Ahmedabad Crime : ઘાતક હથિયારોના દમ પર સિક્યુરિટી ગાર્ડ કે ચોકીદારને બંધક બનાવી ચોરીને આપતા હતા અંજામ

Ahmedabad:  જિલ્લાના ચાંગોદર જીઆઈડીસી અને આસપાસના વિસ્તારોમાં છેલ્લા ઘણા સમયથી ચોરીની ઘટના સામે આવી હતી. અલગ અલગ કંપનીઓમાં નજીવી રકમની ચોરીઓ તેમજ ધારિયા તલવારો જેવા હથિયારો સાથે રાખી ગાર્ડ કે કર્મચારીને બંધક બનાવી ચોરીની પણ ફરિયાદો આવતી હતી જેને લઇને પોલીસે અલગ અલગ સીસીટીવી અને અન્ય મુદ્દાઓને આધારે તપાસ હાથ ધરી અને ચોર ગેંગને પકડી પાડી છે. પોલીસ પૂછપરછમાં આ ગેંગના સભ્યોએ અનેક ચોકાવનારી વિગતો સામે આવી છે.

અમદાવાદ જિલ્લાના ગ્રામ્ય વિસ્તારો અને તેમાં પણ ખાસ કરીને ચાંગોદર જીઆઇડીસી અને આસપાસના વિસ્તારોમાં આવેલી કંપનીઓ તેમજ કારખાનાઓમાં ચોરીની ઘટનાઓ વધી રહી હતી. પોલીસને અલગ અલગ ફરિયાદો મળતા ચોર ગેંગને પકડવા અલગ અલગ ટીમો કાર્યરત કરી હતી અને આખરે અમદાવાદ જિલ્લા એલસીબીની ટીમ દ્વારા આ ચોર ગેંગની ધરપકડ કરવામાં આવી છે. જોકે આ ચોર ગેંગના ચાર સભ્યોની પોલીસે ધરપકડ કરી અને પૂછપરછ કરતા અનેક ચોરીઓના ભેદ ઉકેલાયા છે તેમજ આ ગેંગ દ્વારા અનેક ગંભીર પ્રકારના ગુનાઓ તેમજ ચોરીની અલગ પ્રકારની મોર્ડસ ઓપરેટી પણ સામે આવતા પોલીસ પણ ચોકી ઉઠી હતી.

કોઇ રીતે આપતા હતા ચોરીને અંજામ

પકડાયેલા ચારેય આરોપીઓ એક સાથે રાતના સમયે ચોરીને અંજામ આપતા હતા. આ ચારેય આરોપીઓ જીઆઈડીસી વિસ્તારોમાં મજૂરીકામ કરતા હતા અને રાત્રીના સમયે ચોરી કરતા હતા. આ ચારેય આરોપીઓ જીઆઇડીસી વિસ્તારમાં કામ કરતા હોવાથી કારખાના અને કંપનીઓ ઉપર રેકી કરી ત્યારબાદ જે તે જગ્યાએ ચોરી કરવાનું નક્કી કરતા હતા.

આ ગેંગ ચોરીને અંજામ આપતા સમયે ધારીયા, તલવાર જેવા ઘાતક હથિયારો સાથે રાખતા હતા અને જો કોઈ સિક્યુરિટી ગાર્ડ કે અન્ય વ્યક્તિ પ્રતિકાર કરે તો તેમને ઈજા પહોંચાડતા હતા તેમજ તેને બંધક બનાવી ચોરીને અંજામ આપતા હતા. આ ગેંગ કારખાના અથવા કંપનીના ચોકીદાર કે સિક્યુરિટીને બંધક બનાવી હથિયારો બતાવી ડરાવતા હતા અને તેમની જ પાસે તિજોરી અથવા તો અન્ય જગ્યા કે જ્યાં પૈસા કે અન્ય વસ્તુઓ પડેલી હોય તેની ચાવી અથવા તો તે જગ્યા બતાવવા ધમકીઓ આપતા હતા અને ચોરીને અંજામ આપતા હતા.

કોણ છે આ ચોર ગેંગના સભ્યો અને શું છે તેનો ગુનાહીત ઇતિહાસ

અમદાવાદ ગ્રામ્ય પોલીસે ચોરી કરતી આ ગેંગના ચાર સભ્યોની ધરપકડ કરી છે. જેમાં અન્નું મોતિયા, રાકેશ ભરતા, પ્રિતેશ મીનામાં અને રાકેશ બારિયાનો સમાવેશ થાય છે. આ આરોપીઓ ગુનાહીત ઇતિહાસ ધરાવે છે. પોલીસે આ ગેંગની પૂછપરછ કરતા સામે આવ્યું છે કે ચાંગોદર જીઆઈડીસી અને આસપાસના વિસ્તારોમાં 12 જેટલી ચોરી, ધાડ અને લૂંટની ઘટનાને અંજામ આપ્યો છે. જેમાં કંપની કે કારખાનામાં શટર તોડી ઓફિસ માંથી પૈસા ચોરી કરવા કે તિજોરી ઉઠાવી જવાની ઘટનાઓને અંજામ આપ્યો હતો.

આ પણ વાંચો  : અમદાવાદ એરપોર્ટ વિમાન લેન્ડીંગ કરવા માટે મહત્વનુ, 150 થી વધારે પ્રકારના પ્લેન ભરી ચૂક્યા છે ઉંચી ઉડાન

ખાસ ચાંગોદર જીઆઈડીસી ઉપરાંત કરજણ સ્વામિનારાયણ મંદિરમાં દાન પેટીની ચોરી, સુરત, નડિયાદ, અસલાલી વિસ્તારમાં પણ ચોરીઓ કરી હતી તેમજ સનાથલની નારાયણ બિઝનેસ સ્કૂલમાંથી પણ તિજોરીની ચોરી કરી હતી જેના ભેદ ઉકેલાયા છે. હાલતો ગ્રામ્ય પોલીસે ચોર ગેંગની ધરપકડ કરી આગળની કાર્યવાહી હાથ ધરી છે. પોલીસે આ ગેંગ પાસેથી ઘાતક હથિયારો પણ કબ્જે કર્યા છે. પોલીસે હવે તપાસ કરી રહીં છે કે આ ગેંગ દ્વારા વધુ કોઈ ચોરી, લૂટ કે ધાડ જેવી ઘટનાને અંજામ આપ્યો છે કે કેમ.

અમદાવાદ સહિત ગુજરાતના તમામ જિલ્લાના સમાચાર વાંચવા માટે અહીં ક્લિક કરો