સુરતમાં B-Tech ના વિદ્યાર્થીએ બનાવી 1 પૈડાં વાળી અદભૂત બાઇક, પેટ્રોલ વગર ફક્ત 1 રૂપિયામાં 40 KM ચાલશે, જુઓ Video
સુરતના એક B-Tech વિદ્યાર્થીએ અનોખી એક પૈડાવાળી ઇલેક્ટ્રિક બાઇક બનાવી છે. આ સ્વ-સંતુલિત વાહન બેટરીથી ચાલે છે, જે પ્રદૂષણમુક્ત પરિવહનનો વિકલ્પ પૂરો પાડે છે.
સામાન્ય રીતે આપણે બે પૈડા, ત્રણ પૈડા કે ચાર પૈડાવાળા વાહનો જ જોયા છે. પરંતુ શું તમે ક્યારેય વિચાર્યું છે કે એક જ પૈડાવાળી ગાડી પણ રસ્તા પર સરળતાથી ચાલી શકે? સુરતમાં અમને એવો જ એક અનોખો દૃશ્ય જોવા મળ્યો, જ્યાં એક યુવાન પોતાની બનાવેલી એક પૈડાવાળી બાઇકને ખૂબ જ સરળતાથી રસ્તા પર દોડાવી રહ્યો હતો.
એક બટન દબાવતા જ બાઇક આપોઆપ બેલેન્સ થઈ જાય છે
આ બાઇકની ખાસિયત એ છે કે તેમાં બેસ્યા પછી માત્ર એક બટન ઓન કરતાં જ બાઇક સંપૂર્ણ રીતે બેલેન્સ થઈ જાય છે. ન તો તે આગળ જાય છે, ન તો પાછળ—સંપૂર્ણ સ્થિર સ્થિતિમાં રહે છે. જ્યારે રાઇડર ચલાવવાનું શરૂ કરે ત્યારે જ બાઇક ચાલે છે. એવું નથી કે બેસતાં જ બાઇક પોતાની જાતે દોડવા લાગી જાય.
ન ચેન, ન એન્જિન… તો પણ બાઇક ચાલે છે!
આ બાઇકમાં સૌથી આશ્ચર્યજનક બાબત એ છે કે તેમાં બહારથી કોઈ એન્જિન, ચેન કે ગિયર સિસ્ટમ નજરે પડતી નથી. તેમ છતાં, બાઇક સરળતાથી ચાલે છે. કારણ કે આ બાઇકમાં વ્હીલની અંદર જ હબ મોટર લગાવવામાં આવી છે, એટલે મોટર સીધી પૈડાની વચ્ચે ફિટ કરેલી છે. આ કારણે બાઇકનું ડિઝાઇન પણ ખૂબ જ સરળ અને આકર્ષક લાગે છે.
Video : Principle Of News
પેટ્રોલ નહીં, ડીઝલ નહીં — સંપૂર્ણ બેટરીથી ચાલતી બાઇક
આ એક પૈડાવાળી બાઇક સંપૂર્ણપણે બેટરીથી ચાલે છે. તેમાં પેટ્રોલ કે ડીઝલની જરૂર નથી. શરૂઆતમાં પેટ્રોલ પર કામ કરવાનો વિચાર હતો, પરંતુ પ્રદૂષણને ધ્યાનમાં રાખીને બેટરી આધારિત સિસ્ટમ પસંદ કરવામાં આવી. આ બાઇકમાં લિથિયમ-આયન બેટરીનો ઉપયોગ કરવામાં આવ્યો છે, જે વધુ રેન્જ આપે છે અને પર્યાવરણ માટે પણ અનુકૂળ છે.
ત્રણ મહિના મહેનત અને અનેક પડકારો પછી તૈયાર થયેલી બાઇક
આ અનોખી બાઇક તૈયાર કરવામાં લગભગ ત્રણ મહિનાનો સમય લાગ્યો. સૌથી મોટો પડકાર હતો બેલેન્સિંગ. કારણ કે એક જ પૈડાં પર આખી બાઇકને બેલેન્સ કરવી સહેલી બાબત નથી. આ માટે બાઇકની આખી ફ્રેમ એવી રીતે ડિઝાઇન કરવામાં આવી કે તેનું સેન્ટર ઓફ ગ્રેવિટી (CG) એકદમ કેન્દ્રમાં રહે.
સ્માર્ટ કંટ્રોલરથી ઓટો-બેલેન્સ સિસ્ટમ
બાઇકમાં ખાસ કંટ્રોલર લગાવવામાં આવ્યો છે, જે બાઇકના આખા વજનને કેન્દ્રમાં બેલેન્સ કરીને રાખે છે. પરિણામે, બાઇક ચાલુ કરતાં જ તે આપોઆપ સંતુલિત થઈ જાય છે. ટેસ્ટિંગ દરમિયાન અનેક વખત પડવાનું પણ બન્યું, ઇજાઓ પણ થઈ, પરંતુ સતત સુધારા અને મહેનત બાદ હવે આ બાઇક સંપૂર્ણ રીતે સ્થિર અને સુરક્ષિત બની ગઈ છે.
શું સામાન્ય લોકો આ બાઇક ચલાવી શકે?
આ બાઇક કોઈપણ વ્યક્તિ ચલાવી શકે છે. જેમ પહેલીવાર આપણે બે પૈડાવાળી બાઇક શીખતા સમયે થોડો સમય લાગે છે, તેમ આ બાઇક માટે પણ થોડું પ્રેક્ટિસ જરૂરી છે. એક-બે દિવસનો સમય આપશો તો સામાન્ય માણસ પણ સરળતાથી આ એક પૈડાવાળી બાઇક ચલાવી શકે છે.
વેસ્ટ મટીરિયલમાંથી બનાવેલી યુનિક શોધ
આ બાઇક બનાવતી વખતે શક્ય તેટલું જૂનું અથવા વેસ્ટ મટીરિયલ ઉપયોગ કરવાનો પ્રયાસ કરવામાં આવ્યો છે. જરૂરી નથી કે દરેક ભાગ નવો જ હોય—જૂની વસ્તુઓને નવા વિચાર સાથે ઉપયોગમાં લઈને તેને એક યુનિક પ્રોજેક્ટમાં ફેરવવામાં આવ્યો છે.
ટ્રાફિકમાં પણ સરળ હલનચલન
આ બાઇકની એક વધુ ખાસિયત એ છે કે તે પોતાની જગ્યાએ જ ફરી શકે છે. ટ્રાફિકમાં આગળ-પાછળ કર્યા વિના, સરળતાથી ટર્ન લઈ શકાય છે અને નાની જગ્યામાંથી પણ બહાર નીકળી શકાય છે.
નોંધ : અહીં આપવામાં આવેલો વીડિયો સોશિયલ મીડિયામાં વાયરલ થયેલ છે.
