Breaking News : જીજ્ઞેશ મેવાણીની મુશ્કેલીમાં વધારો, વધુ એક પોલીસ ફરિયાદ નોંધાઈ

કોંગ્રેસના ધારાસભ્ય જીજ્ઞેશ મેવાણીની મુશ્કેલીઓમાં વધારો થયો છે. ગાંધીનગર મહાનગરપાલિકાની ચૂંટણી દરમિયાન આચારસંહિતાના ભંગ અને પોલીસની કાયદેસરની કામગીરીમાં રુકાવટ ઊભી કરવાના આરોપસર મેવાણી સહિત 10 લોકો સામે વધુ એક પોલીસ ફરિયાદ નોંધાઈ છે. આ ઉપરાંત પોલીસ કર્મચારીઓ સાથે ગેરવર્તણૂક, અભદ્ર ભાષાનો ઉપયોગ અને શાંતિ ડહોળવાનો પ્રયાસ કર્યાના પણ આક્ષેપો કરવામાં આવ્યા છે.

મળતી માહિતી અનુસાર, ગાંધીનગર મહાનગરપાલિકાના વોર્ડ નંબર 4ના કોંગ્રેસના ઉમેદવાર યુનુસ પરમારના સમર્થક નિવેષ પંચાલને ચૂંટણી પ્રચાર દરમિયાન મુનાફ પઠાણ નામના વ્યક્તિએ ધમકી આપી હોવાનો આક્ષેપ છે. આ મામલે પેથાપુર પોલીસ સ્ટેશનમાં લેખિત અરજી કરવામાં આવી હતી. અરજીના આધારે તપાસ હાથ ધરતાં પોલીસે મુનાફ પઠાણ અને તેના સાથીઓને પૂછપરછ માટે બોલાવ્યા હતા.

આ દરમિયાન વડગામના ધારાસભ્ય જીજ્ઞેશ મેવાણી, સાકીર રાઠોડ, નાસીર ઉર્ફે પીન્ટુ મેમણ સહિતના લોકો સેક્ટર-13 પોલીસ ચોકી ખાતે પહોંચ્યા હોવાનો ઉલ્લેખ ફરિયાદમાં કરવામાં આવ્યો છે. આક્ષેપ મુજબ, ત્યાં પોલીસ કર્મચારીઓ સાથે બોલાચાલી થઈ હતી અને પોલીસ અધિકારીઓ સામે અભદ્ર ભાષાનો ઉપયોગ કરવામાં આવ્યો હતો. ઇન્ચાર્જ અધિકારી અંગે સવાલો ઉઠાવીને ધમકીભર્યા શબ્દોનો ઉપયોગ કર્યાનો પણ આરોપ છે.

ફરિયાદમાં વધુમાં આક્ષેપ કરવામાં આવ્યો છે કે, પોલીસ મુનાફ પઠાણનું નિવેદન નોંધી રહી હતી ત્યારે તેને બળજબરીથી બહાર લઈ જવાનો પ્રયાસ કરવામાં આવ્યો હતો. આ ઘટનાને પગલે પોલીસની કાયદેસરની કાર્યવાહીમાં રુકાવટ ઊભી થઈ હોવાનો આરોપ લગાવવામાં આવ્યો છે. સમગ્ર મામલે ચૂંટણી આચારસંહિતાના ભંગ અને સરકારી કામગીરીમાં અવરોધ ઊભો કરવા સહિતના મુદ્દાઓને આધારે ફરિયાદ નોંધવામાં આવી છે.

ઉલ્લેખનીય છે કે, આ પહેલાં પણ પેથાપુર પોલીસ સ્ટેશનમાં આ મામલે ફરિયાદ નોંધાઈ હોવાની માહિતી સામે આવી હતી. હવે જીજ્ઞેશ મેવાણી સહિત 10 લોકો સામે વધુ એક ફરિયાદ નોંધાતાં રાજકીય માહોલ ગરમાયો છે. જોકે, આ તમામ આરોપો ફરિયાદમાં કરવામાં આવેલા આક્ષેપો છે. કેસમાં પોલીસ તપાસ અને કાયદાકીય પ્રક્રિયા બાદ જ સમગ્ર હકીકત સ્પષ્ટ થશે.

વડોદરા યુનાઈટેડ વે ગરબામાં પ્રથમ નોરતે મોબાઈલ ચોરીનો વિવાદ, ખેલૈયાઓમાં આક્રોશ, જુઓ Video