંતરરાષ્ટ્રીય સ્થિરતા દળ (ISF) ની રચનાનો વિચાર પણ ચાલી રહ્યો છે. જોકે, અમેરિકાના ઉપપ્રમુખ જે.ડી. વાન્સે સ્પષ્ટ કર્યું છે કે ગાઝામાં કોઈપણ વિદેશી દળ તૈનાત કરવા માટે ઇઝરાયલની સંમતિ આવશ્યક રહેશે.

અમેરિકાના રાષ્ટ્રપતિ ડોનાલ્ડ ટ્રમ્પ આવશે ભારત ! કહ્યુ- PM મોદી મારા ખૂબ સારા મિત્ર