Breaking News : PGમાં રહેતી યુવતી સાથે દુષ્કર્મના આરોપીએ પોલીસ પર કર્યો હુમલો, ભાગવા જતા પગમાં વાગી ગોળી

અમદાવાદ શહેરના આનંદનગર વિસ્તારમાં PGમાં રહેતી યુવતી સાથે દુષ્કર્મના કેસમાં ઝડપાયેલા આરોપીએ પંચનામા દરમિયાન પોલીસ પર હુમલો કરીને ભાગવાનો પ્રયાસ કર્યો હોવાની ઘટના સામે આવી છે. મળતી માહિતી મુજબ હેબતપુર વિસ્તારમાં પંચનામા માટે લઈ જવાયેલા આરોપી ધર્મસિંહે પોલીસ સાથે ઝપાઝપી કરી ભાગવાનો પ્રયાસ કર્યો હતો. આ દરમિયાન પોલીસે સ્વબચાવમાં ફાયરિંગ કરતાં આરોપીના પગમાં ગોળી વાગી હતી.

પોલીસ પર હુમલો કરી ભાગવાનો પ્રયાસ

મળતી માહિતી મુજબ, આનંદનગર પોલીસ આરોપી ધર્મસિંહને ઘટનાસ્થળે પંચનામા માટે હેબતપુર લઈ ગઈ હતી. પંચનામા દરમિયાન આરોપીએ અચાનક પોલીસ પર હુમલો કરીને ભાગવાનો પ્રયાસ કર્યો હતો. આરોપીને રોકવા જતાં ઝપાઝપી થઈ હતી, જેમાં એક કોન્સ્ટેબલને ઈજા પહોંચી હતી.

પરિસ્થિતિ કાબૂ બહાર જતી જોઈ પોલીસે સ્વબચાવમાં ફાયરિંગ કર્યું હતું. ગોળી આરોપીના પગમાં વાગતાં તે જમીન પર ઢળી પડ્યો હતો. ત્યારબાદ આરોપી અને ઈજાગ્રસ્ત કોન્સ્ટેબલ બંનેને સારવાર માટે સિવિલ હોસ્પિટલ ખસેડવામાં આવ્યા હતા.

હોસ્પિટલમાં કાન પકડી માફી માગતો જોવા મળ્યો

સિવિલ હોસ્પિટલમાં સારવાર દરમિયાન આરોપી પોલીસ સમક્ષ ક્યારેક હાથ જોડતો તો ક્યારેક લંગડાતા પગે કાન પકડીને માફી માગતો જોવા મળ્યો હતો. આરોપી “હવે આવું નહીં કરું, એકવાર માફ કરી દો” કહીને માફી માગતો હોવાનો વીડિયો સામે આવ્યો છે.

ઘટનાની ગંભીરતાને પગલે JCP અને DCP સહિતના ઉચ્ચ પોલીસ અધિકારીઓનો કાફલો પણ સિવિલ હોસ્પિટલ પહોંચ્યો હતો. પોલીસના જણાવ્યા અનુસાર, પોલીસ પર હુમલો અને ભાગવાનો પ્રયાસ કરવા બદલ આરોપી વિરુદ્ધ બોડકદેવ પોલીસ સ્ટેશનમાં વધુ ગુનો નોંધવાની કાર્યવાહી કરવામાં આવશે.

યુવતી સાથે ધાબા પર દુષ્કર્મનો આરોપ

આનંદનગરમાં ફ્લેટ ભાડે રાખીને ઈન્ટિરિયર ડિઝાઈનિંગનો અભ્યાસ કરતી યુવતી રાત્રિના સમયે સોસાયટીના ધાબા પર ચાલવા ગઈ હતી. આ દરમિયાન સોસાયટીમાં સિક્યુરિટી ગાર્ડ તરીકે કામ કરતા પરપ્રાંતિય આરોપી ધર્મસિંહે યુવતીના ગળામાં વાયર વીંટી તેની સાથે દુષ્કર્મ આચર્યું હોવાનો આરોપ છે.

ઘટના બાદ આનંદનગર પોલીસે આરોપીને ઝડપી લેવા માટે આશરે 10 ટીમો બનાવી હતી અને ગણતરીના કલાકોમાં જ આરોપીની ધરપકડ કરી હતી. હવે આરોપી સામે કડકમાં કડક કાર્યવાહી કરવાની માગ ઉઠી રહી છે.

Ahmedabad Breaking : આનંદનગરના ફ્લેટમાં યુવતી સાથે સિક્યુરિટી ગાર્ડે આચર્યું દુષ્કર્મ, 3 દિવસ પહેલા જ લાગ્યો હતો નોકરીએ, આ સ્ટોરી વાંચવા અહીં ક્લિક કરો