Breaking News: માનવાના મૂડમાં નથી રશિયા, યુક્રેનની રાજધાની પર 600 ડ્રોન સાથે કર્યો સૌથી મોટો હુમલો, સેંંકડો ઘરો થયા તબાહ

રશિયાએ રવિવારે વહેલી સવારે યુક્રેનની રાજધાની કિવ પર મોટો હુમલો કર્યો. 600 થી વધુ ડ્રોન અને મિસાઇલો છોડવામાં આવ્યા, જેના કારણે સમગ્ર શહેરમાં અરાજકતા ફેલાઈ ગઈ. આ હુમલો લગભગ 12 કલાક સુધી ચાલ્યો અને આને કિવ પરના સૌથી મોટા હુમલાઓમાંનો એક માનવામાં આવે છે.

595 ડ્રોન અને 48 મિસાઇલો છોડવામાં આવી

યુક્રેનિયન સૈન્યએ અહેવાલ આપ્યો છે કે, રશિયાએ 595 ડ્રોન અને 48 મિસાઇલો છોડ્યા, જેમાંથી 568 ડ્રોન અને 43 મિસાઇલો તોડી પાડવામાં આવી. રાજધાની અને અન્ય વિસ્તારોમાં નુકસાન થયું. હુમલામાં ચાર લોકો માર્યા ગયા અને 67 થી વધુ લોકો ઘાયલ થયા.

મૃતકોમાં 12 વર્ષની એક છોકરી હોવાની આશંકા છે. હુમલાને કારણે પડોશી પોલેન્ડને પણ હાઇ એલર્ટ પર રાખવામાં આવ્યું હતું, તેના દક્ષિણપૂર્વીય શહેરો નજીક એરસ્પેસ બંધ કરી દેવામાં આવ્યું હતું અને તેના વાયુસેનાના ફાઇટર જેટે ઉડાન ભરી હતી. રાષ્ટ્રપતિ વોલોડીમીર ઝેલેન્સકીએ જણાવ્યું હતું કે, આ હુમલામાં રાજધાની સહિત ઉત્તર, મધ્ય અને દક્ષિણના અનેક વિસ્તારોને નિશાન બનાવવામાં આવ્યા હતા.

ઘરો સંપૂર્ણપણે નાશ પામ્યા

Zaporizhzhia શહેરમાં 16 થી વધુ લોકો ઘાયલ થયા હતા અને અનેક ફેક્ટરીઓ તેમજ ત્યાંના ઘરોને નુકસાન થયું હતું. કિવમાં ઘણા ઘરો સંપૂર્ણપણે નાશ પામ્યા હતા અને ઘણા વાહનો કાટમાળ નીચે દટાઈ ગયા હતા. ઝેલેન્સકીએ યુનાઇટેડ સ્ટેટ્સ, યુરોપ, G-7 અને G-20 દેશોને કડક વલણ અપનાવવા વિનંતી કરી. હુમલા દરમિયાન લોકોએ કલાકો સુધી મેટ્રો સ્ટેશનોમાં આશ્રય લીધો હતો. હવાઈ હુમલાની ચેતવણી સવારે 9:13 વાગ્યે સમાપ્ત થઈ હતી.