Pakistan: મુશ્કેલીમાં પડ્યા ઈમરાન ખાન, ચૂંટણી પંચે વિદેશી ફંડના દસ્તાવેજો સાર્વજનિક કરવાનો આપ્યો આદેશ
ઈસીપીની તપાસ સમિતિ તરફથી આ મહિનાની શરૂઆતમાં જાહેર એક રિપોર્ટ મુજબ પાકિસ્તાન તહરીક-એ-ઈન્સાફએ વિદેશી નાગરિકો, કંપનીઓ પાસેથી મેળવેલા પૈસાને ઓછા કરીને બતાવ્યા અને બેન્ક ખાતાઓને પણ છુપાવ્યા.
પાકિસ્તાનના ચૂંટણી પંચે (ECP) સત્તારૂઢ પાકિસ્તાન તહરીક-એ-ઈન્સાફ (Pakistan Tehreek-e-Insaf)ની વિરૂદ્ધ વિદેશી ફંડિગ મામલે (Pakistan Foreign Funding Case) જોડાયેલા મહત્વના દસ્તાવેજ સાર્વજનિક કરવાનો આદેશ આપ્યો છે. આ પગલુ વડાપ્રધાન ઈમરાન ખાન (Imran Khan) માટે ઘણી મુશ્કેલીઓ ઉભી કરી શકે છે. મીડિયામાં આવેલા એક અહેવાલમાં આ જાણકારી આપવામાં આવી છે. ઈસીપીની તપાસ સમિતિ તરફથી આ મહિનાની શરૂઆતમાં જાહેર એક રિપોર્ટ મુજબ પાકિસ્તાન તહરીક-એ-ઈન્સાફએ વિદેશી નાગરિકો, કંપનીઓ પાસેથી મેળવેલા પૈસાને ઓછા કરીને બતાવ્યા અને બેન્ક ખાતાઓને પણ છુપાવ્યા.
તેમાં કહેવામાં આવ્યું છે કે સત્તારૂઢ પાર્ટીએ નાણાકીય વર્ષ 2009-10થી નાણાકીય વર્ષ 2012-13 દરમિયાન 4 વર્ષના સમયમાં 31.2 કરોડ રૂપિયા ઓછા કરીને બતાવ્યા. વર્ષ મુજબની વિગતો દર્શાવે છે કે એકલા નાણાકીય વર્ષ 2012-13માં જ 14.5 કરોડથી વધુની રકમ ઓછી દર્શાવવામાં આવી હતી. ‘ડોન’ અખબારના અહેવાલ મુજબ આ દસ્તાવેજ આ તપાસ સમિતિની રિપોર્ટનો ભાગ હતા પણ રિપોર્ટની સાથે જાહેર કરવામાં નહતા આવ્યા.
અરજીકર્તાઓને રિપોર્ટ આપવો પડશે
મુખ્ય ચૂંટણી કમિશનર સિકન્દર સુલ્તાન રાજાએ મંગળવારે ત્યારે આદેશ પાસ કર્યો, જ્યારે અરજદારના વકીલે કહ્યું કે રિપોર્ટના કેટલાક મહત્વના ભાગોને ગુપ્ત રાખવામાં આવ્યા છે અને તેમના અસીલને ત્યાં સુધી પહોંચવા દેવામાં નથી આવ્યા. સમાચાર મુજબ સીઈસીએ નિર્દેશ આપ્યો હતો કે રિપોર્ટના કોઈપણ ભાગને ગોપનીય રાખવો જોઈએ નહીં અને સમગ્ર અહેવાલ અરજદારને પૂરો પાડવો જોઈએ.
વિપક્ષીદળોએ કરી આલોચના
તેમાં કહેવામાં આવ્યું કે ઈસીપીએ દસ્તાવેજોને સાર્વજનિક કર્યા નહતા, કારણ કે પીટીઆઈએ આ મામલે સતારૂઢ પાર્ટીના સંસ્થાપક સભ્ય અને અરજદાર અકબર એસ બાબરની સાથે દસ્તાવેજો શેર કરવા સામે વાંધો ઉઠાવ્યો હતો. પાકિસ્તાનના વિપક્ષી દળોએ આ ખુલાસા બાદ સત્તાધારી પાર્ટીની આલોચના કરી છે.
પાકિસ્તાન મુસ્લિમ લીગ-એન, પાકિસ્તાન પીપુલ્સ પાર્ટી અને પાકિસ્તાન ડેમોક્રેડિક મૂવમેન્ટે સરકારની આલોચના કરતા તપાસની માંગ કરી છે. સાથે જ વડાપ્રધાન ઈમરાન ખાનને ચોર ગણાવ્યા. પીએમએલ-એનની ઉપાધ્યક્ષ મરિયમ નવાજે કહ્યું કે ઈમરાન ખાને ના માત્ર ચોરી કરી અને છુપાઈ ગયા પણ લોકોના પૈસા પણ લુંટ્યા.
આ પણ વાંચો: અફઘાનિસ્તાનમાં પાકિસ્તાન વિરુદ્ધ લોકો રસ્તા પર ઉતર્યા, NSA મોઈદ યુસુફે ‘ડર’ના કારણે કાબુલની મુલાકાત રદ કરી
