60 કરોડના છેતરપિંડીના કેસમાં ફસાયા શિલ્પા શેટ્ટી અને પતિ રાજ કુંદ્રા, શું બિઝનેસના નામે રમી રહ્યા છે રમત?

બોલિવૂડ અભિનેત્રી શિલ્પા શેટ્ટી અને તેના ઉદ્યોગપતિ પતિ રાજ કુન્દ્રા ફરી એકવાર મુશ્કેલીમાં મુકાયા છે. મુંબઈ પોલીસની આર્થિક ગુના શાખા (EOW) દ્વારા બંને પતિ-પત્ની સામે 60 કરોડ રૂપિયાના છેતરપિંડીના કેસમાં કેસ દાખલ કરવામાં આવ્યો છે. રાજ કુન્દ્રા સામે આ પહેલો છેતરપિંડીનો કેસ નથી. ડિસેમ્બર 2024માં પોર્નોગ્રાફિક ફિલ્મોના ગેરકાયદેસર વિતરણ સંબંધિત મની લોન્ડરિંગ કેસમાં ED દ્વારા તેમને સમન્સ પાઠવવામાં આવ્યા હતા.

બિઝનેસ વધારવા માટે પૈસા ઉધાર લીધા

મુંબઈની લોટસ કેપિટલ ફાઇનાન્શિયલ સર્વિસીસ લિમિટેડના ડિરેક્ટર અને ઉદ્યોગપતિ દીપક કોઠારીએ સેલિબ્રિટી કપલ સામે નાણાકીય છેતરપિંડીનો કેસ દાખલ કર્યો છે. કોઠારીએ આરોપ લગાવ્યો છે કે રાજ કુન્દ્રા અને શિલ્પા શેટ્ટીએ તેમના બિઝનેસ વધારવા માટે આ પૈસા ઉધાર લીધા હતા, પરંતુ તેમણે તે પૈસાનો ઉપયોગ પોતાના વ્યક્તિગત ખર્ચ માટે કર્યો હતો.

શું છે આખો મામલો?

FIRમાં ફરિયાદીએ દાવો કર્યો છે કે, શિલ્પા શેટ્ટી અને રાજ કુન્દ્રાએ 2015માં મધ્યસ્થી દ્વારા તેમની હવે બંધ થયેલી કંપની, બેસ્ટ ડીલ ટીવી પ્રાઇવેટ લિમિટેડ માટે ₹75 કરોડની લોન લેવા માટે તેમનો સંપર્ક કર્યો હતો. તે સમયે, શેટ્ટી અને કુન્દ્રા એક એવી કંપનીના ડિરેક્ટર હતા જે લાઇફસ્ટાઇલ પ્રોડક્ટ્સને પ્રમોટ કરવામાં નિષ્ણાત હતી અને ઓનલાઇન શોપિંગ પ્લેટફોર્મ ચલાવતી હતી. તેમણે આ રકમ પર વાર્ષિક 12 ટકાના દરે વ્યાજ ચૂકવવાનું પણ વચન આપ્યું હતું.

વચન આપેલા પૈસા પાછા ન મળ્યા

કોઠારીએ આરોપ લગાવ્યો કે પાછળથી દંપતીએ તેમને પૈસા લોનને બદલે રોકાણમાં રૂપાંતરિત કરવા વિનંતી કરી. બદલામાં તેઓએ દર મહિને મુદ્દલ તરીકે કેટલીક રકમ પરત કરવાનું વચન આપ્યું. આ પછી તેઓએ 2015 માં શેર સબ્સ્ક્રિપ્શન કરાર દ્વારા બે હપ્તામાં લગભગ 60 કરોડ રૂપિયા ટ્રાન્સફર કર્યા. આ રકમ બેસ્ટ ડીલ ટીવીના બેંક ખાતામાં જમા કરવામાં આવી હતી. આ રકમ અત્યાર સુધી પરત કરવામાં આવી નથી. તેમણે દાવો કર્યો કે પૈસા વસૂલવાના અનેક પ્રયાસો નિષ્ફળ ગયા છે અને દંપતી પર પોતાના ફાયદા માટે પૈસાનો “અપ્રમાણિકપણે ઉપયોગ” કરવાનો આરોપ લગાવ્યો છે.

સેલિબ્રિટી દંપતીના વકીલનું નિવેદન

શિલ્પા અને રાજના વકીલ પ્રશાંત પાટીલ કહે છે કે તેમના ક્લાયન્ટ પર ખોટા આરોપો લગાવીને તેમની છબી ખરાબ કરવાનો પ્રયાસ કરવામાં આવી રહ્યો છે. તેમણે કહ્યું, “મારા ગ્રાહકો વિરુદ્ધ મુંબઈની આર્થિક ગુના શાખામાં એક કથિત કેસ નોંધાયેલ છે. શરૂઆતમાં મારા ગ્રાહકો તેમની સામેના તમામ આરોપોને નકારી કાઢે છે, જે સંપૂર્ણપણે સિવિલ પ્રકૃતિના છે અને 04/10/2024 ના રોજ NCLT મુંબઈ દ્વારા તેનો નિર્ણય લેવામાં આવ્યો છે. આ એક જૂનો વ્યવહાર છે. જેમાં કંપની નાણાકીય કટોકટીમાં ગઈ અને અંતે NCLTમાં લાંબી કાનૂની લડાઈમાં ફસાઈ ગઈ છે.”

હિન્દી ફિલ્મ ઈન્ડસ્ટ્રી જેને બોલિવુડના નામથી ઓળખવામાં આવે છે. બોલિવૂડનું નામ અંગ્રેજી ફિલ્મ ઈન્ડસ્ટ્રી હોલીવુડની તર્જ પર રાખવામાં આવ્યું હતું. બોલિવુડના વધારે ન્યૂઝ જોવા માટે અહીં ક્લિક કરો.