JAMNAGAR : આ ગામની ગ્રામ પંચાયતની ઓફિસ જોઇને તમે ચોંકી જશો !!
ફલ્લા ગામની ગ્રામ પંચાયતની કચેરી પંચાયત ચોકમાં ડિસેમ્બર 2020માં તૈયાર કરવામાં આવી. જીલ્લા કક્ષાની પાંચ લાખની ગ્રાન્ટથી કચેરી તૈયાર કરવામાં આવી.
JAMNAGAR : જિલ્લાનું ફલ્લા ગામ જે આદર્શ ગામ તરીકે ઓળખ ધરાવે છે. ગામની અનેક વિશેષતાના કારણે ગામને અલગ ઓળખ મળી છે. આમ તો, સરકારી કચેરીઓની છાપ જુનવાણી ઈમારતો ફાઈલો અસ્તવસ્ત તેમજ અન્ય સવલતોનો અભાવ હોય તેવું બનતું હોય છે. પરંતુ નાનકડાં ગામની ગ્રામ પંચાયતની કચેરી જાણે કોઈ કોર્પોરેટ કચેરી હોય તેવી ગ્રામ પંચાયતની કચેરી તૈયાર કરવામાં આવી છે.
ફલ્લા ગામની ગ્રામ પંચાયતની કચેરી પંચાયત ચોકમાં ડિસેમ્બર 2020માં તૈયાર કરવામાં આવી. જીલ્લા કક્ષાની પાંચ લાખની ગ્રાન્ટથી કચેરી તૈયાર કરવામાં આવી. જેમાં ઈમારત તૈયાર થયા બાદ સરપંચ લલીતાબેન કમલેશ ઘમસાણીયા અને તલાટી હિતેષ એમ સુથાર દ્રારા કચેરીને લોકઉપયોગી બને, તેમજ લોકો અહીં મુલાકાત લેવા આવે તે મુજબ બનાવવાનું નકકી થયું.
જે માટે રાજકોટના ઈન્ટીરીયર ડીઝાઈનર જે મુળ ફલ્લા ગામના વતની નિલુ કોઠારીએ ગ્રામ પંચાયતની કચેરી માટે ખાસ સેવા આપી દાતાઓના ફાળાની મદદથી અંદાજીત રૂ.3.50 લાખના ખર્ચે કચેરીની ડીઝાઈન તૈયાર કરી. ગ્રામ પંચાયતની કચેરી કુલ 1200 ફુટના એરીયામાં બની છે. જેમાં 600 ફુટમાં જન સુવિધા કેન્દ્ર તેમજ 600 ફુટમાં તલાટી અને સરપંચની ચેમ્બર તૈયાર કરવામાં આવી છે. જયાં એસી, બેઠક વ્યવસ્થા, પીવાના પાણી માટે આર.ઓ. સીસ્ટમ, કોમ્પ્યુટર માટેની વ્યવસ્થા, સહીતની સુવિધા છે.
ફલ્લા ગ્રામ પંચાયતની કચેરી તો એવી રીતે તૈયાર કરવામાં આવે છે. લોકો મુલાકાત લેવા આવે, પરંતુ આ સાથે ગ્રામ પંચાયતની વિવિધ સેવાઓ અને વિશેષ કામગીરી અને ગામની એકતાના કારણે ફલ્લાને આદર્શ ગામની ઓળખ મળી છે. કચેરી સાથે ગ્રામ પંચાયત પાસે પુરતો સ્ટાફ છે. જેમાં કુલ 8 લોકો ફરજ બજાવે છે.
તલાટી, રેવન્યુ તલાટી, કોમ્પ્યુટર ઓપરેટર, પટ્ટાવારા, સફાઈ કામદાર, ઈલેકટ્રીશન, વાલમેન અને એક સીવિલ ઈન્જીનિયર 8 લોકો ફરજ બજાવે છે. જેમાં સીવીલ ઈન્જીનીયરને પગાર સરપંચ દ્રારા આપવામાં આવે છે. જે છેલ્લા 1 વર્ષથી ફરજ બજાવે છે. ગ્રામ પંચાયતમાં સીવીલ ઈન્જીનીયર નોકરી કરતો હોય તેવી આ પ્રથમ ગ્રામ પંચાયત બની છે.
અંદાજે 6 હજારની વસ્તી ધરાવતા ગામમાં ચુંટણી ના યોજાતા સમરસ ગ્રામ પંચાયત બની છે. ગ્રામ પંચાયત દ્રારા ગામને વિવિધ સેવા તો આપવાં આવે છે. જેમાં 8-12ના દાખલા, લાઈટબીલ, ઓનલાઈન સુવિધા સહીતની કામગીરી કચેરીમાં થાય છે. આ ઉપરાંત ગ્રામ પંચાયત દ્રારા ટેકનોલોજીનો ઉપયોગ કરીને લોકોને મદદરૂપ થવાના પ્રયાસ કરવામાં આવે છે. ગ્રામ પંચાયતની પોતાની મોબાઈલ એપ્લીકેશન, વેબસાઈટ અને વોટ્સઅપ ગ્રુપ છે.
વોટ્સએપ ગ્રુપમાં ગામના 4600 ફોનનંબરનો સમાવેશ કરવામાં આવ્યો છે. આ ઉપરાંત ટેક્સમેસેજ પણ ગ્રામ પંચાયત દ્રારા મોકલવામાં આવે છે. સાથે જ ગામના 10 જાહેર સ્થળો પર લાઉડસ્પીકર લગાવવામાં આવ્યા છે. જેનાથી અગત્યની માહિતી કે સુચના ગ્રામપંચાયત કચેરી માંથી આપવામાં આવે છે. ગામમાં કોઈ વેપાર-ધંધા કે સેવાની માહિતી પણ વોટસઅપ દ્વારા આપવામાં આવે.
ફલ્લા ગામમાં છેલ્લા 25 વર્ષથી દૈનિક પાણી વિતરણ કરવામાં આવે છે. ગામમાં ડોર-ટુ-ડોર કચરાનુ કલેકશન કરવામાં આવે છે. પંચાયત કચેરીના પટાંગણમાં તિરંગો છે. ગ્રામ પંચાયતની બચતો, દાતાઓના સહયોગ તેમજ લોકફાળાથી વિવિધ અને વિશેષ સવલતો ગામમાં આપવામાં આવે છે. ગ્રામ પંચાયતોની વિશેષ સેવા અને ગામની એકતાના કારણે ફલ્લા ગામ ડીઝીટલ ગામ, આદર્શ ગામ જેવા ઉપનામથી ઓળખાય છે.
Latest News Updates
