ધોરણ 11-12ની વિદ્યાર્થીનીઓ માટે સુવર્ણ તક: CBSE સ્કોલરશિપ 2025 માટે શું છે લાયકાતના માપદંડ? જાણો વિગતે

દેશભરની વિદ્યાર્થિનીઓ માટે સારા સમાચાર! CBSE એ સિંગલ ગર્લ ચાઈલ્ડ મેરિટ શિષ્યવૃત્તિ યોજના માટે ઓનલાઈન અરજી આપવાનું શરૂ કર્યું છે. આ યોજના એવી છોકરીઓ માટે છે જેમણે ધોરણ 10ની બોર્ડ પરીક્ષામાં ઉત્તમ પ્રદર્શન કર્યું છે અને હાલમાં ધોરણ 11 અને 12માં અભ્યાસ કરી રહી છે. મેરિટ ધરાવતી છોકરીઓને આ CBSE શિષ્યવૃત્તિનો લાભ મળશે. અરજી પ્રક્રિયા શરૂ થઈ ગઈ છે, તો જલદી અરજી કરો!

Manish Gangani | Updated on: Sep 26, 2025 | 7:08 PM

CBSE એ સિંગલ ગર્લ ચાઈલ્ડ મેરિટ સ્કોલરશિપ યોજના માટે ઓનલાઈન પોર્ટલ ઓપન કર્યું છે. આ શિષ્યવૃત્તિ યોજના ખાસ કરીને મેરિટર્સ છોકરીઓ માટે છે જેમણે CBSE બોર્ડમાંથી ધોરણ 10 પાસ કર્યું છે અને હવે ધોરણ 11 અને 12માં અભ્યાસ કરી રહી છે. અરજી કરવાની છેલ્લી તારીખ 23 ઓક્ટોબર, 2025 છે.

CBSE સિંગલ ગર્લ ચાઈલ્ડ મેરિટ શિષ્યવૃત્તિ યોજનાનો હેતુ છોકરીઓના શિક્ષણને પ્રોત્સાહન આપવાનો છે. તે એવા પરિવારોને પ્રોત્સાહિત કરે છે જેઓ તેમની એકમાત્ર પુત્રીના શિક્ષણને પ્રાથમિકતા આપે છે. આ શિષ્યવૃત્તિ માટે લાયક બનવા માટે, છોકરીઓએ ધોરણ 10 ની બોર્ડ પરીક્ષામાં ઓછામાં ઓછા 70% ગુણ મેળવ્યા હોવા જોઈએ અને ધોરણ 11 અને 12 માં આગળનો અભ્યાસ કરી રહી હોવી જોઈએ.

આ વર્ષે, આ યોજના બે કેટેગરી માટે છે

સ્કોલરશિપ 2025: 2025માં ધોરણ 10 પાસ કરી ચૂકેલી અને હવે ધોરણ 11માં અભ્યાસ કરતી કન્યા વિદ્યાર્થીઓ માટે.
રિન્યુઅલ 2024: જે છોકરીઓ માટે જેમણે ગયા વર્ષે આ શિષ્યવૃત્તિનો લાભ લીધો હતો અને હવે તે આગળ ચાલુ રાખવા માંગે છે.

લાયકાતના માપદંડ શું છે?

છોકરી તેના માતાપિતાનું એકમાત્ર સંતાન હોવું જોઈએ.
10માં 70% કે તેથી વધુ માર્કસ મેળવ્યા હોવા જોઈએ.
તે CBSE-સંલગ્ન શાળામાં અભ્યાસ કરતી હોવી જોઈએ.
ધોરણ 10 સુધીની ટ્યુશન ફી દર મહિને 2,500 રૂપિયાથી વધુ ન હોવી જોઈએ. 11મી-12માં, આ મર્યાદા દર મહિને રૂ. 3,000 છે (NRI ગર્લ સ્ટુડન્ટ્સને રૂ. 6,000 સુધીની છૂટ છે).
પરિવારની વાર્ષિક આવક ₹8 લાખથી વધુ ન હોવી જોઈએ.
સારું વર્તન અને નિયમિત હાજરી પણ જરૂરી છે.

શું લાભ મળશે?

પસંદ કરાયેલા વિદ્યાર્થીઓને દર મહિને ₹500 સુધીની સ્કોલરશિપ મળશે. આ સ્કોલરશિપ મહત્તમ બે વર્ષ સુધી ચાલશે. જો વિદ્યાર્થીએ 11મા ધોરણમાં 70% કે તેથી વધુ માર્ક્સ મેળવ્યા હોય અને તે 12મા ધોરણમાં જશે, તો જ તેનું રિન્યુઅલ કરવામાં આવશે.

કેવી રીતે અરજી કરવી?

અરજી ફક્ત ઓનલાઈન સબમિટ કરવાની રહેશે. વિદ્યાર્થી જ્યાં અભ્યાસ કરી રહ્યો છે તે શાળા અરજીની ચકાસણી કરશે. જો અરજી અધૂરી હોય અથવા શાળા દ્વારા ચકાસાયેલ ન હોય, તો તે સ્વીકારવામાં આવશે નહીં. અરજી પ્રક્રિયા દરમિયાન માતાપિતાએ તેમની આવકનું સોગંદનામું અને ફી સ્લિપ પણ અપલોડ કરવાની રહેશે.