શ્રીલંકામાં સ્થિતિ બેકાબૂ, રાષ્ટ્રપતિ રાજપક્ષે 13 જુલાઈએ આપશે રાજીનામું, ગુસ્સે ભરાયેલા ટોળાએ PMના નિવાસસ્થાને આગ લગાવી, જાણો 10 મોટી ઘટના

શ્રીલંકા હાલમાં હિંસાની આગમાં સળગી રહ્યું છે. ગંભીર આર્થિક સંકટનો સામનો કરી રહેલા શ્રીલંકાની(Sri Lanka Economic Crisis) હાલત બહુ જ ખરાબ થઈ રહી છે. આંદોલનકારીઓએ સરકાર સામે ઉગ્ર દેખાવો કર્યા હતા. ગુસ્સે ભરાયેલા ટોળાએ પહેલા રાષ્ટ્રપતિ ગોટાબાયા રાજપક્ષેના (Gotabaya Rajapaksa)  નિવાસસ્થાન પર હુમલો કર્યો. ત્યારબાદ શ્રીલંકાના વડાપ્રધાન રાનિલ વિક્રમસિંઘેના (Ranil Wickremesinghe) ઘરને પણ નિશાન બનાવવામાં આવ્યું હતું. પ્રદર્શનકારીઓએ વડાપ્રધાન રાનિલ વિક્રમસિંઘેના નિવાસસ્થાને આગ લગાવી દીધી હતી. અત્રે ઉલ્લેખનીય છે કે વડાપ્રધાન વિક્રમસિંઘેએ રાજીનામું આપી દીધું છે. જ્યારે, 13 જુલાઈએ રાષ્ટ્રપતિ ગોટાબાયા પણ રાજીનામું આપશે.

1. શ્રીલંકાના રાષ્ટ્રપતિ ગોટાબાયા રાજપક્ષે 13 જુલાઈએ રાજીનામું આપશે. શ્રીલંકાની સંસદના સ્પીકર મહિન્દા યાપા અભયવર્દનેએ શનિવારે રાત્રે આ માહિતી આપી હતી. શનિવારે સાંજે યોજાયેલી સર્વપક્ષીય નેતાઓની બેઠક બાદ અભયવર્દનેએ રાજીનામા માટે પત્ર લખ્યા બાદ રાષ્ટ્રપતિ રાજપક્ષેએ સંસદના અધ્યક્ષને આ નિર્ણય વિશે જાણ કરી હતી. અભયવર્ધનેએ બેઠકમાં લેવાયેલા નિર્ણયો અંગે રાજપક્ષેને પત્ર લખ્યો હતો.
2. પક્ષના નેતાઓએ રાજપક્ષે અને વડા પ્રધાન રાનિલ વિક્રમસિંઘેના તાત્કાલિક રાજીનામાની હાકલ કરી હતી, જ્યાં સુધી સંસદના અનુગામીની નિમણૂક ના થાય ત્યાં સુધી અભયવર્દનેને રખેવાળ પ્રમુખ બનવાનો માર્ગ મોકળો કરવા માટે. વિક્રમસિંઘે પહેલા જ રાજીનામું આપવાની ઈચ્છા વ્યક્ત કરી ચૂક્યા છે. તેરાજપક્ષેએ અભયવર્ધનેના પત્રનો જવાબ આપતા કહ્યું કે તેઓ 13 જુલાઈએ પદ છોડી દેશે.
3. શ્રીલંકામાં શનિવારે પ્રદર્શનકારીઓએ રાષ્ટ્રપતિ ગોટાબાયા રાજપક્ષેના રાજીનામાની માંગ સાથે હંગામો મચાવ્યો હતો. રોષે ભરાયેલા ટોળાએ રાષ્ટ્રપતિ આવાસ પર કબજો જમાવ્યો હતો. આ પછી અહીં ભારે હોબાળો થયો હતો. પ્રદર્શનકારીઓ રાષ્ટ્રપતિના સત્તાવાર નિવાસસ્થાનમાં ઘૂસી ગયાના કલાકો બાદ વડા પ્રધાન રાનિલ વિક્રમસિંઘે રાજીનામું આપ્યું હતું.
4. રાનિલ વિક્રમસિંઘેના રાજીનામા બાદ શ્રીલંકામાં વધુ બે મંત્રીઓએ પણ રાજીનામું આપ્યું છે. જેમાં હરિન ફર્નાન્ડો અને માનુષા નાનાયક્કારાનું નામ સામેલ છે. વિક્રમસિંઘેએ રાજીનામું આપતા કહ્યું કે, “તેમણે નાગરિકોની સુરક્ષા સુનિશ્ચિત કરવા માટે આ નિર્ણય લીધો છે.” વિક્રમસિંઘેએ પાર્ટીના નેતાઓને કહ્યું કે તેઓ આ હકીકતને ધ્યાનમાં રાખીને પદ છોડવાનો નિર્ણય લઈ રહ્યા છે.
