ગુજરાતમાં હવે ચોમાસુ બરાબરનું જામ્યુ છે. સૌરાષ્ટ્રના અનેક જિલ્લાઓમાં છેલ્લા એક સપ્તાહથી મેઘમહેર થઈ રહી છે. હવામાન વિભાગે ગુજરાતના ત્રણ જિલ્લામાં વરસાદનું રેડ એલર્ટ જાહેર કર્યુ છે. જેમા જામનગર, દેવભૂમિ દ્વારકા અને વલસાડમાં રેડ એલર્ટ જાહેર કર્યુ છે. અન્ય જિલ્લાઓમાં પણ હળવાથી મધ્યમ વરસાદની આગાહી કરવામાં આવી છે. જ્યારે સૌરાષ્ટ્ર, મધ્ય ગુજરાત અને દક્ષિણ ગુજરાતમાં ભારે વરસાદની આગાહી કરાઈ છે.
આ તરફ જામનગરની વાત કરીએ તો જામનગરમાં સતત ત્રીજા દિવસે વરસાદી માહોલ યથાવત છે. કાલાવડ શહેર અને ગ્રામ્ય વિસ્તારમાં વીજળીના કડાકા ભડાકા સાથે ધોધમાર વરસાદ ખાબક્યો છે. ગ્રામ્યની વાત કરીએ તો મૂળીલા, લંબુકિયા, ભાડુકિયા, નવાગામ, ઉમરાળા, ધુનધોરાજી, મોટી વાવડી, હકુમતી, સરવાણીયા, માછરડામાં ધોધમાર વરસાદ વરસ્યો છે. ભારે વરસાદને પગલે મૂળીલા, લંબુકિયા અને ભાડુકિયાની સ્થાનિક નદીઓમાં પૂર આવ્યુ છે. વરસાદી માહોલ જામતા વાતાવરણ ઠંડુગાર થઈ ગયુ છે અને લોકોને ઉકળાટ અને ગરમીમાંથી રાહત મળી છે. આ તરફ અનેક વિસ્તારોમાં વીજ પૂરવઠો ખોરવાતા લોકોને હાલાકીનો પણ સામનો કરવો પડ્યો છે.
જામનગરના લાલપુરમાં 2 કલાકમાં અઢી ઇંચ વરસાદ ખાબક્યો છે. સવારે 8થી 10 વાગ્યા દરમિયાન ધોધમાર વરસાદ પડતા ફલકુ નદીમાં નવા નીરની આવક થઇ છે.
દેવભૂમિ દ્વારકાના કલ્યાણપુર પંથકમાં પવનના સુસવાટા સાથે વરસાદ પડ્યો છે. છેલ્લા બે કલાકમાં દોઢ ઈંચ જેટલો વરસાદ ખાબક્યો છે. કલ્યાણપુર, રાવલ, હરિપર સહિતના ગામોમાં ધોધમાર વરસાદથી અનેક મુખ્ય માર્ગો પર પાણી ભરાયા છે. ગ્રામ્ય પંથકમાં વરસાદથી ખેતરો પાણી પાણી થયા છે.
દક્ષિણની વાત કરીએ તો વલસાડમાં એક દિવસના વિરામ બાદ ફરી વરસાદ શરૂ થઈ ગયો છે. સરોણ, ગુંદલાવ, ભાગડાવાડા, પારડી સહિતના વિસ્તારોમાં વરસાદ પડ્યો છે. ધોધમાર વરસાદને પગલે અનેક રસ્તાઓ પર પાણી ફરી વળ્યા છે. વાવણીલાયક વરસાદ થતા ખેડૂતોમાં ખુશીનો માહોલ છે.
Published On - 3:46 pm, Mon, 24 June 24