સુરતમાં રખડતા ઢોર પર કાબુ મેળવવા મનપા એક્શનમાં, રખડતા ઢોરને RFID લગાડવાની પ્રક્રિયા ઝડપી બનાવાઇ
Surat News : ગુજરાત સરકારે રખડતા પ્રાણીઓને કાબૂમાં લેવા માટે વિડિયો કોન્ફરન્સમાં RFID લગાવીને દરેક પ્રાણીની નોંધણી કરવાની સલાહ આપી છે. ત્યારે સુરત મનપા આ મામલે એક્શનમાં આવી છે.
સુરત શહેરમા ખડતા પશુઓના અત્યાચારથી છુટકારો મેળવવા માટે સુરત મહાનગરપાલિકા દ્વારા લાંબા સમયથી કાર્યવાહી કરવામાં આવી રહી છે. સાથે ગુજરાત સરકારે રખડતા પ્રાણીઓને કાબૂમાં લેવા માટે વિડિયો કોન્ફરન્સમાં RFID લગાવીને દરેક પ્રાણીની નોંધણી કરવાની સલાહ આપી છે. સરકારના આ સૂચન બાદ સુરત મહાનગર પાલિકાએ RFID લગાવવાની પ્રક્રિયા ઝડપી બનાવી છે. ગુજરાતમાં સૌથી વધુ ચીપ સુરત પાલિકા દ્વારા લગાવામાં આવી.
મનપાની ઢોરમાં RFID લગાવડાવવા પશુપાલકોને અપીલ
31 માર્ચ પછી ફરજિયાત ચીપિંગ ફી પણ વસૂલવામાં આવશે. સરકારે 31 માર્ચ, 2023 પહેલા તમામ પશુપાલકોના ઢોરની મફત ચીપીંગ માટે જાહેર નોટિસ બહાર પાડી છે. 31 માર્ચ પછી, RFID ચિપિંગ ફરજિયાત કરવામાં આવશે અને તે પછી નિર્ધારિત રકમ પણ એકત્રિત કરવામાં આવશે. આથી મહાનગરપાલિકા દ્વારા પશુપાલકોને અપીલ કરવામાં આવી છે કે આ પહેલા ઢોરમાં RFID લગાવી દેવામાં આવે.
રખડતા પશુઓ પર અંકુશ મેળવવા સુરત પાલિકા સતર્ક
સુરતમાં એક પછી એક રખડતા પશુઓના કારણે અકસ્માતના બનાવો સામે આવી રહ્યા છે. જેને ધ્યાનમાં રાખીને રાજ્ય સરકારે પણ આ મુદ્દાને ખૂબ જ ગંભીરતાથી લીધો છે. જે બાદ રખડતા પશુઓને અંકુશમાં લેવા માટે પાલિકાને આદેશ આપવામાં આવ્યો છે, જે અંતર્ગત સુરત શહેરમાં અંદાજે 60 હજાર ઢોર છે, જેમાંથી 40 હજારથી વધુ પશુઓને ચીપ લગાવવાની દેવામાં આવ્યા છે. કેટલીક જગ્યાએ પાલિકાની ટીમ સાથે માથાકૂટ પણ થતી હોય છે, છતાં પણ પાલિકા દ્વારા સતત કામગીરી કરવામાં આવી રહી છે.
ગુજરાતમાં રખડતા ઢોરના આતંકની અનેક ઘટનાઓ
મહત્વનું છે કે સુરત સહિત સમગ્ર ગુજરાતમાં રખડતા ઢોરનો આતંક વધી રહ્યો છે. રખડતા ઢોરે અડફેટે લેતા અકસ્માત થવાની અને મોત થવાની એક પછી એક ઘટનાઓ સામે આવી રહી છે. આજે પણ ગાંધીનગરના દહેગામમાં રખડતા ઢોરે 7 વર્ષના બાળક અને યુવક પર હુમલો કર્યો હતો. રખડતા ઢોરે બે પિતરાઈ ભાઈને અડફેટે લીધા હતા. આ ઘટનામાં બંને ઇજાગ્રસ્ત થયા છે. યુવકને છાતીના નીચે સામાન્ય ક્રેક અને બાળકને ફ્રેકચર થયું છે. જો કે હોસ્પિટલમાં પ્રાથમિક સારવાર આપ્યા બાદ બંનેને રજા આપી દેવાઈ હતી.