Breaking News : ગુજરાતમાં નકલી દવાનું આંતરરાજ્ય રેકેટ ઝડપાયું, ત્રણ આરોપીઓની ધરપકડ

ગુજરાતમાં બ્લડ પ્રેશરની નકલી દવા બનાવતી અને વેચતી એક આંતરરાજ્ય સિન્ડિકેટનો પર્દાફાશ થયો છે. પોલીસ અને આરોગ્ય ઔષધ નિયમન તંત્ર દ્વારા સંયુક્ત રીતે હાથ ધરાયેલા ઓપરેશનમાં ત્રણ મુખ્ય આરોપીઓની ધરપકડ કરવામાં આવી છે. આ આરોપીઓ અસલી દવા ઉત્પાદક કંપનીઓના નામ, લેબલ અને બેચ નંબરનો બેફામ ઉપયોગ કરીને નકલી દવાઓનું ઉત્પાદન કરતા હતા અને તેને ગુજરાતના વિવિધ શહેરોમાં આવેલા મેડિકલ સ્ટોર્સ સુધી પહોંચાડતા હતા.

આ રેકેટનો ભાંડો ત્યારે ફૂટ્યો જ્યારે જેબી કેમિકલ્સ એન્ડ ફાર્માસ્યુટિકલ પ્રાઇવેટ લિમિટેડ તરફથી ફરિયાદ મળી કે તેમની નિકાર્ડિયા રિટાર્ડ નામની દવા લીલાવતી ફાર્મસી એન્ડ વેલનેસ પ્રાઇવેટ લિમિટેડમાંથી ડુપ્લીકેટ વેચાઈ રહી છે. આ ફરિયાદને આધારે ત્વરિત કાર્યવાહી શરૂ કરવામાં આવી. બોગસ ગ્રાહકોને મોકલીને નકલી દવા ખરીદવામાં આવી. શરૂઆતમાં સેમ બેચ નંબરની દવા ન મળતા, અલગ અલગ જગ્યાએ તપાસ કરવામાં આવી. જ્યાં-જ્યાંથી આ દવા સપ્લાય થઈ હોવાનું સામે આવ્યું, તે તમામ સ્થળોએ તપાસ કરીને સેમ બેચનો મુદામાલ ઝડપી પાડવામાં આવ્યો અને જપ્ત કરવામાં આવ્યો. આ સંપૂર્ણ તપાસ બાદ સિટી ક્રાઈમ બ્રાન્ચમાં એફઆઈઆર નોંધાવવામાં આવી હતી.

તપાસમાં સામે આવ્યું છે કે, નિકાર્ડિયા રિટાર્ડ 10 એમજીની જે દવા ઓરિજિનલ ફોર્મ્યુલામાં બને છે, તે જ રીતે નકલી દવાઓ બનાવવામાં આવતી હતી. દવાનું રેપર (પેકેટ) પણ દસ ગોળીના ઓરિજિનલ પેકેટ જેવું જ બનાવવામાં આવતું હતું. જોકે, અનુભવી અને જાણકાર વ્યક્તિ તરત જ પારખી શકે કે આ રેપર અસલી કંપની દ્વારા બનાવવામાં આવેલ નથી. આ નકલી દવાઓનો જથ્થો અમદાવાદ, નડિયાદ અને ભુજ સુધી પહોંચાડવામાં આવ્યો હતો. નડિયાદના એક મેડિકલ સ્ટોરમાંથી નકલી દવાની 30 સ્ટ્રીપ જપ્ત કરવામાં આવી હતી, જ્યારે ભુજની મહાદેવ મેડિકલ એજન્સીમાંથી પણ નકલી દવાનો મોટો સ્ટોક મળી આવ્યો હતો.

આ કેસમાં ધરપકડ કરાયેલા ત્રણ આરોપીઓમાં અમદાવાદના હોલસેલ દવા વેપારી દર્શીલ સંઘવીનો સમાવેશ થાય છે. દર્શીલ સંઘવી અમદાવાદ અને અન્ય શહેરોમાં સબ-ડિસ્ટ્રિબ્યુટર્સને આ નકલી દવાઓ વેચતો હોવાનું ખુલાસો થયો છે. ઉપરાંત, લખનઉ, ઉત્તર પ્રદેશના દેવેન્દ્ર યાદવ અને ઉમંગ રસ્તોગીની પણ ધરપકડ કરવામાં આવી છે. દેવેન્દ્ર યાદવ નકલી દવાઓ ખરીદીને ગુજરાતમાં સપ્લાય કરવાનું મુખ્ય કામ કરતો હતો, જ્યારે ઉમંગ રસ્તોગી દવાઓની ખરીદી-વેચાણમાં મદદ કરીને કમિશન મેળવતો હોવાનું તપાસમાં સામે આવ્યું છે.

ત્રણેય આરોપીઓને કોર્ટમાં રજૂ કરવામાં આવ્યા હતા અને વધુ તપાસ માટે તેમના રિમાન્ડની માંગણી કરવામાં આવી હતી. કોર્ટે ત્રણેય આરોપીઓના 2 સપ્ટેમ્બર સુધીના રિમાન્ડ મંજૂર કર્યા છે. પોલીસ હવે આ નકલી દવાઓના નેટવર્કના મૂળ સુધી પહોંચવા અને તેમાં સંડોવાયેલા અન્ય વ્યક્તિઓને ઝડપી પાડવા માટે ઊંડાણપૂર્વક તપાસ ચલાવી રહી છે.

અંબાણીના ઘરથી પણ મોંઘું ઘર, સ્પા-જીમ, પાંચ માળનું પાર્કિંગ, આ ઉધ્યોગપતિની શાહી શાન- શૌકત જોઈ ચોંકી જશો..