સુપ્રીમ કોર્ટે 2008ના અમદાવાદ સિરિયલ બ્લાસ્ટ કેસમાં ફાંસીની સજા પામેલા દોષિત અહેમદ બાવા અબુ અબુબકર બરેલવી દ્વારા દાખલ કરવામાં આવેલી અરજીના સંદર્ભમાં નોટિસ ઈસ્યું કરી છે. આ અરજીમાં ગુજરાત હાઈકોર્ટના તે નિર્ણયને પડકારવામાં આવ્યો છે, જેમાં તેને દોષિત ઠેરવવાતી સજા અને ફાંસીની સજાને યથાવત રાખવામાં આવી હતી. જસ્ટિસ વિક્રમ નાથની અધ્યક્ષતાવાળી બેન્ચ સમક્ષ હાજર રહેલા વકીલે દલીલ કરી હતી કે, દોષિત ઠેરવવાનો નિર્ણય સંપૂર્ણપણે કાવતરાના આરોપ પર આધારિત હતો. ગુજરાત હાઈકોર્ટના ચુકાદાના અનુવાદની માંગ કરતી અરજી પણ રજૂ કરવામાં આવી હતી.

ટ્રાયલ કોર્ટના દસ્તાવેજો સ્થાનિક ભાષામાં છે. જસ્ટિસ નાથે ટિપ્પણી કરી, “ઠીક છે, સજાના અમલ પર રોક લગાવવામાં આવશે. હાલ પૂરતી નોટિસ ઈસ્યુ કરો.” ગુરુવારની સુનાવણી દરમિયાન, બરેલવીના વકીલે ગુજરાત હાઈકોર્ટના ચુકાદાની અનુવાદિત નકલની પણ માંગણી કરી હતી, કારણ કે ટ્રાયલ કોર્ટના રેકોર્ડ્સ ગુજરાતીમાં હતા.

અમદાવાદ સિરિયલ બ્લાસ્ટમાં 56 લોકોના મોત થયા હતા

અમદાવાદમાં સિરિયલ બ્લાસ્ટ 26 જુલાઈ, 2008ના રોજ થયા હતા, જેમાં શહેરના વિવિધ ભાગોમાં અનેક વિસ્ફોટો થયા હતા. આ વિસ્ફોટોમાં 56 લોકોના મોત થયા હતા અને 200થી વધુ લોકો ઘાયલ થયા હતા. ફેબ્રુઆરી 2022માં, ગુજરાતની એક વિશેષ અદાલતે આ કેસમાં 49 આરોપીઓને દોષિત ઠેરવ્યા હતા. કોર્ટે તેમાંથી 38 લોકોને ફાંસીની અને 11 લોકોને આજીવન કેદની સજા સંભળાવી હતી, જ્યારે અન્ય 28 લોકોને નિર્દોષ જાહેર કર્યા હતા.

ત્યારબાદ, ગુજરાત હાઈકોર્ટે દોષિતો દ્વારા તેમની સજા સામે દાખલ કરવામાં આવેલી અપીલો તેમજ રાજ્ય દ્વારા માંગવામાં આવેલી ફાંસીની સજાની પુષ્ટિ અંગેની કાર્યવાહીની સુનાવણી કરી હતી. હાઈકોર્ટે 38 દોષિતોની સજા અને ફાંસીની સજાને યથાવત રાખી હતી. બરેલવીએ તે ચુકાદાને સુપ્રીમ કોર્ટમાં પડકાર્યો હતો.

હાઈકોર્ટે શું કહ્યું હતું? હાઈકોર્ટે દોષિતો દ્વારા દાખલ કરવામાં આવેલી તમામ અપીલો ફગાવી દીધી અને સ્પેશિયલ કોર્ટના ફેબ્રુઆરી 2022ના ચુકાદાને યથાવત રાખ્યો; આ ચુકાદામાં IM (ઇન્ડિયન મુજાહિદ્દીન) ના 38 સભ્યોને ફાંસીની અને અન્ય 11 સભ્યોને આજીવન કેદની સજા સંભળાવવામાં આવી હતી. રાજ્ય સરકારે ફાંસીની સજાની પુષ્ટિ કરવાની માંગ કરી હતી.

હાઈકોર્ટે જણાવ્યું હતું કે 38 દોષિતોનો ગુનાહિત ઇતિહાસ અને તેમની ભૂમિકાઓ એ સાબિત કરે છે કે તેમણે એવું આતંકવાદી કૃત્ય આચર્યું હતું જેના માટે ફાંસીની સજા યોગ્ય ઠરે છે.

Breaking News: ઇથોપિયામાં બંધક બનાવાયેલા 3 ગુજરાતીઓનો સરકારના પ્રયાસોથી ખંડણી વિના છૂટકારો, જુઓ Video