5. સુરક્ષાકર્મીઓ અને દેખાવકારો વચ્ચેની અથડામણમાં સાત સુરક્ષાકર્મીઓ સહિત ઓછામાં ઓછા 45 લોકો ઘાયલ થયા છે. સાથે જ એવું પણ કહેવામાં આવી રહ્યું છે કે રાષ્ટ્રપતિ ગોટાબાયા દેશ છોડીને ભાગી ગયા છે. હાલમાં તે ક્યાં છે તે જાણી શકાયું નથી. એવું કહેવામાં આવી રહ્યું છે કે શનિવારે યોજાયેલા વ્યાપક વિરોધને ધ્યાનમાં રાખીને રાષ્ટ્રપતિ ગોટાબાયા રાજપક્ષે તેમના સત્તાવાર નિવાસસ્થાનેથી નીકળી ગયા હતા.
6. શ્રીલંકામાં તમામ શાળાઓને 15 જુલાઈ સુધી બંધ રાખવાનો આદેશ કરવામાં આવ્યો છે. ચાર યુનિવર્સિટીઓ પણ હંગામી ધોરણે બંધ કરી દેવામાં આવી છે. દેશમાં વધી રહેલા આર્થિક સંકટથી કંટાળેલા વિરોધીઓ સતત રાષ્ટ્રપતિ ગોટાબાયા રાજપક્ષેના રાજીનામાની માંગ કરી રહ્યા છે. મોટી સંખ્યામાં રાષ્ટ્રપતિ વિરુદ્ધ પ્રદર્શન કરી રહેલા વિરોધીઓ તેમના સત્તાવાર નિવાસસ્થાનમાં પ્રવેશ્યા હતા અને હંગામો કર્યો હતો.
7. શ્રીલંકાના વડા પ્રધાન રાનિલ વિક્રમસિંઘેના નિવાસસ્થાનની બહાર સુરક્ષા દળો દ્વારા ચાર પત્રકારો પર હુમલો કરવામાં આવ્યો હતો, જેમાં તેઓ ઘાયલ થયા હતા. તમામ પત્રકારોને હોસ્પિટલમાં દાખલ કરવામાં આવ્યા છે. વડાપ્રધાનના આવાસની બહારની સ્થિતિ ચિંતાજનક છે. ગુસ્સે ભરાયેલા ટોળાએ સુરક્ષાકર્મીઓ પર હુમલો કર્યો અને તેમના પર પથ્થરમારો કર્યો. સુરક્ષા જવાનોએ પણ જવાબી કાર્યવાહી કરી હતી, જેમાં 4 પત્રકારો ઘાયલ થયા હતા.
8. ઘાયલ પત્રકારો પર દુખ વ્યક્ત કરતા રાનિલ વિક્રમસિંઘેએ કહ્યું કે શ્રીલંકામાં લોકશાહી માટે મીડિયાની સ્વતંત્રતા સર્વોપરી છે. પીએમ રાનિલ વિક્રમસિંઘેએ વિરોધીઓ અને સુરક્ષા દળો બંનેને હિંસા રોકવા અને નાગરિકોની સુરક્ષા સુનિશ્ચિત કરવાની અપીલ કરી છે.
9. હકીકતમાં, રાષ્ટ્રપતિ ગોટાબાયા રાજપક્ષે માર્ચથી રાજીનામું આપવા દબાણનો સામનો કરી રહ્યા હતા. તેઓ રાષ્ટ્રપતિ ભવનનો ઉપયોગ તેમના નિવાસસ્થાન અને કાર્યાલય તરીકે કરી રહ્યા હતા કારણ કે વિરોધીઓએ એપ્રિલની શરૂઆતમાં તેમની ઓફિસના પ્રવેશદ્વાર પર કબજો કરવા માટે કૂચ કરી હતી.
10. અત્રે ઉલ્લેખનીય છે કે શ્રીલંકા અભૂતપૂર્વ આર્થિક ઉથલપાથલનો સામનો કરી રહ્યું છે. 22 કરોડની વસ્તી ધરાવતો દેશ સાત દાયકાના સૌથી ખરાબ તબક્કામાંથી પસાર થઈ રહ્યો છે. શ્રીલંકામાં વિદેશી હૂંડિયામણની અછત છે, જેના કારણે દેશ ઇંધણ અને અન્ય આવશ્યક ચીજવસ્તુઓની આયાત માટે ચૂકવણી કરવામાં અસમર્થ છે.