ભૂખમરા ભેગુ થઈ રહ્યુ છે પાકિસ્તાન, સરકાર પાસે માત્ર ત્રણ સપ્તાહ ચાલે એટલા જ છે પૈસા

ડિફોલ્ટર બનવાની આરે ઉભેલા પાકિસ્તાનનું વિદેશી મુદ્રા ભંડાર છેલ્લા 8 વર્ષમાં સૌથી નીચા સ્તરે આવી ગયું છે. એક મીડિયા રિપોર્ટ મુજબ પાકિસ્તાનનો વિદેશી મુદ્રા ભંડાર લગભગ 5 બિલિયન ડોલર પર આવી ગયો છે, જે છેલ્લા 8 વર્ષમાં સૌથી ઓછો છે. પાકિસ્તાનની શાહબાઝ શરીફ સરકાર દેશની અર્થવ્યવસ્થાને મજબૂત કરવાનો પ્રયાસ કરી રહી છે, તેમ છતાં પાકિસ્તાનના વિદેશી મુદ્રા ભંડારમાં ભારે ઘટાડો થયો હોવાના અહેવાલો છે. પાકિસ્તાનના અહેવાલ મુજબ, 30 ડિસેમ્બર, 2022 ના રોજ પૂરા થયેલા સપ્તાહ દરમિયાન સ્ટેટ બેંક ઓફ પાકિસ્તાન (SBP)નું ફોરેક્સ રિઝર્વ ઘટીને 5.576 બિલિયન ડોલર 8 વર્ષની નીચી સપાટીએ પહોંચી ગયું છે. પાકિસ્તાન મોટા વિદેશી દેવામાં ડૂબી ગયું છે. સપ્તાહ દરમિયાન, સ્ટેટ બેંક ઓફ પાકિસ્તાને તેનું 245 બિલિયન ડોલરનું વિદેશી દેવું ચૂકવ્યું અને તેના કારણે ફોરેક્સ રિઝર્વમાં મોટો ઘટાડો થયો.

પાકિસ્તાનની PMLNની આગેવાની હેઠળની ગઠબંધન સરકાર સામે હાલમાં સૌથી મોટો આર્થિક પડકાર વિદેશી દેવું ચૂકવવાનો છે. પાકિસ્તાને ચીન, સાઉદી અરેબિયા, યુનાઈટેડ અરબ અમીરાત, વર્લ્ડ બેંક, ઈન્ટરનેશનલ મોનેટરી ફંડ પાસેથી લોન લીધી છે, પરંતુ હવે તેની પાસે વિદેશી દેવું ચૂકવવા માટે પૂરતા પૈસા નથી.

IMFને વારંવાર મદદ માટે વિનંતી કરી

પાકિસ્તાન સતત પ્રયત્ન કરી રહ્યું છે કે IMF મદદનો આગામી હપ્તો આપે, પરંતુ હજુ સુધી કંઈ થયું નથી. શુક્રવારે જ સમાચાર આવ્યા કે પાકિસ્તાનના વડાપ્રધાન શહેબાઝ શરીફે IMF ચીફ ક્રિસ્ટાલિના જ્યોર્જિવા સાથે ફોન પર વાત કરી હતી. સૂત્રોએ જણાવ્યું હતું કે વાટાઘાટો દરમિયાન, શહેબાઝ શરીફે IMFના વડાને ફરી એકવાર આગામી હપ્તા અંગે નવા ટેક્સની શરત પર વિચાર કરવા વિનંતી કરી હતી. ચાર દિવસ પછી, શહેબાઝ શરીફ પૂર પીડિતો માટે જીનીવા કોન્ફરન્સ બાદ IMFના વડાને મળવા જઈ રહ્યા છે. પાકિસ્તાની સમાચાર પત્ર ડોન મુજબ, આગામી તબક્કાને રિલીઝ કરવા માટે IMF સાથે ફરીથી વાતચીત શરૂ કરવાના ઘણા પ્રયાસો અત્યાર સુધી નિષ્ફળ ગયા છે.

પાકિસ્તાની રૂપિયાની હાલત નબળી

પાકિસ્તાનના ઘટતા વિદેશી મુદ્રા ભંડારને કારણે પાકિસ્તાની રૂપિયાનું ભારે અવમૂલ્યન થયું છે. જાન્યુઆરી 2022માં સ્ટેટ બેંક ઓફ પાકિસ્તાનની વિદેશી હૂંડિયામણની અનામત 16.6 બિલિયન ડોલર હતી, જે પછીના મહિનામાં વધીને 11 બિલિયન ડોલર થઈ અને હવે 5.576 બિલિયન ડોલર થઈ ગઈ છે. આટલા વિદેશી મુદ્રા ભંડાર સાથે પાકિસ્તાન હવે માત્ર ત્રણ અઠવાડિયા માટે જ વિદેશથી આયાત કરી શકશે.

ડૉલર ગુરુવારે 17 પૈસાના વધારા સાથે 227.12 પાકિસ્તાની રૂપિયા પર બંધ થયો

પાકિસ્તાન ડિફોલ્ટર બનવાની આરે છે, પરંતુ રાજકારણીઓ લોકોને ખાતરી આપવાનો પ્રયાસ કરી રહ્યા છે કે આવનારા દિવસોમાં સ્થિતિ વધુ સારી થશે. નાણામંત્રી ઈશાક ડાર કહી રહ્યા છે કે મિત્ર દેશો પાકિસ્તાનને આર્થિક મદદ કરી રહ્યા છે અને પરિસ્થિતિ જલ્દી બદલાઈ જશે.

સિલિન્ડરના ભાવ આસમાને

પાકિસ્તાનની સ્થિતિ હવેથી કાબૂ બહાર થતી જણાઈ રહી છે. પાકિસ્તાનમાં ગેસ સિલિન્ડરના ભાવ આસમાને છે. એક ગેસ સિલિન્ડર 10,000 રૂપિયા સુધી વેચાઈ રહ્યો છે. ખાદ્ય ચીજવસ્તુઓના ભાવમાં પણ આગ લાગી છે. સબસિડીવાળા લોટની ઝપાઝપીમાં એક માણસે પણ જીવ ગુમાવ્યો. જો પાકિસ્તાનને વહેલી તકે આર્થિક મદદ નહીં મળે તો હોબાળો થવાની સ્થિતિ સર્જાઈ શકે છે.