Breaking News : લોકો આશ્ચર્યમાં: ‘પાણી પર રોડ’ બનાવવાની આ અદભુત ટેકનોલોજી રાધનપુર તંત્ર લાવ્યું ક્યાંથી? જુઓ Video
રાધનપુરના મસાલી રોડ પર ઘૂંટણસમા પાણી ભરાયેલા હોવા છતાં રોડ બનાવવાની કામગીરી ચાલી રહી છે, જેના પર અનેક ગંભીર સવાલો ઉભા થયા છે. કોન્ટ્રાક્ટરની બેદરકારી અને રોડની ગુણવત્તા સામે ભ્રષ્ટાચારના આક્ષેપો થયા છે. કોંગ્રેસ અને ભાજપના કાર્યકરો આ મુદ્દે આક્ષેપ-પ્રતિઆક્ષેપ કરી રહ્યા છે, જ્યારે પ્રશાસન પર મીઠી નજર રાખવાનો આરોપ.
ગુજરાતના પાટણ જિલ્લાના રાધનપુરમાંથી એક વિવાદાસ્પદ ઘટના સામે આવી છે, જ્યાં ભારે વરસાદને કારણે મસાલી રોડ, વોર્ડ નંબર 7 પર ઘૂંટણસમા પાણી ભરાયેલા હોવા છતાં રોડ બનાવવાની કામગીરી અવિરતપણે ચાલુ રાખવામાં આવી છે. અહેવાલ પ્રસારિત થતા સ્થાનિક તંત્ર, ખાસ કરીને આર.એન.બી. (રોડ્સ એન્ડ બિલ્ડીંગ્સ) વિભાગ અને સંબંધિત કોન્ટ્રાક્ટરની કાર્યશૈલી પર ગંભીર પ્રશ્નાર્થ ઊભા થાય
પાણી ભરાયેલા માર્ગ પર રોડ બનાવવાની આ કામગીરી
અહેવાલ મુજબ પાણી ભરાયેલા માર્ગ પર રોડ બનાવવાની આ કામગીરી “બુદ્ધિનું પ્રદર્શન” હોવાનું કહીને તંત્રની બેદરકારીની ટીકા કરવામાં આવી રહી છે. આવા સંજોગોમાં બનેલા રોડની ગુણવત્તા અને ટકાવપણું અંગે વ્યાપક ચિંતા વ્યક્ત કરાઈ છે. પાણીમાં માર્ગ નિર્માણ કરવાથી ડામર અને કપચીનું યોગ્ય મિશ્રણ થતું નથી, જેના કારણે રોડ ઝડપથી તૂટી પડવાની શક્યતા રહે છે અને પ્રજાના પૈસાનો દુર્વ્યય થાય છે.
સાત કરોડ રૂપિયાનો રોડ પ્રોજેક્ટ
આ મામલે રાજકીય આક્ષેપ-પ્રતિઆક્ષેપ પણ શરૂ થયા છે. કોંગ્રેસના નેતા જયાબેન પટેલે આ કામગીરીને “પૂરેપૂરો ભ્રષ્ટાચાર” ગણાવ્યો છે. તેમણે જણાવ્યું કે, આ સાત કરોડ રૂપિયાનો રોડ પ્રોજેક્ટ છે અને તેમાં આર.એન.બી. વિભાગના કાર્યપાલક ઇજનેર અને વર્ક અધિકારીઓ તેમજ નગરપાલિકાના પદાધિકારીઓ પણ સંડોવાયેલા છે. જયાબેને આરોપ મૂક્યો કે આ કામગીરી પ્રશાસનની “મીઠી નજર” હેઠળ થઈ રહી છે અને સ્થાનિક પ્રશાસન દ્વારા તેમની રજૂઆતો છતાં કોઈ કાર્યવાહી કરવામાં આવી નથી. તેમણે વધુમાં જણાવ્યું કે રાધનપુરમાં ગટરો ઉભરાતી હોવાને કારણે પાણી ભરાય છે અને આ ગટરના પાણીમાં જ રોડ બનાવવામાં આવી રહ્યો છે. અગાઉ બનેલા કેટલાક રોડ પંદર દિવસમાં જ તૂટી ગયા હોવાના દાખલા પણ તેમણે ટાંક્યા.
હવનમાં હાડકા હોમવા” જેવું કામ
બીજી તરફ, ભાજપના કાર્યકર જ્યોતિબેન જોષીએ આ આરોપોને સદંતર ખોટા ગણાવ્યા છે. તેમણે દાવો કર્યો કે તેઓ પોતે સ્થળ પર હાજર રહીને કામગીરી પર સતત દેખરેખ રાખી રહ્યા છે અને પાણી કાઢીને જ રોડ બનાવવામાં આવ્યો છે. જ્યોતિબેને કોંગ્રેસ પર વિકાસના કામોમાં અવરોધ ઊભો કરવાનો અને “હવનમાં હાડકા હોમવા” જેવું કામ કરવાનો આરોપ મૂક્યો હતો. તેમણે જણાવ્યું કે રોડ અને ગટરનું કામ આર.એન.બી.નું છે જ્યારે સાફ-સફાઈ નગરપાલિકાના કાર્યક્ષેત્રમાં આવે છે. જોકે, બંને પક્ષો દ્વારા પોતાના દાવાઓ પ્રસ્તુત કરવામાં આવ્યા છે, પરંતુ ઘટનાસ્થળના વાયરલ થયેલા દ્રશ્યો પાણી ભરાયેલા વિસ્તારોમાં કામગીરી ચાલુ હોવાનું સ્પષ્ટપણે દર્શાવે છે.
આ સમગ્ર વિવાદ રાધનપુરના વિકાસના કામોની ગુણવત્તા અને પારદર્શિતા પર મોટો સવાલ ઊભો કરે છે. ચોમાસાની શરૂઆત થઈ રહી છે ત્યારે આવા નબળા રોડ ભવિષ્યમાં નાગરિકો માટે વધુ મુશ્કેલી ઊભી કરી શકે છે. પ્રશાસન દ્વારા તાત્કાલિક ધોરણે આ મામલે તપાસ કરી યોગ્ય કાર્યવાહી કરવામાં આવે તે અત્યંત આવશ્યક છે, જેથી પ્રજાના ટેક્સના પૈસાનો સદુપયોગ થાય અને તેમને ગુણવત્તાયુક્ત માળખાકીય સુવિધાઓ મળી રહે.
Snake Plant Vastu Tips: સ્નેક પ્લાન્ટ ઘરમાં રાખતા પહેલાં ચેતી જજો! જો ખોટી દિશામાં રાખ્યો તો ફાયદાને બદલે થશે મોટું નુકસાન આ સ્ટોરી વાંચવા અહીં ક્લિક કરો
