વિદેશી રોકાણકારો ફરી ભારતીય બજાર તરફ વળ્યાં, ઓગસ્ટના પ્રથમ સપ્તાહમાં ખરીદ્યા 14 હજાર કરોડના શેર
જિયોજિત ફાઇનાન્શિયલ સર્વિસિસના ચીફ ઇન્વેસ્ટમેન્ટ સ્ટ્રેટેજિસ્ટ વીકે વિજયકુમારે જણાવ્યું હતું કે ડૉલર ઇન્ડેક્સ ગયા મહિને 109ની ઊંચી સપાટીથી ઘટીને 106 પર આવી ગયો છે
ડૉલર ઇન્ડેક્સ(Dollar Index)માં નરમાશ વચ્ચે વિદેશી રોકાણકારો(Foreign investors)એ ભારતીય ઇક્વિટી પર તેમનો સકારાત્મક દૃષ્ટિકોણ ચાલુ રાખ્યો હતો. તેમણે ઓગસ્ટના પ્રથમ સપ્તાહમાં રૂ. 14,000 કરોડથી વધુનું રોકાણ કર્યું છે. અગાઉ જુલાઈમાં પણ વિદેશી રોકાણકારો ખરીદદાર રહ્યા હતા. ડિપોઝિટરી ડેટા અનુસાર વિદેશી પોર્ટફોલિયો રોકાણકારો (FPIs) એ જુલાઈમાં આશરે રૂ. 5,000 કરોડનું ચોખ્ખું રોકાણ કર્યું હતું. આ રીતે એપ્રિલના પ્રથમ સપ્તાહમાં FPIsનું કુલ રોકાણ જુલાઈ મહિનાના સમગ્ર રોકાણ કરતાં વધુ રહ્યું છે. ભારતીય શેરબજારમાં વૃદ્ધિનો ટ્રેન્ડ યથાવત છે જેના કારણે ફરી એકવાર વિદેશી રોકાણકારો દ્વારા રોકાણમાં વધારો થયો હોવાનું અનુમાન છે.
સતત નવ મહિના ઉપાડ કર્યો હતો
FPIsએ સતત નવ મહિનાના જંગી નેટ આઉટફ્લો પછી જુલાઈમાં ખરીદી કરી હતી. આ પહેલા ગયા વર્ષે ઓક્ટોબરથી તેની સતત વેચવાલી હતી. ઑક્ટોબર 2021 અને જૂન 2022 ની વચ્ચે તેણે ભારતીય ઇક્વિટી માર્કેટમાં 2.46 લાખ કરોડ રૂપિયાનું વેચાણ કર્યું હતું.
યસ સિક્યોરિટીઝના સંસ્થાકીય ઇક્વિટીઝના મુખ્ય વિશ્લેષક હિતેશ જૈને જણાવ્યું હતું કે, ઓગસ્ટ દરમિયાન FPI નાણાપ્રવાહ હકારાત્મક રહેવાની ધારણા છે કારણ કે રૂપિયા માટે સૌથી ખરાબ સ્થિતિ પૂરી થઈ ગઈ છે અને ક્રૂડ પણ ઘટી રહ્યું છે. FPI વ્યૂહરચનામાં ફેરફારને કારણે તાજેતરમાં બજારમાં જોરદાર રેલી જોવા મળી છે.
નિષ્ણાતોનું અનુમાન
જિયોજિત ફાઇનાન્શિયલ સર્વિસિસના ચીફ ઇન્વેસ્ટમેન્ટ સ્ટ્રેટેજિસ્ટ વીકે વિજયકુમારે જણાવ્યું હતું કે ડૉલર ઇન્ડેક્સ ગયા મહિને 109ની ઊંચી સપાટીથી ઘટીને 106 પર આવી ગયો છે જે FPI ના પ્રવાહ માટેનું મુખ્ય પરિબળ છે. તેમણે કહ્યું કે આ ટ્રેન્ડ ચાલુ રહી શકે છે. એફપીઆઈ કેપિટલ ગુડ્સ, એફએમસીજી, કન્સ્ટ્રક્શન અને પાવર જેવા સેક્ટરમાં રોકાણ કરી રહ્યા છે.
આ ઉપરાંત, FPIs એ સમીક્ષા હેઠળના સમયગાળા દરમિયાન ડેટ માર્કેટમાં રૂ. 230 કરોડનું ચોખ્ખું રોકાણ કર્યું છે.
આ સિવાય તમને જણાવી દઈએ કે સેન્સેક્સની ટોચની 10 કંપનીઓમાંથી 8ની માર્કેટ મૂડી (MCap) ગયા સપ્તાહે સામૂહિક રીતે 1,91,622.95 કરોડ રૂપિયા વધી છે. બજાજ ફાઇનાન્સ અને ટાટા કન્સલ્ટન્સી સર્વિસિસ (TCS) સૌથી વધુ નફાકારક રહ્યા છે. ગયા અઠવાડિયે, 30 શેરો ધરાવતો BSE સેન્સેક્સ 1,498.02 પોઈન્ટ અથવા 2.67 ટકા વધ્યો છે. સેન્સેક્સ કંપનીઓમાં બજાજ ફાઇનાન્સનું માર્કેટ કેપિટલાઇઝેશન રૂ. 57,673.19 કરોડ વધીને રૂ. 4,36,447.88 કરોડ થયું છે.
છેલ્લા સપ્તાહનો કારોબાર કેવો રહ્યો ?
શેરબજારમાં વૃદ્ધિનો ટ્રેન્ડ યથાવત છે, ફરી એકવાર વિદેશી રોકાણકારો દ્વારા રોકાણમાં વધારો થયો છે. ડોલર સામે રૂપિયામાં મજબૂતી, ક્રૂડ ઓઈલમાં ઘટાડા સાથે કંપનીઓના સારા પરિણામના સંકેતો સુધર્યા છે, જેના કારણે રોકાણકારો હવે બજારમાં ખરીદી કરી રહ્યા છે. અને આ જ કારણસર આ સપ્તાહે શેરબજારમાં તેજી જારી રહી હતી. સપ્તાહની શરૂઆતમાં બજારમાં જોરદાર ઉછાળો જોવા મળ્યો હતો. જો કે, પાછળથી તેના ઉતાર-ચઢાવ આવ્યા. જોકે સપ્તાહના અંતે બજાર નફા સાથે બંધ થયું હતું.