પાકિસ્તાનથી UAE ના રસ્તે ભારત મોકલાયેલો 3 કરોડ રૂપિયાનો ખજૂરનો જથ્થો જપ્ત, DRI ની મોટી કાર્યવાહી – જુઓ VIDEO

પાકિસ્તાનથી ભારતમા પ્રતિબંધિત સામાન લાવવાના પ્રયાસનો મહેસૂલ ગુપ્તચર નિયામક (DRI) એ મોટો પર્દાફાશ કર્યો છે. DRI એ કંડલા પોર્ટ પર 13 કન્ટેનર પકડ્યા છે. આ કન્ટેનરોમાં લગભગ 364 મેટ્રિક ટન સૂકો ખજૂર (ખારેક) હતો, જેની કિંમત આશરે રૂ. 3 કરોડ બતાવવામાં આવી રહી છે.

તપાસમાં સામે આવ્યું છે કે કાગળોમાં આ સામાન યુએઈ (UAE) નો હોવાનું દર્શાવવામાં આવ્યું હતું, પરંતુ વાસ્તવમાં આ ખજૂર પાકિસ્તાનથી લાવવામાં આવ્યો હતો. DRI ના જણાવ્યા મુજબ, પહેલા આ સામાન પાકિસ્તાનથી દુબઈ મોકલવામાં આવ્યો હતો. ત્યારબાદ દુબઈમાં તેને બીજા કન્ટેનરોમાં શિફ્ટ કરવામાં આવ્યો અને પછી ભારત મોકલી દેવાયો હતો.

આરોપ છે કે ભારતમાં પ્રતિબંધિત પાકિસ્તાની સામાન લાવવા માટે સામાનના અસલી મૂળ દેશ એટલે કે પાકિસ્તાનની માહિતી છુપાવવામાં આવી હતી અને ખોટા દસ્તાવેજોનો ઉપયોગ કરવામાં આવ્યો હતો. DRI એ પૂરા 364 મેટ્રિક ટન સામાનને કસ્ટમ્સ એક્ટ હેઠળ જપ્ત કરી લીધો છે.

ગૂગળ રેઝિનની તસ્કરી પણ પકડાઈ

DRI એ ગયા અઠવાડિયે પણ પાકિસ્તાનથી ભારત લાવવામાં આવી રહેલો આશરે 14 મેટ્રિક ટન ગૂગળ રેઝિન (Guggul Resin) નો જથ્થો ઝડપ્યો હતો. જેની કિંમત લગભગ રૂ. 1.4 કરોડ હતી. આ સામાનને કાગળોમાં સોમાલિયાનો નેચરલ રેઝિન બતાવવામાં આવ્યો હતો અને તેને પણ દુબઈના રસ્તે ભારત લાવવામાં આવ્યો હતો.

તપાસમાં જાણવા મળ્યું કે વાસ્તવમાં આ પાકિસ્તાનનો ગૂગળ રેઝિન હતો અને તેને બોગસ દસ્તાવેજો દ્વારા ભારત મોકલવામાં આવ્યો હતો. આ મામલે બે લોકોની ધરપકડ પણ કરવામાં આવી છે.

પાકિસ્તાનથી સામાનની આયાત પર પ્રતિબંધ

ઉલ્લેખનીય છે કે 2 મે 2025 થી પાકિસ્તાનમાં બનેલા અથવા પાકિસ્તાનથી નિકાસ કરાયેલા તમામ સામાનની સીધી કે કોઈ ત્રીજા દેશ મારફતે ભારતમાં આયાત કે ટ્રાન્ઝિટ પર પ્રતિબંધ મુકાયેલો છે. DRI ના જણાવ્યા અનુસાર, બંને કિસ્સાઓમાં આ પ્રતિબંધનું ઉલ્લંઘન કરવામાં આવ્યું હતું. DRI હવે આ સમગ્ર નેટવર્ક સાથે જોડાયેલા લોકો અને ભારતમાં પ્રતિબંધિત પાકિસ્તાની સામાન પહોંચાડવાની પદ્ધતિઓની ઊંડાણપૂર્વક તપાસ કરી રહી છે.

જુઓ VIDEO

Vedanta Real Estate: વેદાન્તા બનાવશે નવી કંપની, 2200 એકર જમીનવાળો રિયલ એસ્ટેટ બિઝનેસ થશે અલગ