સુરત (SURAT) શહેરમાં બની રહેલા ગુનાઓને રોકવા માટે સુરત પોલીસ (POLICE) હવે ખુબ એલર્ટ બની રહી છે. ખાસ કરીને નાના બાળકો અને યુવતીઓ માટે તો પોલીસ દ્વારા અનેક અભિયાનો પણ શહેરમાં શરૂ કરવામાં આવ્યા છે. ત્યારે સુરત શહેરના પાંડેસરા વિસ્તાર ઈન્ડસ્ટ્રીયલ વિસ્તાર છે. આ વિસ્તારમાંથી અવાર નવાર બાળકો ગુમ થયાના કિસ્સાઓ પણ પ્રકાશમાં આવી ગયા છે. ત્યારે આ બાબતને ગંભીરતાથી લઈને પાંડેસરા પોલીસ (Pandesara Police)ખુબ જ સતર્ક બની છે. પાંડેસરા પોલીસ સ્ટેશન પીઆઇ એ.પી. ચૌધરી દ્વારા ખાસ એક ટીમ બનાવવામાં આવી. જે કોઈ બાળક ગુમ થયાના મેસેજ મળતાની સાથે તે ટીમ કામે લાગી જાય છે. અને અલગ અલગ મુદ્દે તપાસ શરૂ કરી દેતી હોય છે.
ખાસ કરીને પાંડેસરા વિસ્તારમાં છેલ્લા 8 મહિના દરમિયાન ગુમ થયેલા બાળકોને પોલીસે શોધી કાઢયા છે. આ તમામ બાળકોને માતા- પિતા સાથે સુખદ મિલન કરાવી પોલીસે એક સરાહનીય કામગીરી કરી છે. બાળકોની વાત કરીએ તો 0 થી 5 વર્ષના 64 બાળકો, જેમાં 35 છોકરાઓ અને 29 છોકરીઓનો સમાવેશ થાય છે. જયારે 06 થી 10 વર્ષના 21 બાળકો, જેમાં 12 છોકરાઓ અને 09 છોકરીઓનો સમાવેશ થાય છે. 11 થી 15 વર્ષના 21 બાળકો, જેમાં 13 છોકરાઓ અને 08 છોકરીઓ અને 16 થી 18 વર્ષના 05 છોકરાઓને શોધી કાઢી માતા-પિતાને સહીસલામત સોંપી દીધા છે.
પાંડેસરાની જેમ સચિન જીઆઇડીસી વિસ્તારમાં પણ પોલીસે આ રીતે કામગીરી શરૂ કરી છે. અને ખાસ કરીને જીઆઇડીસી વિસ્તારોમાં અલગ અલગ સમયે કે જ્યાં માતાપિતા કામે ગયા હોય તેવા સમયે પોલીસ ખાનગી ડ્રેસમાં રાઉન્ડઅપ પેટોર્લિંગ પણ કરતી હોય છે.કારણ કે સુરતમાં નાના બાળકો સાથેની જે ઘટના બનતી હોય છે તેને રોકવા માટે સતત પ્રયાસો કરવામાં આવે છે.
બાળકો ગુમ થવાના કિસ્સા ન બને તે માટે સુરત પોલીસ કમિશનર દ્વારા ખાસ કરીને જીઆઇડીસી વિસ્તારોમાં તેમાં પાંડેસરા પોલીસ સ્ટેશન દ્વારા પાંડેસરા ભેસ્તાન ઉદ્યોગ ભારતી સ્કુલ ખાતે ડે- કેર પણ શરૂ કરવામાં આવી છે. જેમાં નોકરીયાત માતા- પિતા પોતાના બાળકોને સવારે આઠ વાગ્યાથી સાંજના 8 વાગ્યાસુધી મુકી નિશ્વિતપણે નોકરી ધંધો કરી શકશે, તેમજ આ ડે કેરમાં શિક્ષકોની સુવિધાઓ છે. જેમાં આખા દિવસ દરમિયાન બાળકોને અલગ અલગ પ્રવૃતિઓ કરાવી બાળકોને તેઓના ભવિષ્ય માટે સજજ કરશે. તથા બાળકોને સલામતી તથા સ્વસ્થ વાતાવરણ તેમજ સારૂં જમવાનું પણ પુરુ પાડવામાં આવશે, પાંડેસરા પોલીસની આ સેવાકીય કામગીરીને ખરેખર સરાહનીય કામગીરી ગણી શકાય. છતાં પણ લોકોએ પોતાના બાળકો પર ધ્યાન આપવું જરૂરી છે. પોતાના નાના બાળકો ક્યાં રમે છે કોની સાથે રમતા હોય તે ધ્યાન રાખવું જરૂરી છે.
આ પણ વાંચો : રાજકોટ કમિશનકાંડમાં મોટી કાર્યવાહી, પોલીસ કમિશનર મનોજ અગ્રવાલની જૂનાગઢ ટ્રેનિંગ સેન્ટરમાં બદલી
આ પણ વાંચો : Jamnagar : નાગરિક સંરક્ષણની કચેરી સ્ટાફના અભાવે શોભાના ગાંઠીયા સમાન