Valsad : આંતરરાજય વાહનચોર ગેંગનો પર્દાફાશ, 3 આરોપીની ધરપકડ
પૂર્વીય રાજ્યોમાં ભંગાર થયેલ વાહનોના ચેસીઝ નંબર અને એન્જીન નંબર મેળવી દમણમાં પાસિંગ કરતી આ ગેંગનું નેટવર્ક સમગ્ર ભારતમાં ફેલાયેલું છે.
વલસાડ જિલ્લા એલસીબી પોલીસને એક મોટી સફળતા મળી છે. કરોડો રૂપિયાની કિંમતના ચોરી કરેલા મોટા વાહનો સાથે આંતરરાજ્ય વાહનચોર ગેંગના ૩ સાગરીતોને ઝડપી લીધા છે. પોલીસની આ કાર્યવાહીમાં અત્યાર સુધી 1.14 કરોડ રૂપિયાનો મુદ્દામાલ જપ્ત કરી અને દેશના વિવિધ રાજ્યોમાં થયેલા મોટા વાહનોની ચોરીના અનેક ગુનાઓના ભેદ ઉકેલવામાં વલસાડ જિલ્લા પોલીસને સફળતા મળી છે.
તો હજુ પણ આગામી સમયમાં વાહન ચોરીના અનેક ગુનાઓના ભેદ ઉકેલવાની શકયતા સેવાઈ રહી છે. પૂર્વીય રાજ્યોમાં ભંગાર થયેલ વાહનોના ચેસીઝ નંબર અને એન્જીન નંબર મેળવી દમણમાં પાસિંગ કરતી આ ગેંગનું નેટવર્ક સમગ્ર ભારતમાં ફેલાયેલું છે.
વલસાડ જિલ્લા પોલીસ વડા ડૉ રાજદીપસિંહ ઝાલા અને વલસાડ એલસીબીની ટીમને છેલ્લા કેટલાક સમયથી જિલ્લામાં એક મોટી આંતરરાજ્ય વાહનચોર ગેંગ સક્રિય હોવાની બાતમી મળી હતી. ત્યારથી જ વલસાડ જિલ્લાની પોલીસ આ આંતરરાજ્ય ગેંગને ઝડપવા તપાસમાં હતી. એ દરમિયાન જ એલસીબીની ટીમને મળેલી બાતમીને આધારે એલસીબી પીઆઇ જે. એન.ગૌસ્વામી અને તેમની ટીમે વાપી નજીક અમદાવાદ-મુંબઈ નેશનલ હાઈવે પરથી ત્રણ શંકાસ્પદ વ્યક્તિઓની અટકાયત કરી હતી.
અને ત્યારબાદ તેમની આગવી ઢબે સરભરા કરી પૂછપરછ કરતા એક મસમોટું આંતરરાજ્ય વાહન ચોરીનું રેકેટ ઝડપાયું હતું.આરોપીઓની અત્યાર સુધીની પૂછપરછ કરતાં જે હકીકત બહાર આવી છે. તે જાણીને ખુદ પોલીસ પણ ચોંકી ગઈ હતી.પોલીસે અત્યારે આરોપીઓ પાસેથી દેશભરના વિવિધ રાજ્યોમાંથી ચોરી કરેલા 13 મોટા આઈસર ટેમ્પો અને 2 કાર મળી કુલ 15 વાહનો કબજે કર્યા છે. અને રૂપિયા 1.14 કરોડના મુદ્દામાલ સાથે 3 આરોપીઓની ધરપકડ કરી છે.
વાહન ચોરીના રેકેટમાં ઝડપાયેલા આરોપીઓ મોહમ્મદ સલમાન મહંમદ શકીલ,મહમૂદ રમઝાન ખાન અને મોહમ્મદ જાબીર અબ્દુલ ગફાર શેખ નામના ત્રણેય આરોપીઓ ભારતના વિવિધ રાજ્યોમાંથી મોટેભાગે બ્રાઉન કલરના આઇશર ટેમ્પો અને કાર જેવા મોટા વાહનોની ચોરી કરતા હતા. ત્યારબાદ દેશના પૂર્વીય રાજ્યોમાંથી વાહન ચોરી કર્યા બાદ ટોટલ લોસમાં ગયેલા વાહનોની આર.સી બુક મેળવતા હતા.
ત્યારબાદ આ વાહનોના ચેચીસ અને એન્જિન સાથે છેડછાડ કરી એનકેન પ્રકારે પૂર્વોત્તર રાજ્યો એટલેકે નાગાલેન્ડ,મિઝોરમ અને અરૂણાચલ જેવા રાજ્યોના આરટીઓમાંથી એન.ઓ.સી મેળવી લેતા હતા. અને ત્યારબાદ પૂર્વોત્તરના રાજ્યોમાંથી હજારો કિલોમીટર દૂર આવેલા સંઘપ્રદેશ દમણના આર.ટી.ઓ વિભાગમાં તે ચોરીના વાહનોનું રજીસ્ટ્રેશન કરાવી અને તેને વેચી મારતા હતા.આ ભેજાબાજ વાહનચોર ગેંગએ અત્યાર સુધી અનેક વાહન ચોરીના ગુનાઓને અંજામ આપ્યા છે.
પોલીસે અત્યારે દેશના વિવિધ રાજ્યોમાંથી ચોરી કરેલા બ્રાઉન કલરના 13 આઇશર ટેમ્પો અને 2 કાર મળી ચોરીના કુલ 15 વાહનો કબજે કર્યા છે. જેની કુલ કિંમત 1.14 કરોડથી વધુ થાય છે.
Latest News Updates
