Ahmedabad : લો બોલો, કોમ્યુનિટી હોલ બનાવ્યો પણ ખર્ચની નથી ખબર, AMC એ અલગ અલગ બોર્ડમાં દર્શાવેલ ખર્ચમાં 56 લાખનો તફાવત !
AMC દ્વારા વેજલપૂર વિસ્તારમાં બનાવવામાં આવેલા કોમ્યુનિટી હોલનું કેન્દ્રીય ગૃહપ્રધાન અમિત શાહના હસ્તે લોકાર્પણ કરવામાં આવ્યું હતું. જો કે આ કોમ્યુનિટી હોલના ખર્ચની વિગત ખુદ AMC પાસે જ ન હોવાથી, હાલ સ્થાનિકોમાં આ મુદો ચર્ચાનો વિષય બન્યો છે.
કેન્દ્રીય ગૃહ પ્રધાન અને ગાંધીનગર લોકસભાના સાંસદ અમિત શાહ (Amit Shah) આજથી ત્રણ દિવસ સુધી ગુજરાતની મુલાકાતે છે. ત્યારે તેમની હાજરીમાં અમદાવાદ (Ahmedabad)શહેરમાં અનેક વિકાસના કાર્યોનું લોકાર્પણ તેમજ ખાત મુર્હત કરવામાં આવશે.
જેમાં બોપલ વિસ્તારમાં પાણી વિતરણ યોજના, લાયબ્રેરી તેમજ પશ્ચિમ રેલવે , ઔડા અને AMCની વિવિધ પ્રજાલક્ષી યોજનાઓના ખાત મુર્હત કરવામાં આવશે. તેમજ શહેરના વેજલપુર વિસ્તારમાં AMC દ્વારા બનાવવામાં આવેલ અદ્યતન કોમ્યુનિટી હોલનું પણ લોકાર્પણ કરવામાં આવ્યું હતું.
પરંતુ આ કોમ્યુનિટી હોલ (Community Hall) કેટલી કિંમતમાં બનાવવામાં આવ્યો તેની જાણ ખૂદ અમદાવાદ મ્યુનિસિપલ કોર્પોરેશનને જ ન હોવાને કારણે આ લોકાર્પણ સ્થાનિકોમાં ચર્ચાનો વિષય બન્યો છે.
બેનરોએ ખોલી AMCની પોલ
કોમ્યુનિટી હોલના લોકાર્પણ દરમિયાન હોલની બહાર 2 બેનર લગાવવામાં આવ્યા હતા. જેમાં વેજલપુર વિસ્તારમાં (Vejalpur area) બનાવવામાં આવેલ કોમ્યુનિટી હોલની કિંમત 8.26 કરોડના ખર્ચે બનાવ્યો હોવાનો એક બેનરમાં ઉલ્લેખ કરાયો હતો જ્યારે તેની બાજુમાં લગાવવામાં આવેલ અન્ય એક બેનરમાં આ જ કોમ્યુનિટી હોલ 8.82 કરોડના ખર્ચે બનાવ્યો હોવાનું સામે આવ્યું હતું.
આ બન્ને બેનરમાં(Banner) કોમ્યુનિટી હોલની જે કિંમત દર્શાવવામાં આવી છે, તેમાં 56 લાખ રૂપિયાનો તફાવત જોવા મળ્યો છે. ત્યારે, સ્થાનિકો પણ ઇચ્છી રહ્યા છે કે પ્રજા માટે જે કોમ્યુનિટી હોલ બનાવવામાં આવ્યો છે, તેની સાચી કિંમત પ્રજા સમક્ષ મુકવામાં આવે.હાલ, આ બન્ને બેનરોના રકમના તફાવતે તંત્રની પોલ ખોલી નાખી છે.
અમદાવાદ શહેરમાં પ્રજાલક્ષી તેમજ વિકાસલક્ષી જે કાર્યો થતા હોય છે. તેની માહિતી અમદાવાદ મ્યુનિસિપલ કોર્પોરેશન(Ahmedabad Municipal Corporation) પાસે હોય છે ત્યારે દેશના કેન્દ્રીય ગૃહપ્રધાન અમિત શાહ દ્વારા જે વિકાસલક્ષી કાર્યોનું લોકાર્પણ કરવામાં આવ્યું તેના નિર્માણ માટે ખરેખરમાં કેટલો ખર્ચ કરવામાં આવ્યો છે. ત્યારે હાલ, આ મુદો લોકો માટે ચર્ચાનો વિષય બન્યો છે.
Latest News Updates
