અમદાવાદમાં પતિના ત્રાસથી પરિણીતાએ છઠ્ઠા માળેથી ઝંપલાવીને કરી આત્મહત્યા, પોલીસે હાથ ધરી તપાસ

અમદાવાદના નારોલ વિસ્તારમાં 4 નવેમ્બરના દિવસે પરિણીતાએ છઠ્ઠા માળેથી ઝંપલાવીને આત્મહત્યા કરી લીધી હોવાની ઘટના બની હતી. પરિણીતાએ એકાદ વર્ષ પહેલા જગદીશ રાઠોડ નામના યુવક સાથે લગ્ન કર્યા હતાં. જોકે લગ્નના છ મહીના સુધી બંન્ને મનમેળથી રહેતા હતાં, પરંતુ બાદમાં નાની નાની બાબતો બંન્ને વચ્ચે ઝઘડા થતા હતાં.

જો યુવતી મોબાઇલમાં વીડિયો ઉતારે, સારા કપડા પહેરે, સારી રીતે તૈયાર થાય કે પછી મોબાઇલ ફોનનો ઉપયોગ કરે તો પણ તેનો પતિ તેની સાથે બોલાચાલી ઝઘડો કરીને મારઝુડ કરતો હતો. જેનાથી કંટાળીને યુવતીએ આત્મહત્યા કરી લીધી છે. સમગ્ર ઘટનાની જાણ પોલીસને કરતા પોલીસ ઘટનાસ્થળ પર પહોચી હતી અને મૃતક યુવતીના ભાઇની ફરિયાદ નોંધીને આરોપીની ધરપકડ કરી છે.

પોલીસે દુષ્પ્રેરણાનો ગુનો દાખલ કરી તપાસ હાથ ધરી

જો ઘટનાની અંગે વાત કરીએ તો દિવાળીનો પર્વ હોવાથી યુવતી 2 નવેમ્બરના દિવસે તેના ભાઇના ઘરે રોકાવા માટે આવી હતી. જો કે 4 નવેમ્બરના દિવસે બપોરના સમયે તેનો પતિ ત્યાં આવ્યો હતો અને મે તને અહિંયા આવવાની ના પાડેલ છે તેમ છતાં તું અહિંયા કેમ આવી છે. અને કેમ અહિયા રોકાઇ છે. તેમ કહીને તેની સાથે મારામારી કરી તેને સાસરીમાં પરત લઇ ગયો હતો.

બાદમાં સાંજના છ વાગ્યાની આસપાસ આરોપીએ યુવતીના ભાઇને ફોન કરીને કહ્યું હતું કે સવાર સુધીમાં છુટાછેડાના કાગળીયા તૈયાર કરી લેજો નહીતર તારી બહેનને આખી રાત મારીશ. જો કે ફરીયાદી ગભરાઇને તેના પત્ની અને બહેન સાથે નારોલ પહોચ્યા હતાં. જ્યાં યુવતીના સાસરિયાઓ પણ હાજર હતાં અને તેમની સાથે વાતચીત દરમિયાન બોલાચાલી થતાં યુવતીનો પતિ તેને મારવા માટે ગયો હતો. જેથી યુવતીએ ગેલેરીમાંથી નીચે ઝંપલાવી આત્મહત્યા કરી લીધી છે.

હાલમાં પોલીસે આરોપીની ધરપકડ કરીને સમગ્ર મામલે વધુ તપાસ હાથ ધરી છે. પોલીસ તપાસમાં સામે આવ્યું છે કે આરોપી રીક્ષા ચલાવે છે. જ્યારે યુવતી પણ ખાનગી કંપનીમાં નોકરી કરે છે. બંન્ને વચ્ચે છેલ્લા કેટલાક સમયથી અવાર નવાર ઝઘડા પણ થતા હતાં.