Nawazuddin Siddiqui Happy Birthday : 15 વર્ષના સંઘર્ષે આજે નવાઝુદ્દીન સિદ્દીકીને બનાવ્યા ટોચ કક્ષાના અભિનેતા, જાણો તેના જીવન વિશે જોડાયેલી કેટલીક વાતો

નવાઝુદ્દીન સિદ્દીકીએ (Nawazuddin Siddiqui) બોલિવૂડમાં પોતાનું સ્થાન બનાવવા માટે ઘણો સંઘર્ષ કર્યો છે. આજે તે બોલિવૂડનો (Bollywood) જાણીતો એક્ટર છે. તેણે પોતાની અભિનય કૌશલ્યને આખી દુનિયામાં ફેલાવી છે. નાની ભૂમિકાઓથી શરૂ કરીને ફિલ્મોમાં મુખ્ય અભિનેતાની ભૂમિકા ભજવવા સુધી આજે બધું જ નવાઝુદ્દીનના પાસે આવી ગયું છે. વિવેચકો ઉપરાંત તેને દર્શકોનો પણ અપાર પ્રેમ મળ્યો છે. તેમની અભિનય માટે તેમને ઘણા પુરસ્કારોથી પણ નવાજવામાં આવ્યા છે. હવે હોલીવુડમાં પણ તેની ફેન ફોલોઈંગ વધી રહી છે. આજે તે પોતાનો જન્મદિવસ ઉજવી રહ્યો છે. તેમના જન્મદિવસ પર આજે અમે તમને તેમના જીવન સાથે જોડાયેલી કેટલીક વાતો જણાવવા જઈ રહ્યા છીએ, જેના વિશે બહુ ઓછા લોકો જાણતા હશે.

જાણો નવાઝુદ્દીન સિદ્દીકીની લાઈફ

નવાઝુદ્દીન સિદ્દીકીનો જન્મ ઉત્તર પ્રદેશના મુઝફ્ફરનગર જિલ્લાના બુધના શહેરમાં એક મુસ્લિમ પરિવારમાં થયો હતો. તેના પિતા ખેડૂત છે. તેને સાત ભાઈઓ અને બે બહેનો છે. તેણે ઉત્તરાખંડના હરિદ્વારની ગુરુકુલ કાંગરી યુનિવર્સિટીમાંથી વિજ્ઞાનમાં ગ્રેજ્યુએશન કર્યું છે. ત્યારબાદ તેણે પેટ્રોકેમિકલ કંપનીમાં રસાયણશાસ્ત્રી તરીકે કામ કરવાનું પણ શરૂ કર્યું, પરંતુ કદાચ તેને આ વસ્તુઓ કરવાનું મન ન થયું. આ પછી તેણે દિલ્હીની નેશનલ સ્કૂલ ઓફ ડ્રામામાંથી થિયેટરમાં ગ્રેજ્યુએશન પૂરું કર્યું. નવાઝુદ્દીન સિદ્દીકીએ વર્ષ 2009માં જ આલિયા સિદ્દીકી સાથે લગ્ન કર્યા હતા. તેને શોરા અને યાની સિદ્દીકી નામની બે છોકરીઓ છે.

નવાઝુદ્દીન સિદ્દીકીની કારકિર્દીની શરૂઆત ‘શૂલ’ અને ‘સરફરોશ’ જેવી મોટી ફિલ્મોથી થઈ હતી પરંતુ તે નાના રોલમાં જોવા મળ્યો હતો. તેમની ભૂમિકા ખૂબ જ મર્યાદિત સમય માટે દર્શાવવામાં આવી હતી. આ બંને ફિલ્મો પછી નવાઝુદ્દીને ઘણી નાની-મોટી ફિલ્મોમાં કામ કર્યું પરંતુ તેને વાસ્તવિક ઓળખ ફિલ્મ ‘પીપલી લાઈવ’, ‘કહાની’, ‘ગેંગ્સ ઓફ વાસેપુર’ અને ‘ધ લંચબોક્સ’થી મળી. તેને પંદર વર્ષના સંઘર્ષનું પરિણામ મળવા લાગ્યું. સતત સંઘર્ષ બાદ તે હવે એક સફળ અભિનેતા બની ગયો છે. આજે તેણે ઈન્ડસ્ટ્રીના તમામ મોટા સુપરસ્ટાર્સ એટલે કે સલમાન ખાન, શાહરૂખ ખાન અને આમિર ખાન સાથે કામ કર્યું છે. તેણે કહાની, બોમ્બે ટોકીઝ, કિક, માંઝી-ધ માઉન્ટેનમેન, રઈસ, મંટો, ઠાકરે અને ફોટોગ્રાફ સહિત ઘણી ફિલ્મોમાં પોતાના અભિનય કર્યો છે. આ ઉપરાંત તેની યાદીમાં ઘણી વધુ ફિલ્મોનો સમાવેશ થાય છે.

અત્યાર સુધી મેળવ્યા છે ઘણા એવોર્ડ

નવાઝુદ્દીન સિદ્દીકીને ‘લંચબોક્સ’ માટે બેસ્ટ સપોર્ટિંગ એક્ટરનો એવોર્ડ મળ્યો હતો. આ સિવાય તેને તલાશ, કહાની, ગેંગ્સ ઓફ વાસેપુર અને દેખ ઈન્ડિયન સર્કસ માટે નેશનલ એવોર્ડથી નવાજવામાં આવ્યા છે. તેમના પુરસ્કારોની યાદીમાં IIFA એવોર્ડ્સ, સ્ક્રીન એવોર્ડ્સ, ઝી સિને એવોર્ડ્સ, રેનોલ્ટ સ્ટાર ગિલ્ડ એવોર્ડ્સ અને એશિયા પેસિફિક સ્ક્રીન એવોર્ડ્સનો સમાવેશ થાય છે. જેનાથી તેમને સન્માનિત કરવામાં આવ્યા છે.