PF એકાઉન્ટમાં નામ કે જન્મતારીખ ખોટી છે? ઓફિસના ધક્કા ખાધા વગર ઘરે બેઠા આ રીતે સુધારો

ઇપીએફઓ (EPFO) એટલે કે એમ્પ્લોઇઝ પ્રોવિડન્ટ ફંડ ઓર્ગેનાઇઝેશનના સભ્યો માટે એક મહત્વના સમાચાર છે. જો કોઈ કર્મચારીની EPF પ્રોફાઇલમાં ખોટી માહિતી નોંધાઈ ગઈ હોય, તો તેને સરળતાથી સુધારી શકાય છે. આ માટે પરેશાન થવાની કે વારંવાર ઓફિસના ધક્કા ખાવાની બિલકુલ જરૂર નથી. તમે ઘરે બેઠા જ આ સુધારો કરી શકો છો.

મીડિયા અહેવાલ અનુસાર, ઘણી વખત નોકરી બદલવા, જૂના રેકોર્ડ અથવા ટાઈપિંગની ભૂલને કારણે EPF એકાઉન્ટમાં નામ, જન્મતારીખ, જેન્ડર (જાતિ), પિતાનું નામ, જોઈનિંગ ડેટ (નોકરી શરૂ કર્યાની તારીખ) અથવા અન્ય માહિતી ખોટી નોંધાઈ જાય છે. આવી સ્થિતિમાં આગળ જતાં પીએફ ઉપાડવા, ટ્રાન્સફર કરવા કે પેન્શન સંબંધિત કામોમાં મુશ્કેલી આવી શકે છે. આથી, EPFOએ સભ્યોને સમયસર પોતાની પ્રોફાઇલની વિગતો ચકાસી લેવા અને જરૂર જણાય તો તેમાં સુધારો કરાવી લેવાની સલાહ આપી છે.

अगर आपके ईपीएफ प्रोफाइल में कोई गलत विवरण दर्ज हो गया है, तो चिंता की कोई बात नहीं—आप इसे आसानी से सही कर सकते हैं।#EPFO #EPFOWithYou #HumHainNa @narendramodi @mansukhmandviya @ShobhaBJP @PMOIndia @LabourMinistry @PIB_India @mygovindia pic.twitter.com/vGUi5KcssE

— EPFO (@officialepfo) May 27, 2026

EPFOના જણાવ્યા અનુસાર, સભ્યો યુનિફાઇડ મેમ્બર પોર્ટલ (Unified Member Portal) પર લોગિન કરીને પોતાની પ્રોફાઇલની વિગતો જોઈ શકે છે. જો કોઈ માહિતી ખોટી હોય, તો તેને સુધારવા માટે ઓનલાઈન રિક્વેસ્ટ મોકલી શકાય છે. ઘણા કિસ્સાઓમાં આધાર વેરિફિકેશન (Aadhaar Verification) દ્વારા આ ફેરફાર સરળતાથી થઈ જાય છે. જો કે, કેટલાક કિસ્સાઓમાં એમ્પ્લોયર (કંપની)ની મંજૂરીની જરૂર પડી શકે છે.

અત્રે ઉલ્લેખનીય છે કે, પ્રોફાઇલમાં નોંધાયેલી માહિતી આધાર કાર્ડ સાથે મેચ થવી ખૂબ જ જરૂરી છે. જો નામ, જન્મતારીખ કે જેન્ડર જેવી માહિતી આધાર કાર્ડ કરતાં અલગ હશે, તો ક્લેમ પ્રોસેસ (પીએફ પાસ થવાની પ્રક્રિયા)માં વિલંબ થઈ શકે છે. આથી જ EPFOએ સલાહ આપી છે કે, સભ્યો સૌથી પહેલાં પોતાના આધાર અને EPF રેકોર્ડને એકસમાન રાખે.

EPFOએ એ પણ સ્પષ્ટ કર્યું છે કે, પ્રોફાઇલ અપડેટ કરવાની આ પ્રક્રિયા હવે સંપૂર્ણપણે ડિજિટલ થઈ ગઈ છે. આનાથી કર્મચારીઓને લાંબી લાઈનોમાં ઊભા રહેવામાંથી કે ઓફિસના ધક્કા ખાવામાંથી મોટી રાહત મળી છે. હવે તેઓ ઘરે બેઠા જ પોતાની માહિતી ચકાસી અને અપડેટ કરી શકે છે.

આ સાથે જ EPFOએ લોકોને સાવધ રહેવાની પણ અપીલ કરી છે. સંગઠને જણાવ્યું છે કે, પ્રોફાઇલ અપડેટ કે કેવાયસી (KYC) સુધારવાના નામે કોઈ અજાણી લિંક પર ક્લિક ન કરવું અને પોતાની અંગત માહિતી કોઈની સાથે શેર ન કરવી. આ માટે માત્ર EPFOની સત્તાવાર વેબસાઇટ અને પોર્ટલનો જ ઉપયોગ કરવો.

PFના પૈસા અટવાયા છે કે ટ્રાન્સફર કરવામાં મુશ્કેલી આવી રહી છે ? ઘરે બેઠા આ રીતે નોંધાવો ફરિયાદ, તરત જ આવશે ‘ઉકેલ’