RILના શેર એક્સ-ડિવિડન્ડ થશે, જાણો રોકાણકારો ઉપર શું પડશે અસર
RILની 45મી એજીએમ 29 ઓગસ્ટના રોજ યોજાવાની છે. આ બેઠક બપોરે 2 વાગ્યે વીડિયો કોન્ફરન્સિંગ દ્વારા યોજાશે. આ બેઠકમાં ડિવિડન્ડ પર મહોર લાગવાની ધારણા છે.
દેશની સૌથી મોટી કંપની રિલાયન્સ ઇન્ડસ્ટ્રીઝ(RIL)ના શેર આ સપ્તાહે સ્ટોક એક્સચેન્જમાં એક્સ-ડિવિડન્ડ(Ex-dividend) બની જશે. એટલે કે, જો તમે રિલાયન્સ ઈન્ડસ્ટ્રીઝના ડિવિડન્ડનો લાભ લેવા ઈચ્છો છો તો આ તારીખ તમારા માટે ખૂબ જ મહત્વપૂર્ણ છે. રિલાયન્સ ઇન્ડસ્ટ્રીઝે નાણાકીય વર્ષ 2022 માટે રૂ. 10ની ફેસ વેલ્યુ પર 8 રૂપિયાના ડિવિડન્ડની જાહેરાત કરી છે. આગામી સપ્તાહે રિલાયન્સ ઈન્ડસ્ટ્રીઝની એજીએમ છે જેમાં ડિવિડન્ડના નિર્ણય પર મહોર લાગી શકે છે. કંપનીના જણાવ્યા અનુસાર એજીએમના એક સપ્તાહની અંદર ડિવિડન્ડનું વિતરણ કરવાની યોજના છે.નફો કરતી કંપનીઓ આ નફામાંથી કેટલોક ભાગ તેમના શેરધારકોને વહેંચે છે તેને ડિવિડન્ડ કહેવામાં આવે છે.
RIL ની ડિવિડન્ડ યોજના શું છે
આ મહિનાની શરૂઆતમાં જૂન ક્વાર્ટરના પરિણામોની જાહેરાત કરતી વખતે કંપનીએ માહિતી આપી હતી કે કંપનીએ નાણાકીય વર્ષ 2021-22 માટે ડિવિડન્ડ ચુકવણી માટે 19 ઓગસ્ટની રેકોર્ડ ડેટ નક્કી કરી છે. આવી સ્થિતિમાં આજકાલમાં સ્ટોક એક્સ-ડિવિડન્ડ બની જશે. RILની 45મી એજીએમ 29 ઓગસ્ટના રોજ યોજાવાની છે. આ બેઠક બપોરે 2 વાગ્યે વીડિયો કોન્ફરન્સિંગ દ્વારા યોજાશે. આ બેઠકમાં ડિવિડન્ડ પર મહોર લાગવાની ધારણા છે.
ડિવિડન્ડ શું છે
સરળ શબ્દોમાં કહીએ તો લાંબા ગાળાના રોકાણકારો માટે ડિવિડન્ડ આવકનો બીજો સ્ત્રોત છે. નફો કરતી કંપનીઓ આ નફામાંથી કેટલોક ભાગ તેમના શેરધારકોને વહેંચે છે. નિયમો મુજબ ડિવિડન્ડનું વિતરણ ફરજિયાત નથી. કંપનીઓ તેમની ગણતરીના આધારે તેની જાહેરાત કરે છે. સામાન્ય રીતે કંપનીઓ રોકાણકારોને સ્થિર પ્રદર્શન કરતા શેર તરફ આકર્ષવા માટે ડિવિડન્ડ જાહેર કરે છે. ઘણી કંપનીઓ જે ડિવિડન્ડ સ્ટોક તરીકે પ્રખ્યાત છે તેઓ તેમના રોકાણકારોને આખા વર્ષ દરમિયાન એટલું ડિવિડન્ડ આપે છે જે બેંક એફડીમાં પણ ઉપલબ્ધ નથી. આ કંપનીઓમાં REC, સ્ટીલ ઓથોરિટી, કોલ ઈન્ડિયા જેવા નામ સામેલ છે.
એક્સ-ડિવિડન્ડ અને રેકોર્ડ ડેટ શું છે?
રેકોર્ડ તારીખનો અર્થ એ છે કે જ્યાં સુધી શેર જેના નામે છે તે શેર સંબંધિત લાભ મેળવશે. જો 19 ઓગસ્ટ ડિવિડન્ડની રેકોર્ડ ડેટ નક્કી થાય છે, તો 19મીએ જે વ્યક્તિના નામે શેર છે તેને ડિવિડન્ડ મળશે. એક્સ-ડિવિડન્ડની તારીખ રેકોર્ડ ડેટના એક દિવસ પહેલા રાખવામાં આવે છે. એટલે કે, જો તમે ડિવિડન્ડની તારીખે અથવા તેના પછી શેર ખરીદવાનો સોદો કર્યો હોય તો તમને ડિવિડન્ડનો લાભ નહીં મળે. વાસ્તવમાં ડીલ્સ T+2 ધોરણે છે તેથી જો તમે 18મીએ સ્ટોક ખરીદવાનો સોદો કર્યો હોય તો તમને 20મીએ સ્ટોકની ડિલિવરી મળશે. એટલે કે રેકોર્ડ ડેટ પર તમારા નામે કોઈ શેર ન હતો. એટલે કે, જો તમે ડિવિડન્ડનો લાભ લેવા માંગતા હો, તો તમારે એક્સ-ડિવિડન્ડની તારીખ પહેલાં શેર ખરીદવા પડશે.
