આરએસએસના વડા મોહન ભાગવતે ન્યૂ યોર્કમાં આયોજિત ‘યુનિવર્સલ વનનેસ સેલિબ્રેશન’ કાર્યક્રમને સંબોધિત કર્યો હતો. તેમણે કહ્યું હતું કે, “હું તમારા બધાની જેમ ધાર્મિક વિદ્વાન નથી કે ધર્મનો કોઈ અધિકારી નથી. જોકે, હું એવા સમાજમાં કામ કરું છું જે પરંપરાગત રીતે માને છે કે ધર્મો અલગ અલગ હોઈ શકે છે, પણ માનવતા એક છે. સત્ય એક છે, અને માનવતા એ જ સત્યનું ઉત્પાદન છે.” તેમણે વધુમાં એમ પણ કહ્યું કે, જો કોઈ એવું માને છે કે ભારતમાં કોઈ મુસ્લિમો ના હોવા જોઈએ, તો તે વ્યક્તિ હિન્દુ નથી.

મોહન ભાગવતે કહ્યું, “જો તમે પોતાને હિન્દુ કહેવા માંગતા હો, તો તમારે એ સ્વીકારવું જોઈએ કે, બધા જ રસ્તા એક જ ગંતવ્ય તરફ દોરી જાય છે અને દરેક માનવીની ઈજ્જત અને આબરુ હોય છે. મનુષ્યોમાં કોઈ ફેર નથી. મેં એક વાર એક પ્રવચન આપ્યું હતું જ્યાં મુસ્લિમ ભાઈઓ પણ હાજર હતા, તેમણે મને એક પ્રશ્ન પૂછ્યો: ‘તમે એક હિન્દુ સંગઠન છો. તમે હિન્દુ રાષ્ટ્રની વાત કરો છો તો અમારા મુસ્લિમોનું શું ? શું તમે અમને હાંકી કાઢશો ?’ મેં જવાબ આપ્યો, ‘ના, તે હિન્દુત્વ નથી. જો કોઈ હિન્દુ વિચારે છે કે, ભારતમાં કોઈ મુસ્લિમ ના હોવા જોઈએ, તો તે હિન્દુ રહેતો નથી.'”

“રીત રિવાજ અંગે શિસ્ત પણ જરૂરી છે”

મોહન ભાગવતે પોતાના વક્તવ્યમાં ઉમેર્યું, “આજની દુનિયામાં, ધર્મો મોટાભાગે તેમની ધાર્મિક વિધિઓ દ્વારા ઓળખાય છે. ધાર્મિક શિસ્તનું પાલન કરવા અને દિવ્યતાના માર્ગ પર ચાલવા માટે ધાર્મિક વિધિઓની શિસ્ત જરૂરી છે, પરંતુ ધર્મનો સાચો હેતુ શું છે ? તે આપણને સત્ય તરફ દોરી જાય છે. તેથી, જો હું તે પ્રકાશ તરફ ઇશારો કરું છું, તો તમે મારી આંગળીની દિશા તરફ અને પછી પ્રકાશ તરફ જોશો. પરંતુ જો તમે ફક્ત મારી આંગળી પર જ સ્થિર રહેશો, તો તમને ક્યારેય પ્રકાશ દેખાશે નહીં. કહેવાનો ઉદ્દેશ્ય બીજે ક્યાંય રહેલો છે.” “તે પરમ સત્ય એટલે કે દિવ્યતા શોધવા વિશે છે, જેને આપણે વિવિધ નામોથી ઓળખીએ છીએ.”

“અમે યુદ્ધ રોકવા માંગીએ છીએ”

RSS વડાએ જણાવ્યું હતું કે, પાર્ટીનો હેતુ યુદ્ધ અટકાવવા અને રાજકારણને પ્રભાવિત કરવાનો છે. તેમણે કહ્યું, “અમે નીતિઓ ઘડાય તે પહેલાં જ તેમાં ફેરફાર લાવવા અને તેમને યોગ્ય દિશામાં લઈ જવા માંગીએ છીએ. અમે યુદ્ધ અટકાવવા અને આ બધા કાર્યો પૂર્ણ કરવા માંગીએ છીએ. તેથી જ અમે રાજકારણને સક્રિયપણે પ્રભાવિત કરવા માંગીએ છીએ. આપણે ક્યારેક કોઈક સમયે, આવું કરવું પડશે.”

“ભારતમાં બધા ધર્મો અને સમુદાયોના લોકો સાથે રહે છે”

મોહન ભાગવતે કહ્યું, “અમારો સમાજ અને દેશ વિદેશી આક્રમણોનો ભોગ બન્યા અને ખૂબ મોટું નુકસાન સહન કરવું પડ્યું, છતાં સામાન્ય લોકોને ‘એક વિશ્વ, એક માનવતા’નો સંદેશ શીખવતી પરંપરા હજુ પણ ટકી રહી છે. જો કે, કેટલાક બોજ અથવા ખ્યાલો છે જે લોકો બિનજરૂરી રીતે વહન કરે છે. ભારતમાં, બધા ધર્મો અને સમુદાયોના લોકો સાથે રહે છે કારણ કે, પરંપરાગત રીતે, ભારતે દરેકને આશ્રય આપ્યો છે.”

રાજકારણને સ્વાર્થની રમત તરીકે વર્ણવ્યું

તેમણે વધુમાં ઉમેર્યું, “રાજકારણ હવે સ્વાર્થનો ખેલ બની ગયું છે, અને જ્યાં માનસિકતા ‘હું અને મારું’ હોય છે, ત્યાં કોઈ ઉકેલ નથી. ‘આપણે અને આપણું’ એ વિચારે જ ઉકેલ છે. તેથી, ભારતમાં આપણો અનુભવ સૂચવે છે કે આપણે સમાજથી જ શરૂઆત કરવી જોઈએ, અને આપણે પહેલાથી જ આમ કરવાનું શરૂ કરી દીધું છે.”

ભાગવતે RSS વિશે ગેરસમજોનો ઉલ્લેખ કર્યો

મોહન ભાગવતે RSS વિશે લોકોમાં રહેલી ગેરસમજો વિશે પણ વાત કરી. તેમણે કહ્યું, “અમને બદલામાં કંઈ જોઈતું નથી. હું ફક્ત બીજાઓને કંઈક મેળવવાની અપેક્ષા સાથે ન આવવાનું કહેતો નથી. અમે સંઘમાં પોતે આનો અભ્યાસ કરીએ છીએ. અમે ફક્ત આપીએ છીએ. અમને કંઈ જોઈતું નથી. તેથી જ આપણે પ્રચાર-પ્રસારની દ્રષ્ટિએ નોંધપાત્ર રીતે પાછળ રહી ગયા છીએ. ખોટી વાતો અને ધારણાઓને કારણે વિવિધ ગેરસમજો ઊભી થઈ છે, પરંતુ જો તમે આવીને અમને નજીકથી અવલોકન કરો છો, તો તે બધી ગેરસમજો એક જ દિવસમાં દૂર થઈ જશે.”

USAના મેડિસન સ્ક્વેર ખાતે આરએસએસ વડા મોહન ભાગવતનુ સંબોધન-એકતા અને વિવિધતા ભારતના ડીએનએમાં છે