ભાગેડુ ઉદ્યોગપતિ ચોકસી ભારત પરત ફરશે ! આ દિવસથી પ્રત્યાર્પણની કાર્યવાહી થશે શરુ

પંજાબ નેશનલ બેંકના 13,000 કરોડ રૂપિયાના છેતરપિંડી કેસમાં વોન્ટેડ ભાગેડુ હીરા વેપારી મેહુલ ચોક્સી સામે પ્રત્યાર્પણની કાર્યવાહી સોમવારે બેલ્જિયમની કોર્ટમાં શરૂ થવાની શક્યતા છે. કોર્ટમાં સુનાવણી બેલ્જિયમના ફેડરલ પ્રોસિક્યુટર્સ દ્વારા CBI અને ભારતના વિદેશ મંત્રાલયના સહયોગથી હાથ ધરવામાં આવશે.

ચોક્સી 2023 થી બેલ્જિયમમાં રહે છે

અધિકારીઓએ જણાવ્યું હતું કે મેહુલ ચોક્સી 2023 થી બેલ્જિયમમાં રહે છે. તે સારવાર માટે એન્ટિગુઆ અને બાર્બુડાથી આ યુરોપિયન દેશમાં ગયો હતો. તેની પત્ની બેલ્જિયમની નાગરિક છે.

તેમણે કહ્યું કે જાન્યુઆરી 2024 માં CBI ને બેલ્જિયમમાં તેની હાજરી વિશે જાણ કરવામાં આવી હતી, ત્યારબાદ ભારતે 2020 માં સંધિ પર હસ્તાક્ષર કરેલા યુરોપિયન દેશને પ્રત્યાર્પણ વિનંતી મોકલવામાં આવી હતી. આ વ્યવસ્થા હેઠળ આ પહેલો કેસ છે.

ચોક્સીની બેલ્જિયમમાં ધરપકડ

ભારતની વિનંતીના આધારે આ વર્ષે એપ્રિલમાં ચોક્સીની ધરપકડ કરવામાં આવી હતી. ત્યારબાદ તેની જામીન અરજીઓ તે દેશની વિવિધ અદાલતો દ્વારા ફગાવી દેવામાં આવી છે.

સીબીઆઈએ આ કેસમાં મદદ કરવા માટે પ્રત્યાર્પણ કાયદામાં નિષ્ણાત યુરોપિયન કાયદા પેઢીની પણ નિમણૂક કરી છે. જરૂરી માહિતી, દસ્તાવેજો અથવા મંતવ્યો પ્રદાન કરવા માટે સીબીઆઈ અધિકારીઓની એક ટીમ પણ હાજર રહેશે.

ચોક્સી સામે ઘણા બધા દસ્તાવેજો રજૂ કરવામાં આવ્યા છે

એજન્સીએ તેની વિરુદ્ધ ઘણા દસ્તાવેજો બેલ્જિયમના અધિકારીઓને સુપરત કર્યા છે, જે દર્શાવે છે કે ભારતમાં તેની સામે લગાવવામાં આવેલા આરોપો તે યુરોપિયન દેશમાં પણ સજાપાત્ર છે. આ બેવડી ગુનાહિતતાનો કેસ છે, જે સંધિ હેઠળ પ્રત્યાર્પણ માટે યોગ્ય કેસ બનાવે છે.