સિમેન્ટ ઉદ્યોગમાં અદાણીને ટક્કર આપવા બિરલા ગ્રૂપે બનાવ્યો પ્લાન, રૂ.3,954 કરોડના આ સોદાને આપી મંજૂરી
બિરલા ગ્રૂપની સિમેન્ટ કંપની અલ્ટ્રાટેક એક સિમેન્ટ કંપનીનો વધારાનો 32.72 ટકા હિસ્સો રૂ. 3,954 કરોડમાં ખરીદશે. આદિત્ય બિરલા ગ્રૂપની કંપનીના બોર્ડ ઓફ ડિરેક્ટર્સે આ પ્રસ્તાવને મંજૂરી આપી હતી. અલ્ટ્રાટેકે રવિવારે શેરબજારોને આ માહિતી આપી હતી.
બિરલા ગ્રૂપની સિમેન્ટ કંપની અલ્ટ્રાટેક ઈન્ડિયા સિમેન્ટ લિમિટેડ (ICL)નો વધારાનો 32.72 ટકા હિસ્સો રૂ. 3,954 કરોડમાં ખરીદશે. આદિત્ય બિરલા ગ્રૂપની કંપનીના બોર્ડ ઓફ ડિરેક્ટર્સે રવિવારે ઈન્ડિયા સિમેન્ટ લિમિટેડના પ્રમોટર્સનો 32.72 ટકા હિસ્સો 390 રૂપિયા પ્રતિ શેરના ભાવે ખરીદવાના પ્રસ્તાવને મંજૂરી આપી હતી. અલ્ટ્રાટેકે રવિવારે શેરબજારોને આ માહિતી આપી હતી.
સ્ટોક એક્સચેન્જોને આપવામાં આવેલી માહિતી અનુસાર, પ્રમોટર પરિવાર અને શ્રીનિવાસન એન અને ગુરુનાથની આગેવાની હેઠળની હોલ્ડિંગ સંસ્થાઓ પાસેથી ICLની ઇક્વિટી શેર મૂડીના 32.72 ટકા ખરીદવા માટે ત્રણ શેર ખરીદી કરાર પર હસ્તાક્ષર કરવામાં આવ્યા છે.
અલ્ટ્રાટેકનો હિસ્સો 55 ટકાથી વધી જશે
રૂપિયા 3,954 કરોડનો સોદો પૂરો થયા બાદ ICLમાં અલ્ટ્રાટેકનો હિસ્સો 55 ટકાથી વધી જશે. આવી સ્થિતિમાં તેણે સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયાના નિયમો અનુસાર ઓપન ઓફર કરવી પડશે. અલ્ટ્રાટેકના બોર્ડ ઓફ ડિરેક્ટર્સે જાહેર શેરધારકો તરફથી ઈક્વિટી શેર દીઠ રૂ. 390ના ભાવે ઓપન ઓફરને પણ મંજૂરી આપી છે. આ ભાવ ગયા શુક્રવારે ICL શેરના રૂ. 374.60ના બંધ ભાવ કરતાં 4.1 ટકા વધુ છે.
અદાણી ગ્રુપ ઈન્ડસ્ટ્રીના બાદશાહ બનવાની રેસમાં
ગયા મહિને અદાણી જૂથની કંપની અંબુજા સિમેન્ટ્સે પેન્ના સિમેન્ટ ઇન્ડસ્ટ્રીઝ લિમિટેડ (PCIL)ને રૂ. 10,422 કરોડમાં હસ્તગત કરવાની જાહેરાત કરી હતી. આ ડીલમાં દક્ષિણ ભારતમાં સિમેન્ટ સેક્ટરમાં અદાણી ગ્રૂપના માર્કેટ શેરમાં વધારો જોવા મળ્યો હતો. આ ઉપરાંત તે સોદાને કારણે અંબુજા સિમેન્ટ્સ પણ શ્રીલંકામાં પ્રવેશ કરી શકશે, PCILની એક પેટાકંપની પહેલેથી જ ત્યાં છે. કહેવાય છે કે આ ડીલથી અદાણી ગ્રુપની કંપનીને પણ પૂરતા પ્રમાણમાં લાઈમસ્ટોન રિઝર્વ મળી શકશે. આનાથી નાણાકીય વર્ષ 2027-28 સુધીમાં વાર્ષિક 14 કરોડ ટનની ક્ષમતા હાંસલ કરવાના અંબુજા સિમેન્ટ્સના લક્ષ્યાંકને હાંસલ કરવામાં મદદ મળશે.
અદાણી ગ્રુપ વિઝન સાથે આગળ વધી રહ્યું છે
અદાણી ગ્રુપે સપ્ટેમ્બર 2022માં સ્વિસ કંપની હોલ્સિમ પાસેથી અંબુજા સિમેન્ટ્સ હસ્તગત કરીને સિમેન્ટ બિઝનેસમાં પ્રવેશ કર્યો હતો. ACC લિમિટેડમાં અંબુજા સિમેન્ટ્સ પણ 51 ટકા હિસ્સો ધરાવે છે. કંપનીએ ગયા ડિસેમ્બરમાં સૌરાષ્ટ્ર સ્થિત સાંઘી ઇન્ડસ્ટ્રીઝ લિમિટેડને રૂ. 5,185 કરોડના એન્ટરપ્રાઇઝ મૂલ્યમાં પણ હસ્તગત કરી હતી. વર્ષ 1991માં સ્થપાયેલ PCILનું નાણાકીય વર્ષ 2023-24માં રૂ. 1,241 કરોડનું સંકલિત ટર્નઓવર હતું. દક્ષિણ ભારત ઉપરાંત તે તેની પેટાકંપની દ્વારા શ્રીલંકામાં પણ બિઝનેસ કરે છે.